ଶ୍ରାବଣରେ ଶୁଖିଲା ପଡ଼ିଛି ହୀରାକୁଦ ବନ୍ଧ, ଦିଶୁଛି ମନ୍ଦିର । କମୁଛି ଜଳଭଣ୍ଡାର ସ୍ତର, ଆଗକୁ କ’ଣ ହେବ ତାକୁ ନେଇ ବଢିଲା ଚିନ୍ତା ।
କନକ ବ୍ୟୁରୋ : ହୀରାକୁଦର ଏପରି ଏକ ଦୃଶ୍ୟ, ଯାହାକୁ ଦେଖିଲେ ଆପଣ ବି ଆଶ୍ଚର୍ଯ୍ୟ ହୋଇଯିବେ । ବର୍ଷା ଅଭାବରୁ ହୀରାକୁଦ ଜଳସ୍ତର କମିଥିବା ବେଳେ ଜଳ ଭଣ୍ଡାରର ଗର୍ଭରେ ବୁଡି ରହିଥିବା ମନ୍ଦିର ଏବେ ସଂପୂର୍ଣ୍ଣ ପଦାରେ ରହିଛି । ହୀରାକୁଦରେ ଜଳ ସଙ୍କଟ । କମୁଛି ଜଳଭଣ୍ଡାରର ସ୍ତର । ଏହାର ପ୍ରମାଣ ହେଉଛି ଏହି ଦୃଶ୍ୟ । ଜଳ ଭଣ୍ଡାରର ଗର୍ଭରେ ବୁଡି ରହିଥିବା ମନ୍ଦିର ଏବେ ସଂପୂର୍ଣ୍ଣ ପଦାରେ ରହିଛି । ରେଙ୍ଗାଲି ବ୍ଲକ ରମ୍ପେଲା ନିକଟରେ ଥିବା ସପନେଇ ସେତୁ ନିକଟରେ ରହିଛି ଏହି ପୁରୁଣା ଜଗନ୍ନାଥ ମନ୍ଦିର । ହେଲେ ଶ୍ରାବଣ ମାସରେ ସ୍ପଷ୍ଟ ଦୃଶ୍ୟମାନ ହେଉଛି ଏହି ମନ୍ଦିର । ଏହାକୁ ଦେଖିବା ପାଇଁ ଲୋକଙ୍କ ମଧ୍ୟରେ ବେଶ୍ ଆଗ୍ରହ ଦେଖାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ୬୦ ବର୍ଷ ତଳେ ହୀରାକୁଦ ଜଳଭଣ୍ଡାର ନିର୍ମାଣ ହେବା ସମୟରେ ଅବିଭକ୍ତ ସମ୍ବଲପୁର ଜିଲ୍ଲାର ପ୍ରାୟ ୩୬୦ଟି ଗାଁ ପାଣିରେ ବୁଡିଯାଇଥିଲା । ପ୍ରାୟ ୨୨ ହଜାର ପରିବାରର ଲକ୍ଷାଧିକ ଲୋକ ପ୍ରଭାବିତ ହୋଇଥିଲେ ଏବଂ ବିସ୍ଥାପିତ ହୋଇଥିଲେ । ଏହି ଜଳଭଣ୍ଡାରରେ ପ୍ରାୟ ୨୦୦ ମନ୍ଦିର ବୁଡି ରହିଛି । ଦୀର୍ଘ ଦିନ ପାଣିରେ ବୁଡି ରହିବା ପରେ ଅଧିକାଂଶ ଧ୍ୱଂସ ହୋଇଗଲାଣି । ଗ୍ରୀଷ୍ମ ଦିନରେ ଜଳଭଣ୍ଡାର ଅଂଚଳରେ ପ୍ରାୟ ୫୦ଟି ମନ୍ଦିର ଦେଖାଯାଏ । କିନ୍ତୁ ଶ୍ରାବଣ ମାସରେ ରମ୍ପେଲାର ଜଗନ୍ନାଥ ମନ୍ଦିର ଦେଖାଯିବା ହୀରାକୁଦ ଜଳଭଣ୍ଡାରରେ ଜଳ ସଂକଟକୁ ପ୍ରମାଣିତ କରୁଛି ।
ଗତ ୬ ବର୍ଷରେ ଅଗଷ୍ଟ ୩ ତାରିଖରେ ହୀରାକୁଦ ଜଳଭଣ୍ଡାରର ସ୍ତର କଣ ଥିଲା ଆସନ୍ତୁ ତାହା ଉପରେ ନଜର ପକାଇବା । ୨୦୧୪ରେ ଜଳସ୍ତର ୬୨୦.୭୫ ଫୁଟ ରହିଥିବା ବେଳେ ୨୦୧୫ରେ ଏହି ସ୍ତର ୬୦୭.୮୯ ଫୁଟ୍ ରହିଥିଲା । ସେହିପରି ୨୦୧୬ରେ ଜଳସ୍ତର ୬୧୧.୪୬ ଫୁଟ, ୨୦୧୭ରେ ୬୦୭.୪୫ ଫୁଟ୍ ଏବଂ ୨୦୧୮ରେ ଜଳଭଣ୍ଡାରର ସ୍ତର ଥିଲା ୬୧୨.୪୧ ଫୁଟ୍ । ଚଳିତ ବର୍ଷ ଏବେ ଜଳସ୍ତର ରହିଛି ୬୦୦.୮୧ ଫୁଟ୍ ।
ଗତବର୍ଷ ତୁଳନାରେ ପ୍ରାୟ ୧୨ ଫୁଟ୍ ଜଳସ୍ତର କମ ରହିଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ଜୁଲାଇ ମାସରେ ପ୍ରତି ବର୍ଷ ହୀରାକୁଦ ଜଳଭଣ୍ଡାରର ଗେଟ୍ ଖୋଲାଯାଉଥିବା ବେଳେ ଚଳିତ ବର୍ଷ ଏଯାଏଁ ଗେଟ୍ ଖୋଲାଯାଇ ନାହିଁ । ଉପର ମୁଣ୍ଡରେ ବର୍ଷା ଅଭାବ ହୀରାକୁଦ ପାଇଁ ଚିନ୍ତା ବଢାଇଛି । ଫଳରେ ଆଗାମୀ ଦିନରେ ଜଳସେଚନ ଓ ବିଦ୍ୟୁତ ଉତ୍ପାଦନ ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି ।