ମୁଖ୍ୟ ବିଚାରପତିଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଖାରଜ । ଆଇନ ବିଶାରଦଙ୍କ ପରାମର୍ଶ ଆଧାରରେ ରାଜ୍ୟସଭା ଅଧ୍ୟକ୍ଷଙ୍କ ନିଷ୍ପତ୍ତି ।
କନକ ବ୍ୟୁରୋ : ସୁପ୍ରିମକୋର୍ଟ ପ୍ରଧାନ ବିଚାରପତି ଦୀପକ ମିଶ୍ରଙ୍କ ବିରୋଧରେ ଆସିଥିବା ମହାଅଭିଯୋଗ ପ୍ରସ୍ତାବ ଖାରଜ ହୋଇଯାଇଛି । ଆଇନ ଓ ସମ୍ବିଧାନ ବିଶେଷଜ୍ଞଙ୍କ ସହ ଆଲୋଚନା ପରେ ଉପରାଷ୍ଟପତି ଏହାକୁ ଖାରଜ କରିଦେଇଛନ୍ତି । ପ୍ରସ୍ତାବ ଖାରଜ ହେଲେ ସୁପ୍ରିମକୋର୍ଟ ଯିବାକୁ କଂଗ୍ରେସ ଧମକ ଦେଇଥିବାରୁ, ଏବେ ଦଳର ଅଭିମୁଖ୍ୟ ଉପରେ ସମସ୍ତଙ୍କ ନଜର ରହିଛି । ମାମଲାର ଗମ୍ଭୀରତାକୁ ଦେଖି ଭେଙ୍କୟା ତାଙ୍କର ହାଇଦ୍ରାବାଦ ଗସ୍ତ ବାତିଲ କରି ଗତକାଲି ଦିଲ୍ଲୀ ଫେରିଆସିଥିଲେ । ଏବାବଦରେ ସେ ବିଭିନ୍ନ ଆଇନ ଓ ସମ୍ବିଧାନ ବିଶେଷଜ୍ଞଙ୍କ ସହ ଗତକାଲି ଆଲୋଚନା ବି କରିଥିଲେ । ପୂର୍ବତନ ଲୋକସଭା ମହାସଚିବ ସୁଭାଷ କଶ୍ୟପ, ପୂର୍ବତନ ଆଇନ ସଚିବ ପି.କେ ମାଲହୋତ୍ରା ଏବଂ ପୂର୍ବତନ ସଂସଦୀୟ ସଚିବ ସଞ୍ଜୟ ସିଂହଙ୍କ ସହ ସେ ବିଚାର ବିମର୍ଷ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତ ୨୦ ତାରିଖରେ ସୁପ୍ରିମକୋର୍ଟର ପ୍ରଧାନ ବିଚାରପତି ଦୀପକ ମିଶ୍ରଙ୍କ ବିରୋଧରେ କଂଗ୍ରେସ ସମେତ ୭ଟି ବିରୋଧୀ ଦଳ ମହାଭିଯୋଗ ନୋଟିସ୍ ରାଜ୍ୟସଭା ଅଧକ୍ଷଙ୍କୁ ପ୍ରଦାନ କରିଥିଲେ । ପ୍ରଧାନ ବିଚାରପତି ପଦର ଦୂରୁପଯୋଗ ଅଭିଯୋଗରେ ଏହି ପ୍ରସ୍ତାବ ଅଣାଯାଇଥିଲା । ନ୍ୟାୟ ବ୍ୟବସ୍ଥାର ସର୍ବୋଚ୍ଚ ଅନୁଷ୍ଠାନ ସୁପ୍ରିମକୋର୍ଟଙ୍କ ଉପରେ ପ୍ରଶ୍ନ ଉଠାଇ ଦେଶର ୭ଟି ରାଜନୈତିକ ଦଳ ପ୍ରଧାନ ବିଚାରପତି ଦୀପକ ମିଶ୍ରଙ୍କୁ ପଦରୁ ହଟାଇବାକୁ ଏକାଠି ହୋଇଥିଲେ । କଂଗ୍ରେସ ନେତୃତ୍ୱରେ ୭ଟି ବିରୋଧୀ ଦଳର ୬୪ ଜଣ ସାଂସଦ ଏହି ନୋଟିସରେ ସ୍ୱାକ୍ଷର କରିଥିଲେ । କଂଗ୍ରେସ, ଏନସିପି, ସିପିଆଇ, ସିପିଏମ୍, ଏସପି, ବିଏସପି ଆଦି ୭ଟି ଦଳର ସାଂସଦମାନେ ଉପରାଷ୍ଟ୍ରପତିଙ୍କୁ ଦେଇଥିଲେ ନୋଟିସ୍ । ମହାଅଭିଯୋଗ ପ୍ରସ୍ତାବ ଦେଇ ସୁପ୍ରିମକୋର୍ଟ ପ୍ରଧାନ ବିଚାରପତି ପଦରୁ ଜଷ୍ଟିସ ଦୀପକ ମିଶ୍ରଙ୍କୁ ହଟାଇବାକୁ ପାଇଁ ଦାବି କରିଛନ୍ତି ।
ମହାଅଭିଯୋଗ ପ୍ରସ୍ତାବ ଲାଗି ଲୋକସଭାରେ ସର୍ବନିମ୍ନ ୧୦୦ ସାଂସଦ ଓ ରାଜ୍ୟସଭାରେ ୫୦ ଜଣ ସାଂସଦ ଆବଶ୍ୟକ । ରାଜ୍ୟସଭାର ୬୪ ଜଣ ସାଂସଦ ଏହି ପ୍ରସ୍ତାବ ପାଇଁ ନୋଟିସ ଦେଇଥିଲେ । ଆଉ ଏହାପରେ ଆଇନ ବିଶାରଦଙ୍କ ସହ ଆଲୋଚନା ପରେ ପ୍ରସ୍ତାବକୁ ଖାରଜ କରିଦେଇଛନ୍ତି ରାଜ୍ୟସଭା ଅଧ୍ୟକ୍ଷ ତଥା ଉପ ରାଷ୍ଟ୍ରପତି ଭେଙ୍କେୟା ନାଇଡୁ ।