ବେଆଇନ ଅର୍ଥ କାରବାର ନେଇ ବୀରଭଦ୍ର ସିଂଙ୍କ ବିରୋଧରେ ମାମଲା
କନକ ବ୍ୟୁରୋ: ନଭେମ୍ବର ୯ ତାରିଖରେ ହିମାଚଳ ପ୍ରଦେଶ ନିର୍ବାଚନ ହେବାକୁ ଥିବା ବେଳେ ଏହା ପୂର୍ବରୁ ସଙ୍କଟରେ ପଡ଼ିଯାଇଛନ୍ତି ମୁଖ୍ୟମନ୍ତ୍ରୀ ବୀରଭଦ୍ର ସିଂହ । ତାଙ୍କ ବିରୋଧରେ ପୂର୍ବରୁ ରୁଜୁ ହୋଇଥିବା ଅର୍ଥ ହେରଫେର ମାମଲାରେ ଗତକାଲି ପ୍ରବର୍ତ୍ତନ ନିର୍ଦ୍ଦେଶାଳୟ ବୀରଭଦ୍ରଙ୍କର ପ୍ରାୟ ୫.୬ କୋଟି ଟଙ୍କାର ସମ୍ପତ୍ତି ବାଜ୍ୟାପ୍ତ କରିଛି ।
Kanak News is now on WhatsApp
Join and get latest news updates delivered to you via WhatsApp
ଇଡି ବାଜ୍ୟାପ୍ତ କରିଥିବା ଏହି ସ୍ଥାବର ଏବଂ ଅସ୍ଥାବର ସମ୍ପତ୍ତିଗୁଡ଼ିକ ବୀରଭଦ୍ରଙ୍କ ପୁଅ ବିକ୍ରମାଦିତ୍ୟ ସିଂହ, ଝିଅ ଅପରାଜିତା ସିଂହ ଏବଂ ପତ୍ନୀ ପ୍ରତିଭା ସିଂହଙ୍କ ନାଁରେ ରହିଛି । ଦିଲ୍ଲୀର ଡେରା ମଣ୍ଡିରେ ଏମଏସ୍ ତାରଣୀ ଇଣ୍ଟରନ୍ୟାସନାଲ ନାଁରେ ଥିବା ଏକ ଫାର୍ମ ହାଉସର କିଛି ଅଂଶ ଏବଂ ଗୁଜରାଟର ବାପିରେ ଏମଏସ୍ ତାରିଣି ଇନଫ୍ରା ଦାମନଗଙ୍ଗା ପ୍ରକଳ୍ପରୁ ୪.୨ କୋଟି ଟଙ୍କା ସମ୍ପତ୍ତି ବାଜ୍ୟାପ୍ତ ହୋଇଛି ।
ସେହିପରି ବିକ୍ରମାଦିତ୍ୟ ଏବଂ ଅପରାଜିତାଙ୍କ ବିଭିନ୍ନ ବ୍ୟାଙ୍କ୍ ଖାତାରେ ଥିବା ୨୦ ଲକ୍ଷର ଜମାରାଶି ଏବଂ ୬୪ ଲକ୍ଷର ବିଭିନ୍ନ କମ୍ପାନି ଅଂଶଧନକୁ ବାଜ୍ୟାପ୍ତ କରିଦିଆଯାଇଛି । ଏ ଯାବତ୍ ଦୁର୍ନୀତି ମାମଲାରେ ବୀରଭଦ୍ରଙ୍କର ପାଖାପାଖି ୪୦ କୋଟି ଟଙ୍କାର ସମ୍ପତ୍ତି ବାଜ୍ୟାପ୍ତ ହୋଇଥିବା ଇଡି କହିଛନ୍ତି ।
ସୂଚନା ମୁତାବକ, ୨୦୧୫ ମସିହାରେ ବେଆଇନ ଅର୍ଥ କାରବାର ନେଇ ବୀରଭଦ୍ର ସିଂଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା । ସେପଟେ ମୁଖ୍ୟମନ୍ତ୍ରୀଙ୍କ ପୁଅ ବିକ୍ରମାଦିତ୍ୟ, ପତ୍ନୀ ପ୍ରତିଭା ଓ ଝିଅଙ୍କ ବିରୋଧରେ ମଧ୍ୟ ଇଡି ମାମଲା ରୁଜୁ କରିଛି । ଅନ୍ୟପଟେ, ଆୟର୍ବହିଭୂତ ସଂପତି ମାମଲାରେ ବୀରଭଦ୍ର ଓ ତାଙ୍କ ପତ୍ନୀଙ୍କ ଶୁଣାଣି ଦିଲ୍ଲୀର ପଟିଆଲା କୋର୍ଟରେ ହେବ । ଏନେଇ କୋର୍ଟ ଆସନ୍ତା ୩୧ ତାରିଖରୁ ଧାର୍ଯ୍ୟ କରିଛନ୍ତି ।