ବଢ଼ିଲା ପୁରୀ ଅଡ଼ୁଆ : ମହାପ୍ରଭୁଙ୍କ ସେବା ବନ୍ଦ ଧମକ, ଗିରଫ ପ୍ରତିବାଦରେ ବିମାନ ଉଠାଇଲେନି ବିମାନବଡୁ, ଘଣ୍ଟା ଘଣ୍ଟା ବସି ରହିଲେ ଦୁର୍ଗାମାଧବ
କନକ ବ୍ୟୁରୋ: ବଢ଼ିଲା ଶ୍ରୀମନ୍ଦିର ଅଡୁଆ । ମହାପ୍ରଭୁଙ୍କ ସେବା ବନ୍ଦ ଧମକ ଦେଇଛନ୍ତି ସେବାୟତ । ପୁରୀ ହିଂସା ଘଟଣାରେ ପୁଲିସ ଗିରଫଦାରୀର ସିଧା ପ୍ରଭାବ ମହାପ୍ରଭୁଙ୍କ ସେବା ଉପରେ ପଡିଛି । ରବିବାର ଶ୍ରୀମନ୍ଦିରରେ ବିମାନବଡୁ ସେବକ ନୀଳକଣ୍ଠ ଦାସଙ୍କୁ ପୁଲିସ ଗିରଫ କରିବା ପରେ ଗତକାଲି ମହାପ୍ରଭୁଙ୍କ ନୀତି ୪ଘଂଟା ବିଳମ୍ବିତ ହୋଇଛି । ବିମାନବଡୁ ସେବକ ପାଲିଙ୍କି ନଉଠାଇବାରୁ ଦୁର୍ଗାମାଧବ ବିମଳା ମନ୍ଦିରକୁ ବିଳମ୍ବରେ ବିଜେ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଦୁର୍ଗାମାଧବ ପ୍ରାୟ ୪ଘଂଟା କାଳ ମୁକ୍ତି ମଣ୍ଡପ ସମ୍ମୁଖରେ ଅସହାୟ ହୋଇ ପାଲିଙ୍କି ଉପରେ ବସି ରହିଥିଲେ । ସୋମବାର ଶ୍ରୀମନ୍ଦିରରେ ମହାପ୍ରଭୁଙ୍କ ମଧ୍ୟାହ୍ନ ଧୂପ ବିଳମ୍ବିତ ହୋଇଥିବାବେଳେ ଅପରାହ୍ନ ପ୍ରାୟ ୫ଟାବେଳେ ଦ୍ୱିପ୍ରହର ଧୂପ ନୀତି ହୋଇଥିଲା । କେବଳ ଏତିକି ନୁହେଁ ସେବା ବନ୍ଦ୍ କରିବାକୁ ମଧ୍ୟ ଧମକ ମିଳିଛି । ବିମାନବଡୁ ସେବକଙ୍କ ଏପ୍ରକାର ଚେତାବନୀକୁ ନେଇ ବର୍ତମାନ ମନ୍ଦିର ପ୍ରଶାସନ ଅଡୁଆରେ ପଡିଛି । ପୁଲିସ ଅନ୍ୟ କିଛି ନିଯୋଗ ସେବାୟତଙ୍କ ନାମରେ ମାମଲା ରୁଜୁ କରିଥିଲେ ହେଁ ସେମାନଙ୍କୁ ଗିରଫ କରିବ କି ଛାଡିବ ସେ ନେଇ ସନ୍ଦେହ ଉପୁଜିଛି ।
ସୂଚନାଯୋଗ୍ୟ, ଗତ ୩ ତାରିଖ ବନ୍ଦ ଘଟଣାରେ ପୁଲିସ ରବିବାର ଦିନ ବିମାନବଡୁ ସାହିର ନୃସିଂହଙ୍କୁ ତାଙ୍କୁ ଘରୁ ଉଠାଇ ଆଣିଥିଲା। ଏହି ଘଟଣାକୁ ନେଇ ବିମାନବଡୁ ସେବକ ପୁଲିସ ଉପରେ କ୍ଷୁବ୍ଧ ଥିଲେ। ଗତକାଲି ସକାଳ ଧୂପ ପରେ ବିମାନବଡୁ ସେବକ ଦୁର୍ଗାମାଧବଙ୍କୁ ପାଲିଙ୍କିରେ ବିଜେ କରାଇବାକୁ ମନା କରିଦେଇଥିଲେ। ତାଙ୍କର ଜଣେ ସେବକଙ୍କୁ ଗିରଫ ପ୍ରତିବାଦରେ ସମସ୍ତ ବିମାନ ବଡୁ ସେବକ ଏକାଠି ହୋଇ ସେବାରେ ଅସହଯୋଗ କରିଥିଲେ। ମନ୍ଦିର ପ୍ରଶାସନ ପକ୍ଷରୁ କମାଣ୍ଡର ଯାଇ ବିମାନବଡୁ ସେବକଙ୍କୁ ପାଲିଙ୍କି ନେବାକୁ କହିଥିଲେ। ମାତ୍ର ସେବକମାନେ ନେଇନଥିଲେ। ଦୁର୍ଗାମାଧବ ଦୀର୍ଘ ସମୟ ଧରି ପାଲିଙ୍କି ଉପରେ ମୁକ୍ତି ମଣ୍ଡପ ସମ୍ମୁଖରେ ବସି ରହିଥିଲେ।
ପ୍ରତିଦିନ ବିମାନବଡୁମାନେ ଦୁର୍ଗାମାଧବଙ୍କୁ ବିମଳାଙ୍କ ମନ୍ଦିରରେ ବିଜେ କରାଇବା ପରେ ସେଠାରେ ନୀତି ହୋଇଥାଏ। ମହାପ୍ରଭୁଙ୍କ ନୀତି ସହିତ ଏହାର ସଂପର୍କ ରହିଛି। ବିମାନବଡୁ ନିଯୋଗ ସହିତ ଆଲୋଚନା କରିବା ପରେ ସେବକ ବିଳମ୍ବରେ ପାଲିଙ୍କି ବିଜେ କରାଇଥିଲେ। ତେବେ ଏ ନେଇ ମନ୍ଦିର ପ୍ରଶାସନକୁ ଚେତାବନୀ ଦେଇଛନ୍ତି ବିମାନବଡୁ ସେବକ। କହିଛନ୍ତି, ପୁଲିସ ଯଦି ସେବକଙ୍କ ଘରକୁ ଯାଇ ହଇରାଣ କରେ ଆଜି ସେମାନେ ପାଲିଙ୍କି ଉଠାଇବେ ନାହିଁ। ଏଭଳି ପରିସ୍ଥିତିରେ ଅନ୍ୟ ନିଯୋଗର ସେବାୟତଙ୍କୁ ପୁଲିସ ଗିରଫ କଲେ ମହାପ୍ରଭୁଙ୍କ ସେବାରେ ଅଚଳାବସ୍ଥା ଉପୁଜିବ ବୋଲି ଏବେଠୁ ଜଳଜଳ ଦେଖାଦେଲାଣି।