ବରିଷ୍ଠ ଆଇଏଏସ ବିନୋଦ କୁମାରଙ୍କ ଘରେ ଭିଜିଲାନ୍ସ ଚଢାଉ : ଜାରି ହୋଇଛି ଜାମିନ ବିହୀନ ଗିରଫ ପରୱାନା, ଗତକାଲି ଓଆରଏଚଡିସି ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ
କନକ ବ୍ୟୁରୋ : ବରିଷ୍ଠ ଆଇଏଏସ ଅଧିକାରୀ ବିନୋଦ କୁମାରଙ୍କ ବାସଭବନରେ ଚଢାଉ କରିଛି ଭିଜିଲାନ୍ସ । ଓଆରଏଚଡିସି ଦୁର୍ନୀତି ମାମଲାରେ ଗତକାଲି ବିନୋଦ କୁମାରଙ୍କୁ ଦୋଷୀ ସାବ୍ୟସ୍ତ କରିଛନ୍ତି ଭିଜିଲାନ୍ସ କୋର୍ଟ । ତେବେ ଶୁଣାଣୀ ବେଳେ ଉପସ୍ଥିତ ନଥିବାରୁ ତାଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରିଥିଲେ କୋର୍ଟ । ତାଙ୍କୁ ଗିରଫ କରିବାକୁ ନିର୍ଦ୍ଦେଶ ଦିଆଯାଇଥିଲା । ଆଜି ସଂଧ୍ୟାବେଳେ ବିନୋଦ କୁମାର ବାସଭବନରେ ରେଡ୍ କରିଛି ଭିଜିଲାନ୍ସ । ତେବେ ବିନୋଦ କୁମାର ଘରେ ନଥିବାରୁ ଫେରି ଆସିଛି ଭିଜିଲାନ୍ସ ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ବହୁ ଚର୍ଚ୍ଚିତ ଓଆରଏଚଡିସି ଅର୍ଥାତ୍ ଓଡ଼ିଶା ରୁରାଲ ହାଉସିଂ ଆଣ୍ଡ୍ ଡେଭେଲୋପମେଂଟ କର୍ପୋରେସନ୍ ଦୁର୍ନୀତି ମାମଲାରେ ଭିଜିଲାନ୍ସ କୋର୍ଟ ଦୋଷୀ ସାବ୍ୟସ୍ତ ପରେ ବରିଷ୍ଠ ଆଇଏଏସ ଅଫିସର ବିନୋଦ କୁମାରଙ୍କ ନାଁରେ ଜାରି ହୋଇଛି ନନ୍ ବେଲେବୁଲ୍ ୱାରେଂଟ । ଗତକାଲି ଶୁଣାଣୀ ବେଳେ ଉପସ୍ଥିତ ନଥିଲେ ବିନୋଦ କୁମାର । ତାଙ୍କୁ ତୁରନ୍ତ ଗିରଫ କରିବାକୁ କମିସନରେଟ୍ ପୋଲିସ ଓ ଭିଜିଲାନ୍ସ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ ।
୧୯୯୯ ମହାବାତ୍ୟା ପରେ ଓଡ଼ିଶାରେ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପାଇଁ କେନ୍ଦ୍ର ସରକାର ଯୋଜନା କରିଥିଲେ । ଏହି ଯୋଜନାରେ ନୋଡାଲ ଏଜେନ୍ସୀ ଭାବେ କାମ କରୁଥିଲା ହୁଡ଼କୋ । ହୁଡ଼କୋ ସହ ରାଜିନାମା କରିଥିଲା ଓଆରଏଚଡିସି । ତେବେ ଏହି ନିର୍ମାଣ କାର୍ଯ୍ୟରେ ହୋଇଥିଲା ବ୍ୟାପକ ହେରଫେର ।
ରାଜିନାମାର ସର୍ତ୍ତ ଖିଲାଫ କରି ଗ୍ରାମ୍ୟ ବିକାଶ ମଂଚ ନାମକ ଏକ ସ୍ୱେଚ୍ଛାସେବୀ ଅନୁଷ୍ଠାନକୁ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପାଇଁ ଅନୁମତି ଦିଆଯାଇଥିଲା । ବାଲିପାଟଣା ଅଂଚଳରେ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପାଇଁ ଏହି ଅନୁଷ୍ଠାନ ୨୧ ଲକ୍ଷ ଟଙ୍କା ଋଣ ନେଇଥିଲା । ହେଲେ ନା ତିଆରି କରିଥିଲା ଆଶ୍ରୟସ୍ଥଳୀ ନା ଶୁଝିଥିଲା ଟଙ୍କା । ଏହି ଟଙ୍କାର ସୁଧ ବଢ଼ି ଏବେ ପହଁଚିଛି ୫୫ ଲକ୍ଷ ଟଙ୍କାରେ । ୨୦୦୭ରେ ଏ ନେଇ ମାମଲା ରୁଜୁ କରି ୬ ଜଣ ଅଭିଯୁକ୍ତଙ୍କ ନାଁରେ ଚାର୍ଜସିଟ୍ ଦାଖଲ କରିଥିଲା ଭିଜିଲାନ୍ସ । ୨୦୧୧ରେ ଓଆରଏଚଡିସିର ତତ୍କାଳୀନ ଏମଡି ବିନୋଦ କୁମାରକୁ ଗିରଫ କରିଥିଲା ଭିଜିଲାନ୍ସ । ଆଇଏଏସ ଅଧିକାରୀ ବିନୋଦ କୁମାରଙ୍କୁ ମଧ୍ୟ ନିଲମ୍ବନ କରିଥିଲେ ରାଜ୍ୟ ସରକାର । ମାମଲା ବିଚାର କରି ବିନୋଦ କୁମାରଙ୍କ ସମେତ ସମସ୍ତ ୬ ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଛନ୍ତି ଭିଜିଲାନ୍ସ କୋର୍ଟ ।