ଜିଏସଟି ସ୍ଲାବ୍ ୪,୧୬, ୨୪% ହୋଇପାରେ
କନକ ବ୍ୟୁରୋ: ଦେଶରେ ଗତ ଜୁଲାଇରୁ ସାମଗ୍ରୀ ଏବଂ ସେବା ଟିକସ (ଜିଏସଟି) କାର୍ଯ୍ୟକାରୀ ହେଉଛି । ଏଥିରେ ୪ଟି ସ୍ଲାବ୍ ରହିଛି । ସେଗୁଡ଼ିକ ହେଲା ୫, ୧୨, ୧୮ ଏବଂ ୨୮ ପ୍ରତିଶତ । ଏଥିସହିତ ସୁନା ଉପରେ ଜିଏସଟି ହାର ୩ ପ୍ରତିଶତ ରହିଥିବାବେଳେ କେତେକ ଅତ୍ୟାବଶ୍ୟକ ସାମଗ୍ରୀକୁ ଜିଏସଟି ପରିସରରୁ ବାଦ୍ ଦିଆଯାଇଛି । ଏତଦବ୍ୟତୀତ ଲୋକଙ୍କ ସ୍ୱାସ୍ଥ୍ୟ ଏବଂ ପରିବେଶ ଉପରେ ପ୍ରତିକୂଳ ପ୍ରଭାବ ପକାଉଥିବା ସାମଗ୍ରୀ ଉପରେ ୨୮ ପ୍ରତିଶତ ଜିଏସଟି ଉପରେ ସେସ୍ ବା ଉପକର ଆଦାୟ କରାଯାଉଛି । ଜିଏସଟିର ଏତେଗୁଡ଼ିଏ ସ୍ଲାବ୍ ରହିଥିବାରୁ ଏହାକୁ ବିଭିନ୍ନ ମହଲରେ ସମାଲୋଚନା କରାଯାଉଛି । ଏହି ସମାଲୋଚନା ପରେ ନିକଟରେ ଅର୍ଥମନ୍ତ୍ରୀ ଅରୁଣ ଜେଟଲି ଜିଏସଟି ସ୍ଲାବକୁ କମାଇବା ସୁଯୋଗ ରହିଛି ବୋଲି ସଙ୍କେତ ମଧ୍ୟ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜିଏସଟି ଲାଗୁ ହେବା ପୂର୍ବରୁ ସରକାରଙ୍କୁ ମିଳୁଥିବା ଟିକସ ରାଶି ଯଦି ଜିଏସଟିରେ ମିଳେ ତାହେଲେ ସ୍ଲାବ୍ କମାଇବା ସୁଯୋଗ ରହିଥିବା ସେ କହିଛନ୍ତି । ଜେଟଲିଙ୍କ ଏହି ଆଭାସ ପରେ ଜିଏସଟି ସ୍ଲାବକୁ ନେଇ ଆଲୋଚନା ପର୍ଯ୍ୟାଲୋଚନା ଆରମ୍ଭ ହୋଇଯାଇଛି । ତେବେ ଜିଏସଟି ହାରରେ ପରିବର୍ତ୍ତନ କରିଲେ ସରକାର ତଳସ୍ତରରେ ଏବେ ରହିଥିବା ୫ ପ୍ରତିଶତ ଜିଏସଟି ହାରକୁ ୪ ପ୍ରତିଶତକୁ କମାଇପାରନ୍ତି । ସେହିଭଳି ମଧ୍ୟମ ସ୍ତରରେ ରହିଥିବା ୧୨ ଏବଂ ୧୮ ପ୍ରତିଶତ ଜିଏସଟି ହାରକୁ ମିଶାଇ ୧୬ ପ୍ରତିଶତର ଏକ ଜିଏସଟି ହାର ଧାର୍ଯ୍ୟ କରିପାରନ୍ତି ।
କିଛି ବର୍ଷ ପୂର୍ବେ ଏକ ବିଶେଷଜ୍ଞ କମିଟି ମଧ୍ୟ ୧୬ ପ୍ରତିଶତ ଜିଏସଟି ହାର ନେଇ ମତ ଦେଇଥିଲା । ଏତଦବ୍ୟତୀତ କୌଟିଲ୍ୟଙ୍କ ଅର୍ଥଶାସ୍ତ୍ରରେ ମଧ୍ୟମାନ ଟିକସ ହାର ୧୬.୩୩ ପ୍ରତିଶତ ରହିବା ନେଇ ଉଲ୍ଲେଖ ରହିଛି । ତେଣୁ ସରକାର ମଧ୍ୟମ ଧରଣର ଜିଏସଟି ହାରକୁ ୧୬ ପ୍ରତିଶତରେ ରଖିବା ସମ୍ଭାବନା ରହିଛି । ସେହିଭଳି ପ୍ରତକ୍ଷ୍ୟ ଟିକସ କ୍ଷେତ୍ରରେ ସର୍ବୋଚ୍ଚ ଟିକସ ହାରକୁ ୨୫ ପ୍ରତିଶତକୁ କମାଇବାର ଯୋଜନା ରଖାଯାଇଥିବାରୁ ଜିଏସଟିରେ ମଧ୍ୟ ସର୍ବୋଚ୍ଚ ଟିକସ ହାର ୨୮ ପ୍ରତିଶତରୁ ୨୪ ପ୍ରତିଶତକୁ ଖସାଇବା ଯୁକ୍ତିଯୁକ୍ତ ମନେହୁଏ । ତେଣୁ ଆଗାମୀ ଦିନରେ ଯଦି ସରକାର ଏବଂ ଜିଏସଟି ପରିଷଦ ଜିଏସଟି ହାରରେ କୌଣସି ପରିବର୍ତ୍ତନ ଆଣନ୍ତି ତାହେଲେ ଏହାକୁ ୪ ପ୍ରତିଶତ, ୧୬ ପ୍ରତିଶତ ଏବଂ ୨୪ ପ୍ରତିଶତ କରାଯିବାର ଯଥେଷ୍ଟ ସମ୍ଭାବନା ରହିଛି ।