ରୋଚକ ହେଉଛି ବାରାଣାସୀ ରାଜନୀତି । ମୋଦିଙ୍କ ବିରୋଧରେ ମୈଦାନରେ ୧୦୧ ପ୍ରାର୍ଥୀ । ଇଭିଏମରେ କେମିତି ରହିବ ଏତେ ପ୍ରାର୍ଥୀଙ୍କ ନାଁ, ଚିନ୍ତାରେ ନିର୍ବାଚନ କମିଶନ ।
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆସନ ବାରାଣାସୀରେ ଦିନକୁ ଦିନ ରୋଚକ ହେଉଛି ରାଜନୀତି । ବାରାଣାସୀ ଆସନ ପାଇଁ ଗତକାଲି ଅର୍ଥାତ ଏପ୍ରିଲ ୨୯ ତାରିଖ ଥିଲା ଶେଷ ଦିନ । ତେବେ ସବୁଠାରୁ ବଡ କଥା ହେଉଛି, ଏହି ଆସନ ପାଇଁ ଏଥର ୧୦୨ ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି । ଆଉ ଏହି ପ୍ରାର୍ଥୀ ମାନଙ୍କ ସହ ମଇଦାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଅଛନ୍ତି । ପ୍ରାର୍ଥୀମାନଙ୍କର ଏତେ ବଡ ଲିଷ୍ଟ ଦେଖିବା ପରେ ଜିଲ୍ଲା ପ୍ରଶାସନ ଏବଂ ନିର୍ବାଚନ ଆୟୋଗଙ୍କ ପାଇଁ ଅଡୁଆ ବଢିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ଯଦି ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ଦିନ ମଧ୍ୟରେ ଏହି ସଂଖ୍ୟା ୬୪କୁ ନଖସେ ତେବେ ଇଭିଏମରେ ମତଦାନ କରିବା ସମ୍ଭବ ହେବ ନାହିଁ । ଫଳରେ ବାଲାଟ୍ ପେପରରେ ମତଦାନ କରିବା ପାଇଁ ବାଧ୍ୟ ହେବେ ନିର୍ବାଚନ ଆୟୋଗ ।
ପ୍ରାର୍ଥୀପତ୍ର ପ୍ରତ୍ୟାହାର ପାଇଁ ହାତରେ ରହିଛି ଆଉ ମାତ୍ର ୨ ଦିନ । ଆଉ ଏହାରି ଭିତରେ ସମସ୍ତଙ୍କ ନଜର ରହିଛି ଏହି ଆସନରୁ କେତେ ପ୍ରାର୍ଥୀ ନିଜ ନାମ ପ୍ରତ୍ୟାହାର କରିନେଉଛନ୍ତି ଆଉ କେତେ ପ୍ରାର୍ଥୀଙ୍କର ନାମାଙ୍କନ ଖାରଜ ହେଉଛି । ଯଦି ପ୍ରାର୍ଥୀଙ୍କର ସଂଖ୍ୟା ୬୪ରୁ ଅଧିକ ହୁଏ, ତେବେ ଇଭିଏମ୍ ଜରିଆରେ ନିର୍ବାଚନ କରାଇବା ସମ୍ଭବ ହେବ ନାହିଁ । ଫଳରେ ବାଲାଟ୍ ପେପରରେ ହିଁ ମତଦାନ ହେବ । କାରଣ ଗୋଟିଏ ଇଭିଏମରେ ୧୬ ଜଣ ପ୍ରାର୍ଥୀଙ୍କ ନାଁ ରହିଥାଏ । ଏହା ସହ ଇଭିଏମର ୪ଟି ୟୁନିଟ୍ ବ୍ୟବହାର କରାଯାଇପାରିବ । ଅର୍ଥାତ ୬୪ ଜଣ ପ୍ରାର୍ଥୀ ହେଲେ, ସୁରୁଖୁରୁରେ ଇଭିଏମ ଜରିଆରେ ମତଦାନ ହୋଇପାରିବ । କିନ୍ତୁ ଏହି ସଂଖ୍ୟାରେ ଯଦି ବୃଦ୍ଧି ଘଟେ ତେବେ ବାଲାଟି ପେପରର ବ୍ୟବହାର କରାଯିବ ।
ସୂଚନା ଅନୁଯାୟୀ, ଦ୍ୱିତୀୟ ଥର ପାଇଁ ଏହି ଆସନରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିର୍ବାଚନୀ ରଣାଙ୍ଗନକୁ ଓହ୍ଲାଇଥିବା ବେଳେ, କଂଗ୍ରେସ ମଧ୍ୟ ଦ୍ୱିତୀୟ ଥର ପାଇଁ ଅଜୟ ରାୟଙ୍କୁ ମୋଦିଙ୍କ ବିପକ୍ଷରେ ଛିଡା କରିଛି । ସେପଟେ ଏଥର ଉତ୍ତରପ୍ରଦେଶରେ ମେଣ୍ଟ ଭାବେ ନିର୍ବାଚନ ଲଢୁଥିବା ସପା-ବସବା, ପୂର୍ବତନ ଯବାନ ତେଜ୍ ବାହାଦୁର ଯାଦବଙ୍କୁ ପ୍ରାର୍ଥୀ କରିଛି । ଆଉ ସେପଟେ ତେଲେଙ୍ଗାନାର ଅନେକ ହଳଦୀ ଚାଷୀ ମଧ୍ୟ ମୋଦିଙ୍କ ବିପକ୍ଷରେ ବାରାଣାସୀ ଆସନରୁ ନାମାଙ୍କନ ପତ୍ର ଦାଖଲ କରିଛନ୍ତି ।