କନକ ବ୍ୟୁରୋ : ‘ମହିଲାଓଁକା ୟୁପି ମେ ବଜେଗା ଡଙ୍କା, ଜବ ସାଥ ଆୟେଙ୍ଗି ଡିମ୍ପଲ ଔର ପ୍ରିୟଙ୍କା’ । ଏଭଳି ସ୍ଲୋଗାନ ଥାଇ ସମାଜବାଦୀ ପାର୍ଟି ସାଂସଦ ଡିମ୍ପଲ ଯାଦବ ଓ ପ୍ରିୟଙ୍କା ଗାନ୍ଧୀଙ୍କ ଫଟୋ ସହ ପୋଷ୍ଟର ଦେଖିବାକୁ ମିଳିଛି ଆହ୍ଲାବାଦରେ । ଏଥିରୁ ସମାଜବାଦୀ ପାର୍ଟି ଓ କଂଗ୍ରେସ ମଧ୍ୟରେ ମେଂଟ ନେଇ ଜୋରଦାର ଚର୍ଚ୍ଚା ଆରମ୍ଭ ହୋଇଛି । ରାଜନୈତିକ ସଂକଟର ସାମ୍ନା କରୁଥିବା ଅଖିଳେଶ ଗୋଷ୍ଠୀ ଉତ୍ତରପ୍ରଦେଶରେ କଂଗ୍ରେସର ହାତ ଧରି ବିଧାନସଭା ନିର୍ବାଚନ ବୈତରଣୀ ପାର ହେବାକୁ ଚେଷ୍ଟା କରୁଛି ।
Kanak News is now on WhatsApp
Join and get latest news updates delivered to you via WhatsApp
ବାପା ମୁଲାୟମଙ୍କ ବିରୋଧରେ ବିଦ୍ରୋହର ଡାକରା ଦେଇ ସଂକଟରେ ଫସି ଯାଇଛନ୍ତି ୟୁପି ମୁଖ୍ୟମନ୍ତ୍ରୀ ଅଖିଳେଶ ସିଂ ଯାଦବ । ଆଉ ସରକାର ବିରୋଧୀ ହାୱାକୁ କାଉଂଟର କରିବା ପାଇଁ କଂଗ୍ରେସର ସହଯୋଗ ଲୋଡୁଛନ୍ତି । ସେଥିପାଇଁ ପତ୍ନୀ ତଥା କନୌଜ ସାଂସଦ ଡିମ୍ପଲ ଯାଦବଙ୍କୁ ଆଗକୁ କରିଛନ୍ତି । ପ୍ରାକ ନିର୍ବାଚନୀ ମେଂଟ ପାଇଁ କଂଗ୍ରେସକୁ ରାଜି କରିବାକୁ ପ୍ରିୟଙ୍କ ଗାନ୍ଧୀଙ୍କ ସହ ଆଲୋଚନା ଜାରି ରଖିଛନ୍ତି ଡିମ୍ପଲ ଯାଦବ ।
ଏପଟେ ନିଜେ ମଧ୍ୟ କଂଗ୍ରେସ ଉପାଧ୍ୟକ୍ଷ ରାହୁଲ ଗାନ୍ଧୀଙ୍କ ସହ ଆଲୋଚନା ଜାରି ରଖିଛନ୍ତି ଅଖିଳେଶ ଯାଦବ । ୟୁପିରେ ଦୁଇ ମହିଳା ଡିମ୍ପଲ ଓ ପ୍ରିୟଙ୍କାଙ୍କୁ ଆଗକୁ କରି ନିର୍ବାଚନ ଜିତିବାକୁ ରଣନୀତି ପ୍ରସ୍ତୁତ କରୁଛନ୍ତି । ହେଲେ ଏଭଳି ସମୀକରଣକୁ ଅପସନ୍ଦ କରୁଛନ୍ତି କିଛି ଭେଟେରାନ କଂଗ୍ରେସ ନେତା । ଗୁଲାମ ନବୀ ଆଜାଦ, ରାଜ ବବ୍ୱର ଓ ପି.ଏଲ. ପୁନିଆଙ୍କ ପରି ନେତା ମେଂଟ ପ୍ରସ୍ତାବ ବିରୋଧରେ ଥିବା ସୂଚନା ମିଳିଛି ।
ସେପଟେ ଦଳୀୟ ଚିହ୍ନ ସାଇକେଲକୁ ନେଇ ବି ଦ୍ୱନ୍ଦ୍ୱ ଏଯାଏଁ ଟଳିନାହିଁ । ବଲ ଏବେ ନିର୍ବାଚନ କମିଶନଙ୍କ କୋର୍ଟରେ । ସମାଜବାଦୀ ପାର୍ଟିରେ ଦେଖାଦେଇଥିବା ପାରିବାରିକ କନ୍ଦଳରୁ ନିର୍ବାଚନୀ ଚିହ୍ନ କାହା ସପକ୍ଷରେ ଯିବ, ତାହା ସ୍ଥିର କରିବେ ଜାତୀୟ ନିର୍ବାଚନ କମିଶନ । ବିଧାନସଭା ଭୋଟକୁ ଆଉ ଅଳ୍ପଦିନ ବାକି ଥିବାବେଳେ ଅଖିଳେଶଙ୍କୁ ସାଇକେଲ ଚିହ୍ନରେ ଲଢିବା ପାଇଁ ସୁଯୋଗ ନମିଳିଲେ ବଡ କ୍ଷତି ସହିବାକୁ ପଡିପାରେ ।
ଏପଟେ କ୍ଷତି ସହୁଛନ୍ତି ପୋଷ୍ଟର ବ୍ୟବସାୟୀ । ଉତ୍ତରପ୍ରଦେଶରେ କେବଳ ସମାଜବାଦୀ ପାର୍ଟିର ସାଇକେଲ ଚିହ୍ନ ଥିବା ପୋଷ୍ଟର ବିକି ପ୍ରଚୁର ଲାଭ କରୁଥିଲେ ଦୋକାନୀ । ମୁଲାୟମ, ଅଖିଳେଶ ଓ ଡିମ୍ପଲଙ୍କ ଫଟୋ ସହିତ ପୋଷ୍ଟର ବି ପ୍ରସ୍ତୁତ କରିଥିଲେ । ହେଲେ ଏବେ ପରିବାର ବିବାଦ ଏମାନଙ୍କ ବେପାର ବୁଡାଇବାକୁ ବସିଛି । କାରଣ ଆଗାମୀ ବିଧାନସଭା ନିର୍ବାଚନ ଲଢିବାକୁ ସାଇକେଲ ଚିହ୍ନ ମିଳିବ କି ନା, ତାକୁ ନେଇ ଦ୍ୱନ୍ଦ୍ୱ । ଆଉ ଲକ୍ଷଲକ୍ଷ ଟଙ୍କା ଖର୍ଚ୍ଚ କରି ପୋଷ୍ଟର ଛାପିଥିବା ବ୍ୟବସାୟୀ ବି ଆଶଙ୍କାରେ ଅଛନ୍ତି ।