ଉରି ଆକ୍ରମଣକୁ ପୁରିଲା ୩ ବର୍ଷ ! ଶୋଇଥିବା ସମୟରେ ସେନା ଯବାନଙ୍କ ଉପରକୁ ଆକ୍ରମଣ କରିଥିଲେ ଆତଙ୍କବାଦୀ, ମାତ୍ର ୧୦ ଦିନ ଭିତରେ ପ୍ରତିଶୋଧ ନେଇଥିଲା ଭାରତୀୟ ସେନା ।
ଆଜିର ହସୁଥିବା ଦିନଟି ୩ ବର୍ଷ ତଳେ କଳା ଦିନରେ ପରିଣତ ହୋଇଥିଲା । ୨୦୧୬ ମସିହା ସେପ୍ଟେମ୍ବର୧୮ ଜମ୍ମୁ-କାଶ୍ମୀରର ଉରି ଅଞ୍ଚଳରେ ଆତଙ୍କବାଦୀମାନେ ଭାରତୀୟ ଯବାନଙ୍କ ଉପରେ ଆକ୍ରମଣ କରିଥିଲେ । ଭୋର୍ ୫.୩୦ ସମୟରେ ଜୈଶ୍-ଏ-ମହମ୍ମଦର ୪ ଜଣ ଆତଙ୍କୀ ଭାରତୀୟ ସେନାର ବ୍ରିଗେଡ୍ ହେଡକ୍ୱାଟର୍ସ ଉପରେ ଅଚାନକ ଆକ୍ରମଣ କରିଥିଲେ । ସେନାର ଯବାନମାନେ ଶୋଇଥିବା ଅବସ୍ଥାରେ ଆତଙ୍କବାଦୀମାନେ କାପୁରୁଷ ହୋଇ ଆକ୍ରମଣ କରିଥିଲେ । ଯେଉଁଥିରେ ୧୯ ଜଣ ଯବାନ ସହିଦ୍ ହୋଇଥିବା ବେଳେ ଅନେକ ଯବାନ ଗୁରୁତର ହୋଇଯାଇଥିଲେ । ୩ ମିନିଟ୍ ଭିତରେ ଆତଙ୍କବାଦୀ ୧୭ ଟି ହ୍ୟାଣ୍ଡ୍ ଗ୍ରେନେଡ୍ ଫୋପାଡି ରକ୍ତର ତାଣ୍ଡବ ଖେଳାଇଥିଲେ । ଏହାପରେ ଆତଙ୍କବାଦୀମାନଙ୍କ ସହ ସେନାର ୬ ଘଣ୍ଟା ଧରି ଗୁଳିବିନିମୟ ଚାଲିଥିଲା । ଯେଉଁଥିରେ ୪ ଜଣ ଆତଙ୍କବାଦୀଙ୍କ ମୁଣ୍ଡ ଗଡାଇଥିଲା ଭାରତୀୟ ସେନା ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣା ପରେ ଭାରତୀୟ ସେନା ଯେଉଁ ପଦକ୍ଷେପ ନେଲା ତାହା ସଂପୁର୍ଣ୍ଣ ଦୁନିଆରେ ଏକ ଉଦାହରଣ ହୋଇଉଠିଲା । ଆତଙ୍କବାଦୀଙ୍କ କାପୁରୁଷତା କାର୍ଯ୍ୟକୁ ଉଚିତ୍ ଶିକ୍ଷା ଦେବା ପାଇଁ ସେନା ଯବାନ ଏହି ଆକ୍ରମଣର ୧୦ ଦିନ ପରେ ଅର୍ଥାତ୍ ସେପ୍ଟେମ୍ବର ୨୯ ତାରିଖରେ ପାକ୍ ର ଘରେ ପଶି ଆତଙ୍କବାଦୀଙ୍କୁ ମାରି ଗଡାଇଥିଲେ । ଯାହା “ସର୍ଜିକାଲ୍ ଷ୍ଟ୍ରାଇକ୍” ନାମରେ ଖୁବ୍ ପରିଚିତ । ଭାରତୀୟ ସେନାର ୧୫୦ ଜଣ ପାରା କମାଣ୍ଡୋ ପିଓକେରେ ପଶି ୬ ଆତଙ୍କୀ ଲଞ୍ଚ୍ ପ୍ୟାଡ୍ କୁ ଧ୍ୱଂସ କରିବା ସହ ୫୦ ଆତଙ୍କବାଦୀଙ୍କୁ ମାରି ଗଡାଇଥିଲେ । ଆତଙ୍କବାଦ ବିରୁଦ୍ଧରେ ପ୍ରଥମଥର ପାଇଁ ଏତେ ବଡ଼ ପଦକ୍ଷେପକୁ କିଛି କ୍ଷଣ ମଧ୍ୟରେ ସଫଳ କରି ଦେଖାଇଥିଲେ ଭାରତୀୟ ସେନା । ପୁରା ପ୍ଲାନିଙ୍ଗ୍ ର ସହ ଭାରତୀୟ ସେନାର ଯବାନ ସେପ୍ଟେମ୍ବର ୨୮ -୨୯ ଅଧରାତିରେ ପିଓକେ ସୀମାର ୩ କି.ମି. ପର୍ଯ୍ୟନ୍ତ ପଶି ଆତଙ୍କବାଦୀଙ୍କ ଠିକଣାକୁ ଧ୍ୱଂସବିଧ୍ୱଂସ କରିଦେଇଥିଲେ ।
ଏନେଇ ବଲିଉଡ୍ ରେ ଏକ ସିନେମା ମଧ୍ୟ ନିର୍ମିତ ହୋଇଥିଲା । ଅଭିନେତା ଭିକି କୋଶଲ୍ ଏହି ସିନେମାରେ ମୁଖ୍ୟ ଭୂମିକାରେ ଆସିଥିଲେ । ଉରି ଆକ୍ରମଣ ଏବଂ ସର୍ଜିକାଲ୍ ଷ୍ଟ୍ରାଇକ୍ ର ସମ୍ପୁର୍ଣ୍ଣ ଘଟଣାକୁ ଏହି ସିନେମାରେ ନିଖୁଣ ଭାବେ ଉପସ୍ଥାପନ କରାଯାଇଥିଲା ।