ଶେଷ ହେଲା ଶାରଦୀୟ ଦୁର୍ଗାପୂଜା,ସରଗରମ ହେଲା ରାଜନୀତି । ଲୋକପ୍ରିୟତା ଲଢ଼େଇରେ କିଏ ମାରିବ ବାଜି ? ୨୦୧୯ ପାଇଁ ୩ ଦଳର ପ୍ରସ୍ତୁତି।
କନକ ବ୍ୟୁରୋ: ଧିରେ ଧିରେ ଶେଷ ହେଉଛି ପାର୍ବଣର ଋତୁ । ଆଉ କିଛି ଦିନ ପରେ ବାକିଥିବା ପୂଜା ପର୍ବ ବି ଶେଷ ହୋଇଯିବ । ତେବେ ଏହାରି ମଧ୍ୟରେ କିଛି ଦିନର ବ୍ରେକ୍ ପରେ ପୁଣି ଉଷ୍ମ ହୋଇଛି ରାଜ୍ୟ ରାଜନୀତି । ଉଭୟ ଶାସକ ଓ ବିରୋଧୀମାନେ ୨୦୧୯ ପାଇଁ ରାଜନୈତିକ ରଣନୀତି ଆରମ୍ଭ କରିଦେଇଛନ୍ତି । କାରଣ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପୂର୍ବ ନିର୍ଦ୍ଧାରିତ ନିର୍ବାଚନୀ କାର୍ଯ୍ୟସୂଚୀକୁ ଦେଖିଲେ ଆସନ୍ତା ଜାନୁୟାରୀରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ କରାଯିବ । ଏବଂ ଏହାର ଠିକ୍ ୨ରୁ ୩ ମାସ ମଧ୍ୟରେ ଓଡ଼ିଶାରେ ସାଧାରଣ ନିର୍ବାଚନ ହେବ । ତେଣୁ ରାଜନୈତିକ ଦଳମାନଙ୍କ ପାଖରେ କେବଳ ଆଉ ହାତ ଗଣତି କିଛି ମାସ ବାକି ରହିଛି । ସେନେଇ ଶାସକ ଓ ବିରୋଧୀ ଏବେଠୁ ରଣନୀତି ପ୍ରସ୍ତୁତ କରିବା ଆରମ୍ଭ କରିଦେଲେଣି ।
Kanak News is now on WhatsApp
Join and get latest news updates delivered to you via WhatsApp
ସାଧାରଣ ନିର୍ବାଚନ ପାଖେଇ ଆସୁଥିବାରୁ କେଉଁ ଦଳର କ’ଣ ଆଭିମୂଖ୍ୟ ରହିବ ସେନେଇ ଏବେ ରାଜନୈତିକ ମାହୋଲରେ ଚାଲିଛି ପ୍ରତିଯୋଗିତା । ତେବେ ଶାସକ ବିଜେଡ଼ିର ନିର୍ବାଚନ ପ୍ରସ୍ତୁତି ଗତ ପଞ୍ଚାୟତ ନିର୍ବାଚନ ଠାରୁ ଆରମ୍ଭ ହୋଇଛି ବୋଲି ବିଜେଡ଼ି କହିଛି । ତୃଣମୂଳସ୍ତରରେ ଲୋକଙ୍କ ସହିତ ଯୋଡ଼ି ହୋଇଛି ବିଜେଡ଼ି । ଯେଉଁଥି ପାଇଁ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟଙ୍କ ବିକଳ୍ପ ଏବେ ଓଡ଼ିଶାରେ କେହି ନଥିବା କହିଛନ୍ତି ବିଜେଡ଼ି ମୁଖପାତ୍ର ପ୍ରଶାନ୍ତ ନନ୍ଦ । ତେବେ ଆଗାମୀ ନିର୍ବାଚନରେ ଲୋକମାନେ ପୂର୍ବପରି ନବୀନ ପଟ୍ଟନାୟକଙ୍କ ଉପରେ ବିଶ୍ୱାସ ରଖି ସରକାର ଗଢ଼ିବେ ବୋଲି ପ୍ରଶାନ୍ତ କହିଛନ୍ତି ।
ସେପଟେ କଂଗ୍ରେସ ମଧ୍ୟ ବିଜେଡ଼ିର ଜବାବ ରଖି କହିଛି ଯେ, ଲୋକମାନେ ବିଜେଡ଼ିକୁ ପ୍ରତ୍ୟାଖ୍ୟାନ କରି ବିକଳ୍ପ ଖୋଜିବା ଆରମ୍ଭ କରିଦେଲେଣି । ପଞ୍ଚାୟତ ନିର୍ବାଚନରେ ଅର୍ଥ ବଳରେ ବିଜେପି ହୁଏତ କିଛି ଫାଇଦା ପାଇ ଯାଇଥିଲା । କିନ୍ତୁ କେନ୍ଦ୍ରରେ ବିଜେପି ସରକାରଙ୍କ ବିପର୍ଯ୍ୟୟ ନିକଟତର ହେବାରେ ଲାଗିଛି ତେଣୁ ବିଜେପି ଉପରେ ଲୋକମାନେ ବିଶ୍ୱାସ ହରେଇ ସାରିଲେଣି । ଏବେ ଓଡ଼ିଶାରେ ବିଜେଡ଼ିର ବିକଳ୍ପ କେବଳ କଂଗ୍ରେସ ହିଁ ହୋଇ ପାରିବ ଯାହା ଲୋକମାନେ ମନବଳାଇଲେଣି ବୋଲି କଂଗ୍ରେସ ମୁଖପାତ୍ର ଶରତ ରାଉତ କହିଛନ୍ତି ।
ଆଉ ଏସବୁ ମଧ୍ୟରେ ପଞ୍ଚାୟତ ନିର୍ବାଚନ ପରଠାରୁ ଶାସକ ବିଜେଡ଼ି ପାଇଁ ପ୍ରମୂଖ ବିରୋଧୀଭାବେ ଉଭା ହୋଇଥିବା ବିଜେପି ମଧ୍ୟ ନିର୍ବାଚନ ପାଇଁ ଜୋରଦାର ପ୍ରସ୍ତୁତି କରୁଛି ବୋଲି କହିଛନ୍ତି ବିଜେପି ମୁଖପାତ୍ର ଗୋଲକ ମହାପାତ୍ର । ଶିକ୍ଷା, ସ୍ୱାସ୍ଥ୍ୟ ଏବଂ ରାଜ୍ୟବାସୀଙ୍କ ସୁରକ୍ଷା କ୍ଷେତ୍ରରେ ବିଫଳ ହୋଇଛି ବିଜେଡ଼ି ସରକାର ବୋଲି ଅଭିଯୋଗର ଚିଠା ପ୍ରସ୍ତୁତ କରିବା ସହ ବୁଥ୍ ଟୁ ବୁଥ୍ ଯାଉଛି ବିଜେପି । ଏବଂ ମୋଦି ସରକାରଙ୍କ ସଫଳତାର ସମ୍ପର୍କରେ ଲୋକମାନଙ୍କୁ ଅବଗତ କରାଉଛି । ଯାହା ଆଗାମୀ ନିର୍ବାଚନରେ ବିଜେଡ଼ିକୁ ପ୍ରତ୍ୟାଖ୍ୟାନ କରି ବିଜେପି ସରକାର ଗଢ଼ିବେ ବୋଲି ଦମ୍ଭୋକ୍ତି ବାଢ଼ିଛି ବିଜେପି ।