କନକ ବ୍ୟୁରୋ : ବରିଷ୍ଠ କଂଗ୍ରେସ ନେତା ସ୍ୱର୍ଗତ ଲୁଲୁ ମହାପାତ୍ରଙ୍କ ଝିଅ ଉପାସନା ମହାପାତ୍ର କଂଗ୍ରେସ ଛାଡିବେ । ଆସନ୍ତାକାଲି ଭୁବନେଶ୍ୱରରେ ଏକ ବଡ ମିଶ୍ରଣ ପର୍ବରେ ବିଜେପିରେ ଯୋଗ ଦେବେ ଉପାସନା । ତାଙ୍କ ସହ ଲୁଲୁଙ୍କ ବଡ ଭାଇ ଲଳିତେନ୍ଦୁ ମହାପାତ୍ର ମଧ୍ୟ ବିଜେପିରେ ମିଶିବେ ।

ରାଜ୍ୟ ରାଜନୀତିରେ ଅଖଣ୍ଡ ପ୍ରଭାବ ରଖୁଥିବା ସ୍ୱର୍ଗତ ଲୁଲୁ ମହାପାତ୍ରଙ୍କ ଝିଅ ଉପାସନା ମହାପାତ୍ର ବିଜେପି ଆଡକୁ ଢଳୁଥିବାର ଚର୍ଚା ଏବେ ବାସ୍ତବ ରୂପ ନେବାକୁ ଯାଉଛି । ଅକ୍ଟୋବର ୧୪ ଅର୍ଥାତ୍ ଶନିବାର, ଏକ ସ୍ୱତନ୍ତ୍ର ମିଶ୍ରଣ ପର୍ବର ଆୟୋଜନ କରିଛି ବିଜେପି । ଭୁବନେଶ୍ୱରର ପ୍ରଦର୍ଶନୀ ପଡିଆରେ ହେବାକୁ ଥିବା ଏହି ମିଶ୍ରଣ ପର୍ବରେ ଲୁଲୁଙ୍କ ଜନ୍ମମାଟିରୁ ହଜାର ହଜାର ସମର୍ଥକଙ୍କ ସହ ଶୋଭାଯାତ୍ରାରେ ବାହାରିବେ ଉପାସନା । ଏବଂ ପ୍ରଦର୍ଶନୀ ପଡିଆରେ ଆନୁଷ୍ଠାନିକ ଭାବେ ବିଜେପିରେ ଯୋଗ ଦେବେ ।

ଗଣମାଧ୍ୟମକୁ ମିଶ୍ରଣ ନେଇ ସ୍ପଷ୍ଟଭାବେ ସୂଚନା ଦେଉନଥିବା ଉପାସନା ଓଡିଶା ରାଜନୀତିରେ ନୂଆ ଇନିଂସ ଆରମ୍ଭ କରିବାକୁ ଯାଉଛନ୍ତି । ମୁମ୍ବାଇର ସୋଫିଆ କଲେଜରେ ଯୁକ୍ତ ୩ ରେ ପାଠ ପଢୁଥିବା ଉପାସନା ୨୦୧୯ରେ ନହେଲେ ମଧ୍ୟ ଆଗକୁ ନିର୍ବାଚନୀ ରାଜନୀତିରେ ସକ୍ରିୟ ରହିବା ନେଇ ଚର୍ଚା ହେଉଛି । ଲୁଲୁଙ୍କ ଭାଇ ଲଳିତେନ୍ଦୁ ବିଦ୍ୟାଧର ମହାପାତ୍ର କହିଛନ୍ତି, କାହିଁକି ସେମାନେ ବିଜେପିରେ ଯୋଗ ଦେବାକୁ ଆଗ୍ରହ ପ୍ରକାଶ କଲେ ତାହା ମିଶ୍ରଣ ପର୍ବରେ ସ୍ପଷ୍ଟ କରିବେ ।

ଓଡିଶା ରାଜନୀତିରେ ଜଣେ ଫାୟାରବ୍ରାଣ୍ଡ ଲିଡର ଭାବରେ ନିଜକୁ ପ୍ରତିଷ୍ଠିତ କରାଇଥିବା ସ୍ୱର୍ଗତ ଲୁଲୁ ମହାପାତ୍ରଙ୍କ ପ୍ରତି ସମର୍ଥନ ଉପାସନା ଓ ଲଳିତେନ୍ଦୁଙ୍କ ପାଖକୁ ଯିବ ବୋଲି ବିଜେପି ଆଶା ରଖିଛି ।

Comments

comments