ଶିଳ୍ପପତି ଭିଜି ସିଦ୍ଧାର୍ଥଙ୍କ ଜୀବନର ଅକୁହା କଥା । କାମ କରୁଥିଲେ କିନ୍ତୁ ଦରମା ବାବଦରେ ଟଙ୍କାଟିଏ ବି ନେଉନଥିଲେ ସିସିଡି ପ୍ରତିଷ୍ଠାତା ।
କନକ ବ୍ୟୁରୋ : ସିସିଡିର କୋଟିପତି ଶିଳ୍ପପତି ଭିଜି ସିଦ୍ଧାର୍ଥଙ୍କୁ ନେଇ ହେଉଥିବା ଆଶା ଆଶଙ୍କାରେ ଯବନିକା ପଡିବା ପରେ ତାଙ୍କୁ ନେଇ ଅନେକ ତଥ୍ୟ ସାମ୍ନାକୁ ଆସୁଛି । ଯେମିତି ସିସିଡିର ପ୍ରତିଷ୍ଠାତା ସିଦ୍ଧାର୍ଥ ଦୀର୍ଘ ବର୍ଷ ଧରି ଦରମା ବାବଦରେ ଟଙ୍କାଟିଏ ମଧ୍ୟ କମ୍ପାନୀଠାରୁ ନେଇନଥିଲେ । ଏପରିକି ତାଙ୍କ ପତ୍ନୀ କମ୍ପାନୀର କାର୍ଯ୍ୟକାରୀ ନିର୍ଦ୍ଦେଶିକା ମାଳବିକା ଏବଂ କେକେଆର ଇଣ୍ଡିଆ ସିଇଓ ସଂଜୟ ଓମପ୍ରକାଶ ନାୟର ମଧ୍ୟ କୌଣସି ଦରମା ନେଇନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ କାଫେ କଫି ଡେ’ ପ୍ରତିଷ୍ଠା କରିଥିବା କର୍ଣ୍ଣାଟକର ବ୍ୟବସାୟୀ ଭିଜି ସିଦ୍ଧାର୍ଥଙ୍କ ମୃତ ଦେହ ଉଦ୍ଧାର ହୋଇଛି । କିନ୍ତୁ ତାଙ୍କ ମୃତ୍ୟୁ ଅନେକ ପ୍ରଶ୍ନବାଚୀ ସୃଷ୍ଟି କରିଛି । ତାଙ୍କ ମୃତ୍ୟୁ ପୂର୍ବରୁ ମିଳିଥିବା ତାଙ୍କର ଶେଷ ଚିଠି ଅନୁଯାୟୀ ବିପରିତ ପରିସ୍ଥିତିର ମୁକାବିଲା କରିବାରେ ବିଫଳ ହୋଇ ଜୀବନ ହାରିଛନ୍ତି ଏହି ଶିଳ୍ପପତି । ନିଜର ବ୍ୟସାୟର ବିସ୍ତାର ପାଇଁ ସେ ନିଜର ସବୁକିଛି ବାଜି ଲଗାଇ ଦେଇଥିଲେ । ଏହାରି ମଧ୍ୟରେ ଏକ ତଥ୍ୟ ପଦାକୁ ଆସିଛି । ଗତ କିଛି ବର୍ଷ ହେଲା ପ୍ରତିଷ୍ଠାତା ଭିଜି ସିଦ୍ଧାର୍ଥ, କାର୍ଯ୍ୟକାରୀ ନିର୍ଦ୍ଦେଶକ ତାଙ୍କ ପତ୍ନୀ ମାଳବିକା ହେଗଡେ ଏବଂ ଅନ୍ୟାନ୍ୟ ନିର୍ଦ୍ଦେଶକ ମାନେ କମ୍ପାନୀଠାରୁ ଦରମା ବାବଦରେ ଟଙ୍କାଟିଏ ମଧ୍ୟ ନେଇନଥିଲେ ।
ଭିଜି ସିଦ୍ଧାର୍ଥ କମ୍ପାନୀର ପ୍ରମୋଟର ଭାବେ କାର୍ଯ୍ୟ କରୁଥିଲେ । ଏବଂ ୨୦୧୫-୧୬ ଓ ୨୦୧୭-୧୮ରିପୋର୍ଟ ଅନୁଯାୟୀ ସିଦ୍ଧାର୍ଥ କମ୍ପାନୀଠାରୁ ଟଙ୍କାଟିଏ ମଧ୍ୟ ନେଇନଥିଲେ । ଏହାସହ ତାଙ୍କ ପତ୍ନୀ ମାଳବିକା ହେଗଡେ ଓ କେକେଆର ଇଣ୍ଡିଆ ସିଇଓ ସଂଜୟ ଓମପ୍ରକାଶ ନାୟର ମଧ୍ୟ କୌଣସି ଦରମା ନେଇନାହାନ୍ତି । ସିଦ୍ଧାର୍ଥଙ୍କ ମୃତ୍ୟୁ ପୂର୍ବରୁ ତାଙ୍କର ଏକ କଥାକଥିତ ଚିଠି ସୋସିଆଲ ମିଡିଆରେ ଭାଇରାଲ ହୋଇଛି । ଯେଉଁଥିରେ ସେ ନିଜର ସମସ୍ତ ପ୍ରୟାସ ପରେ ବ୍ୟବସାୟକୁ ସଫଳ କରିପାରିନଥିବା ଉଲ୍ଲେଖ କରିଥିଲେ । ଏହି ଚିଠିରେ ସେ ଆୟକର ବିଭାଗର ଜଣେ ପୂର୍ବତନ ଅଧିକାରୀ ଓ ଜଣେ ନିବେଶକଙ୍କ ଦ୍ୱାରା ଚାପ ପ୍ରୟୋଗ କରାଯାଉଥିବା ଉଲ୍ଲେଖ କରିଥିଲେ ।
କର୍ଣ୍ଣାଟକ ଚିକମଙ୍ଗଲୁର ଜିଲ୍ଲାରେ ଜନ୍ମଗ୍ରହଣ କରିଥିବା ସିଦ୍ଧାର୍ଥ ମାଙ୍ଗାଲୁରୁ ବିଶ୍ୱବିଦ୍ୟାଳୟରୁ ଅର୍ଥନୀତିରେ ପୋଷ୍ଟ ଗ୍ରାଜୁଏସନ ଡିଗ୍ରୀ ହାସଲ କରିଥିଲେ । ପୂର୍ବତନ ବିଦେଶ ମନ୍ତ୍ରୀ ଏସଏମ କ୍ରୀଷ୍ଣାଙ୍କ ଝିଅ ମାଳବିକାଙ୍କୁ ବିବାହ କରିଥିଲେ ସିଦ୍ଧାର୍ଥ । ୧୯୯୬ରେ ବାଙ୍ଗାଲୁରରେ ପ୍ରଥମ ସିସିଡିର ପ୍ରତିଷ୍ଠା କରିଥିଲେ ସିଦ୍ଧାର୍ଥ । ଏହି କନସେପ୍ଟ ଯୁବପୀଢୀଙ୍କ ମଧ୍ୟରେ ବେଶ ଗ୍ରହଣୀୟ ହୋଇଛି । ସାରା ଭାରତରେ ପ୍ରାୟ ୧୭୫୦ଟି ସିସିଡି ସେଂଟର ରହିଛି ।