ଓଡିଆ କାର୍ଡ ଖେଳିଲେ ଧର୍ମେନ୍ଦ୍ର । ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ପ୍ରସଙ୍ଗରେ ପ୍ରଶ୍ନ, ସୁଯୋଗକୁ ହାତଛଡା କଲା କି ବିଜେଡି ?
କନକ ବ୍ୟୁରୋ: ରାଜ୍ୟସଭା ଉପାଧକ୍ଷ ନିର୍ବାଚନ ପରେ ବି ଥମୁନି ରାଜନୀତି । ବିଜେପି ସମର୍ଥିତ ଜେଡିୟୁ ପ୍ରାର୍ଥୀଙ୍କୁ ବିଜେଡିର ସମର୍ଥନ ପରେ ଚାଲିଛି ଥ୍ୟାଙ୍କ ୟୁ ରାଜନୀତି । ଦିଲ୍ଲୀରୁ ଫେରିବା ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରାଜ୍ୟସଭା ଉପସଭାପତି ନିର୍ବାଚନ ସମର୍ଥନ ନେଇ ବିଜେଡିକୁ କୃତଜ୍ଞତା ଦେବା ସହ ପରୋକ୍ଷରେ ସମାଲୋଚନା କରିଛନ୍ତି । ଧର୍ମେନ୍ଦ୍ର କହିଛନ୍ତି ଯେ, ରାଜ୍ୟସଭା ଉପାଧ୍ୟକ୍ଷ ପଦବୀ ଦୀର୍ଘ ୪୦ବର୍ଷ ଧରି କଂଗ୍ରେସ କବଜାରେ ଥିଲା । ଏହି ପଦବୀକୁ କଂଗ୍ରେସ ହାତରୁ ଛଡାଇ ଆଣିବା ବିଜେପିର ଦାୟିତ୍ୱ ଥିଲା । ବିଜେଡିର ନାଁ ନନେଇ ଧର୍ମେନ୍ଦ୍ର କହିଛନ୍ତିି ଯେଉଁ ବନ୍ଧୁମାନେ ଏନଡିଏକୁ ସମର୍ଥନ କରିଛନ୍ତି ସେମାନଙ୍କୁ କୃତଜ୍ଞତା ଜଣାଉଛି । କିଏ କାହାକୁ ସମର୍ଥନ କଲା କି ଅନୁରୋଧ କଲା ତାହା ଲୋକଙ୍କୁ ଜଣାଅଛି ।
Kanak News is now on WhatsApp
Join and get latest news updates delivered to you via WhatsApp
ଯେଉଁମାନେ କହୁଛନ୍ତି ଆମେ ବିଜେପିକୁ ସମର୍ଥନ କଲୁ ସେମାନେ ଓଡିଆ ପୁଅକୁ କାହିଁକି ରାଜ୍ୟସଭା ଉପାଧ୍ୟକ୍ଷ ପଦବୀ ପାଇଁ ପ୍ରାର୍ଥୀ କରାଇଲେ ନାହିଁ । ଓଡିଶାରୁ କେହି ବି ଏହି ପଦବୀ ପାଇପାରିଥାନ୍ତେ ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର । ହୁଏତ କିଛି ବାଧ୍ୟ ବାଧକତା ଥାଇପାରେ ବୋଲି ଅନୁଭବ ହେଉଛି, ନାଁ ନ ନେଇ ମଧ୍ୟ ବିଜେଡି ଆଡକୁ ପରୋକ୍ଷରେ ଅଙ୍ଗୁଳି କରି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ।
ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କୃତଜ୍ଞତା ବୟାନକୁ ବିଜେଡି ମଧ୍ୟ ମଧ୍ୟ ଜବାବ ରଖିଛି । ବିଜେଡି ମୁଖପାତ୍ର ସସ୍ମିତ ପାତ୍ର କହିଛନ୍ତି ଯେ, ଆମେ ଏନଡିଏକୁ ନୁହେଁ ବରଂ ଜେଡିୟୁକୁ ସମର୍ଥନ କରିଥିଲୁ । ଏବଂ ସ୍ପଷ୍ଟ କହିଥିଲୁ ବିଜେପି ଓ କଂଗ୍ରେସ ଠାରୁ ସମଦୂରତା ଆଭିମୁଖ୍ୟ ବଜାୟ ରଖିଛୁ । କେନ୍ଦ୍ରମନ୍ତ୍ରୀଙ୍କୁ ଧର୍ମେନ୍ଦ୍ରଙ୍କୁ ବୋଧ ହୁଏ ଜଣାନାହିଁ ଯେ, ଜୟପ୍ରକାଶ ନାରାୟଣଙ୍କ ଆନ୍ଦୋଳନରୁ ଜେଡିୟୁ ଏବଂ ବିଜେଡି ଆଞ୍ଚଳିକ ଦଳର ଆଭିମୂଖ୍ୟ ଏକ । ତେଣୁ ଏକ ଆଞ୍ଚଳିକର ପ୍ରାର୍ଥୀ ଏବେ ରାଜ୍ୟସଭା ଉପାଧ୍ୟକ୍ଷ ଆସନରେ ବସିଛନ୍ତି ତାହା ଖୁସିର ବିଷୟ । ଏବଂ ଜଣେ ଓଡିଆ ହିଁ ସେହି ନିର୍ବାଚନରେ ପ୍ରାର୍ଥୀ ହେବ ବୋଲି ତଥ୍ୟ କେଉଁଠୁ ପାଇଲେ କେନ୍ଦ୍ରମନ୍ତ୍ରୀ ବୋଲି ପ୍ରଶ୍ନ କରିଛି ବିଜେଡି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ହୁଏତ ନିରାଶା କି ହତାଶ ହୋଇ ଏଭଳି ଭ୍ରମାତ୍ମକ ବୟାନ ଦେଉଛନ୍ତି । ଗୋଟିଏ ପଟେ ପ୍ରଧାନମନ୍ତ୍ରୀ ମୋଦି ଫୋନ କରି ଧନ୍ୟବାଦ ଦେଉଛନ୍ତି ଅନ୍ୟପଟେ କେନ୍ଦ୍ରମନ୍ତ୍ରୀ ଗାଳି କରୁଛନ୍ତି ଏହା କି ପ୍ରକାର ମାନସିକତା? ସୌଜନ୍ୟତା ଭୂଲି ଯାଉଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବୋଲି ସମାଲୋଚନା କରିଛନ୍ତି ବିଜେଡି ମୁଖପାତ୍ର ସସ୍ମିତ ପାତ୍ର ।