ଏପ୍ରିଲ ୧୪ ପରେ ଆହୁରି ବଢିପାରେ ଲକଡାଉନ ଅବଧି । ବିଭିନ୍ନ ରାଜନୈତିକ ଦଳ ନେତାଙ୍କ ସହ ଆଲୋଚନା ପରେ ପ୍ରଧାନମନ୍ତ୍ରୀଙ୍କ ସଂକେତ, ୧୧ ତାରିଖରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ମୋଦି ।
କନକ ବ୍ୟୁରୋ : ଆସନ୍ତା ୧୪ ତାରିଖ ପରେ ବି ବଢିପାରେ ତାଲାବନ୍ଦ ଅବଧି । ଆଜି ବିଭିନ୍ନ ରାଜନୈତିକ ଦଳର ସଂସଦୀୟ ଦଳ ନେତାଙ୍କ ସହ ପ୍ରଧାନମନ୍ତ୍ରୀ ମୋଦି ଆଲୋଚନା କରିବାବେଳେ କିଛି ଏଭଳି ସଙ୍କେତ ଦେଇଛନ୍ତି । ବିଭିନ୍ନ ରାଜନୈତିକ ଦଳର ନେତା ତାଲାବନ୍ଦ ଅବଧି ବୃଦ୍ଧି କରିବା ସପକ୍ଷରେ ନିଜ ମତ ଦେଇଥିଲେ ଏବଂ ଅନୁରୋଧ ମଧ୍ୟ କରିଥିବା ଜଣାପଡିଛି । ଏସବୁ ଭିତରେ ଗତ ୨୪ଘଣ୍ଟା ମଧ୍ୟରେ ଭାରତରେ କରୋନା ସଂକ୍ରମଣ ଚିନ୍ତା ସୃଷ୍ଟି କଲାଭଳି ପରିସ୍ଥିତିରେ ପହଁଚିଛି । ଗତ ୨୪ ଘଂଟା ଭିତରେ ଦେଶରେ ୭୭୩ଜଣ ନୂଆ କରୋନା ଆକ୍ରନ୍ତ ଚିହ୍ନଟ ହୋଇଛନ୍ତି । ଆଉ ମୃତ୍ୟୁ ସଂଖ୍ୟା ୧୪୯ରେ ପହଁଚିଛି । ଏଣୁ ଏଭଳି ସ୍ଥିତିରେ ଲକଡାଉନ ଅବଧି ବଢିବା ନେଇ ଅନୁମାନ କରାଯାଉଛି । ଏନେଇ ଆସନ୍ତା ୧୧ ତାରିଖରେ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ପ୍ରଧାନମନ୍ତ୍ରୀ ଆଲୋଚନା କରିବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨୪ଘଣ୍ଟା ମଧ୍ୟରେ ଭାରତରେ ୭୭୩ଜଣ ନୂଆ କରୋନା ଆକ୍ରନ୍ତ ଚିହ୍ନଟ ହୋଇଥିବା ବେଳେ ଲକଡାଉନ ଅବଧି ବଢିବାର ସମ୍ଭାବନା ଆହୁରୀ ବଢିଯାଇଛି । ସଂକ୍ରମଣକୁ ନିୟନ୍ତ୍ରଣକୁ ଆଣିବା ପାଇଁ ବର୍ତମାନ ସରକାରଙ୍କ ଆଗରେ ଏହାହିଁ ଏକମାତ୍ର ବାଟ ବୋଲି କୁହାଯାଉଛି । ରାଷ୍ଟ୍ରପତି, ବିରୋଧୀ ଦଳର ନେତା ଓ ମୁଖ୍ୟମନ୍ତ୍ରୀ ମାନଙ୍କ ସହ ଆଲୋଚନା ପରେ ସଂସଦରେ ବିଭିନ୍ନ ଦଳର ନେତାଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଲୋକସଭା ଓ ରାଜ୍ୟସଭାକୁ ମିଶାଇ ୫ ଜଣରୁ ଅଧିକ ସଦସ୍ୟ ଥିବା ପାର୍ଟିର ସଂସଦୀୟ ଦଳ ନେତାମାନଙ୍କ ସହ ମୋଦି ଆଲୋଚନା କରିଛନ୍ତି । ଭିଡିଓ କନଫରେନ୍ସିଂ ଜରିଆରେ ଆଲୋଚନା କରି କରୋନା ମୁକାବିଲାର ବିଭିନ୍ନ ଦିଗ ବାବଦରେ ପଚାରି ବୁଝିଛନ୍ତି ।
ମାର୍ଚ୍ଚ ୨୫ ତାରିଖରେ ୨୧ ଦିନିଆ ଲକଡାଉନ ପାଇଁ ଘୋଷଣା କରିଥିଲେ ପ୍ରଧାନମନ୍ତ୍ରୀ । ସାରା ଦେଶରେ ତାଲାବନ୍ଦକୁ ୧୫ ଦିନ ବିତି ଯାଇଥିବାବେଳେ ବିଭିନ୍ନ ରାଜନୈତିକ ଦଳର ନେତାଙ୍କ ସହ ମୋଦିଙ୍କ ଆଲୋଚନାକୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି । ଦେଶରେ ତାଲାବନ୍ଦର ଅବଧି ଦୃଦ୍ଧି ହୋଇପାରେ ବୋଲି ଆକଳନ କରାଯାଉଛି । ବିଶ୍ୱ ମହାମାରୀ କରୋନାର ମୁକାବିଲା ପାଇଁ ମିଳିତ ପ୍ରୟାସ ଉପରେ ଗୁରୁତ୍ୱ ଦେଉଛନ୍ତି ସରକାର । ସେଥିପାଇଁ ବିରୋଧୀଙ୍କୁ ବିଶ୍ୱାସକୁ ନେଇ ଆଗାମୀ ପଦକ୍ଷେପ ସ୍ଥିର କରିବାକୁ ଚାହୁଁଛନ୍ତି । କାରଣ ତାଲାବନ୍ଦ ଫଳରେ ବେରୋଜଗାର ବୃଦ୍ଧି ଏବଂ କରୋନା କନସୋଲିଡେଟେଡ ଫଣ୍ଡ ପାଇଁ ସାଂସଦ ପାଣ୍ଠିକୁ ବାତିଲ ନିଷ୍ପତି ବିରୋଧରେ ଅସନ୍ତୋଷ ଜାହିର କରିସାରିଛି କଂଗ୍ରେସ । ତେଣୁ ସରକାର ୧୪ ତାରିଖ ପରେ ଲକଡାଉନ ଅବଧିକୁ ବୃଦ୍ଧି କଲେ ମଧ୍ୟ ବିରୋଧୀଙ୍କ ସମ୍ମତିରେ କରିବାକୁ ଚାହୁଁଛନ୍ତି ।
କୁହାଯାଉଛି ଏପ୍ରିଲ ୧୪ ପରେ ମଧ୍ୟ ଦେଶରେ ଲକଡାଉନ ଜାରି ରଖିବାକୁ ବିଭିନ୍ନ ରାଜ୍ୟ ସରକାର କେନ୍ଦ୍ରକୁ ପ୍ରସ୍ତାବ ଦେଇଛନ୍ତି । ବର୍ତମାନ ସ୍ଥିତିରେ କରୋନା ସଂକ୍ରମଣକୁ ରୋକିବା ପାଇଁ ଏହା ଏକମାତ୍ର ଉପାୟ ବୋଲି ବିଚାର କରାଯାଉଛିି । ତେଣୁ ପର୍ଯ୍ୟାୟ କ୍ରମେ ଦେଶରୁ ଉଠିପାରେ ଲକଡାଉନ୍ । ଏହାରି ଭିତରେ କେମିତି ହଟିବ ତାଲାବନ୍ଦ, ତାକୁ ନେଇ କେରଳର ଏକ ୧୭ ଜଣିଆ ବିଶେଷଜ୍ଞ କମିଟି ପ୍ରସ୍ତାବ ଦେଇଛି । ମୁଖ୍ୟମନ୍ତ୍ରୀ ପନିରାୟୀ ବିଜୟନ ଏହାକୁ କେନ୍ଦ୍ର ସରକାରଙ୍କ ପାଖକୁ ପଠାଇବେ ବୋଲି କହିଛନ୍ତି । ଏହି ପ୍ରସ୍ତାବ ଅନୁସାରେ ତିନିଟି ପର୍ଯ୍ୟାୟରେ ହଟାଯାଇ ପରିବ ଲକଡାଉନ୍ ।
ପ୍ରଥମ ପର୍ଯ୍ୟାୟ
– ଏପ୍ରିଲ ୭ ତାରିଖ ପରେ ଯେଉଁ ଜିଲ୍ଲାରେ ଗୋଟିଏ ବି କରୋନ ଆକ୍ରାନ୍ତ ମାମଲା ଆସିନଥିବ
– ଘରେ ସଂଗରୋଧରେ ୧୦ ପ୍ରତିଶତରୁ ଅଧିକ କରୋନା ସଂକ୍ରମିତ ନଥିବେ
– ଏପ୍ରିଲ ୭ରୁ ୧୫ ତାରିଖ ଭିତରେ କୌଣସି ହଟସ୍ପଟ ଚିହ୍ନଟ ହୋଇନଥିଲେ ସେହି ଜିଲ୍ଲାରେ ତାଲାବନ୍ଦ ହଟିବ
ଦ୍ୱିତୀୟ ପର୍ଯ୍ୟାୟ
– ୧୫ ଦିନ ମଧ୍ୟରେ କୌଣସି ନୂଆ କରୋନା ଆକ୍ରାନ୍ତ ଚିହ୍ନଟ ହୋଇନଥିଲେ ଏହି ପର୍ଯ୍ୟାୟରେ ତାଲାବନ୍ଦ ହଟିବ
– ଏହି ପର୍ଯ୍ୟାୟରେ ବସ, ଅଟୋ, ଟ୍ୟାକ୍ସି ଆଦିର ନିୟନ୍ତ୍ରିତ ଚଳାଚଳ ପାଇଁ ଅନୁମତି ଦେବା ସହିତ ଏମଜିନରେଗା କାମ ଆରମ୍ଭ କରାଯାଇ ପରେ
ତୃତୀୟ ପର୍ଯ୍ୟାୟ
– ୧୫ ଦିନରେ କୌଣସି ନୂଆ ମାମଲା ନଆସିବା ସହିତ ୫ ପ୍ରତିଶତରୁ କମ୍ ସଂଗରୋଧରେ ରହିଥିବେ
– ଏହି ସମୟରେ ଜିଲ୍ଲା-ଜିଲ୍ଲା ମଧ୍ୟରେ ବସ ଚଳାଚଳ ଓ ଜରୁରୀ ସାମଗ୍ରୀ ପରିବହନ ପାଇଁ ଘରୋଇ ବିମାନ ଚଳାଚଳ ପାଇଁ ମଧ୍ୟ ଅନୁମତି ଦିଆଯିବ