ବାଲାଂଦେଶକୁ ମାତ୍ ଦେଇ ସେମିଫାଇନାଲରେ ଟିମ୍ ଇଣ୍ଡିଆ! ଜୁନିୟର ବିଶ୍ୱକପ ଫାଇନାଲ ଟିକେଟ ପାଇଁ ପାକିସ୍ତାନ ସହ ହେବ ଲଢେଇ
କ୍ୱାର୍ଟର ଫାଇନାଲରେ ବାଲାଂଦେଶକୁ ମାତ ଦେଇ ୧୯ ବର୍ଷରୁ କମ ଜୁନିୟର ବିଶ୍ୱକପ ସେମିଫାଇନାଲରେ ପହଞ୍ଚିଲା ଟିମ୍ ଇଣ୍ଡିଆ । ଚତୁର୍ଥ ତଥା ଶେଷ କ୍ୱାର୍ଟର ଫାଇନାଲରେ ୧୩୧ ରନରେ ବାଲାଂଦେଶକୁ ପରାସ୍ତ କରିଛି ଭାରତ । ଏହାସହ ୭ ଥର ପାଇଁ ସେମିଫାଇନାଲରେ ନିଜ ସ୍ଥାନ ପକ୍କା କରିଛି ଭାରତ । ସେମିଫାଇନାଲ ମୁକାବିଲାରେ ପାକିସ୍ତାନକୁ ଭେଟିବ ଟିମ୍ ଇଣ୍ଡିଆ । ଏହି ହାଇଭୋଲଟେଜ ମୁକାବିଲା ଜାନୁୟାରୀ ୩୦ରେ ହେବ । ଫାଇନାଲ ଟିକେଟ ହାତେଇବା ପାଇଁ ଉଭୟ ଭାରତ-ପାକିସ୍ତାନ ମଧ୍ୟରେ ହେବ ଜବରଦସ୍ତ ମୁକାବିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ କୁଇନ୍ସଟାଉନରେ ଖେଲାଯାଇଥିବା କ୍ୱାର୍ଟର ଫାଇନାଲ ମ୍ୟାଚରେ ଭାରତ ପ୍ରଥମେ ବ୍ୟାଟିଂ କରି ଶୁଭମ ଗିଲଙ୍କ ଧୂଆଁଧାର ୮୬ ଓ ଅଭିଷେକ ଶର୍ମାଙ୍କ ଦମଦାର ୫୦ ରନ ବଳରେ ୨୬୫ ରନ କରିଥିଲା । ୨୬୬ ରନର ବିଜୟ ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିବା ବାଲଂଦେଶ ଦଳ ଭାରତୀୟ ବୋଲରଙ୍କ ମାପଚୁପ ବୋଲିଂ ଆଗରେ ମୁଣ୍ଡ ନୁଆଇଁଥିଲେ । ବାଲାଂଦେଶର କୌଣସି ବ୍ୟାଟସମ୍ୟାନ କ୍ରିଜରେ ବେଶି ସମୟ ତିଷ୍ଠି ପାରିନଥିଲେ । ଯାହାର ଫାଇଦା ଉଠାଇଥିଲା ଭାରତ । ୪୨.୧ ଓଭରରେ ୧୩୪ ରନରେ ବାଲାଂଦେଶକୁ ଅଲଆଉଟ କରି ୧୩୧ ରନରେ ବିଜୟ ହାସଲ କରି ସେମିଫାଇନାଲ ଟିକେଟ ହାସଲ କରିଥିଲା । ଭାରତ ପକ୍ଷରୁ କମଲେସ ନାଗରକୋଟି ତିନି ୱିକେଟ ପାଇଥିବା ବେଳେ ଅଭିଷେକ ଓ ଶିବମ ମାବି ଦୂୁଇଟି ଲେଖାଏଁ ୱିକେଟ ନେଇ ବାଲାଂଦେଶକୁ ପରାଜୟର ରାସ୍ତା ଦେଖାଇଥିଲେ ।
ଏଠାରେ ସୂଚନାଯୋଗ୍ୟ ଯେ, ଜୁନିୟର ବିଶ୍ୱକପର ପ୍ରଥମ ସେମିଫାଇନାଲ ମୁକାବିଲାରେ ଅଷ୍ଟ୍ରେଲିଆ-ଆଫଗାନିସ୍ତାନ ପରସ୍ପରକୁ ଭେଟିବେ । ସେହିଭଳି ଦ୍ୱିତୀୟ ସେମିଫାଇନାଲ ମୁକାବିଲାରେ ଚିର ପ୍ରତିଦ୍ୱନ୍ଦୀ ଭାରତ-ପାକିସ୍ତାନ ପରସ୍ପରକୁ ଭେଟିବେ । ଏହି ହାଇଭୋଲଟେଜ ମ୍ୟାଚଟି ଜାନୁଆରୀ ୩୦ରେ ଖ୍ରୀଷ୍ଟଚର୍ଚ୍ଚରେ ଖେଳାଯିବ ।