କ୍ଷୁବ୍ଧ ଉମା ମୋଦିଙ୍କ ନିଷ୍ପତ୍ତି ବିରୋଧରେ ଗର୍ଜିଲେ : ମୋ ଠାରୁ ଗଂଗାକୁ କେହି ଛଡ଼ାଇ ନେଇପାରିବେ ନାହିଁ
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କେନ୍ଦ୍ର ମନ୍ତ୍ରିମଣ୍ଡଳ ଅଦଳବଦଳରେ ଗଂଗା ସଫେଇ ମନ୍ତ୍ରାଳୟରୁ ବାଦ ପଡ଼ିଥିବା ମନ୍ତ୍ରୀ ଉମା ଭାରତୀ ଆଜି ତାଙ୍କର ଅସନ୍ତୋଷ ଜାହିର କରିଛନ୍ତି । ତାଙ୍କର ବିଭାଗ ପରିବର୍ତ୍ତନକୁ ବିରୋଧ କରି ଉମା ଆଜି ଏ ବାବଦରେ ତାଙ୍କର ମତ ରଖି କହିଛନ୍ତି ଯେ ଗଂଗା ସଫେଇ ମନ୍ତ୍ରାଳୟର ଦାୟିତ୍ୱ ଗ୍ରହଣ କରିବା ପରେ ଅନେକ ପ୍ରକଳ୍ପକୁ ସେ ସଫଳତାର ସହ କାର୍ଯ୍ୟକାରୀ କରାଇଛନ୍ତି । ଗଂଗା ନଦୀର ବିକାଶ ପାଇଁ କାର୍ଯ୍ୟ କରିବାରୁ ତାଙ୍କୁ କେହି ହଟାଇ ପାରିବେ ନାହିଁ ଏବଂ ପବିତ୍ର ଗଂଗା ତଟରେ ସେ ପଦଯାତ୍ରା ଆରମ୍ଭ କରିବେ ବୋଲି ଉମା କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ମାସରୁ ଗଂଗା ସୁରକ୍ଷା ପାଇଁ ସେ ତାଙ୍କର ଅଭିଯାନ ଆରମ୍ଭ କରିବେ ବୋଲି ଉମା ସ୍ପଷ୍ଟ କରିଛନ୍ତି । ଉମାଙ୍କ ନିକଟରେ ପୂର୍ବରୁ ରହିଥିବା ଗଂଗା ସଫେଇ ମନ୍ତ୍ରାଳୟ ଏବେ ନୀତୁନ ଗଡ଼କରୀଙ୍କୁ ମିଳିଛି। ଉମା କହିଛନ୍ତି ଯେ ଯଦି ସେ ଗଂଗା ସଫେଇ କାର୍ଯ୍ୟରେ ବିଫଳ ହୋଇଛନ୍ତି ତା’ହେଲେ ଗଡ଼କରୀ କିଭଳି ଏହାକୁ ସଫଳ କରିପାରିବେ । ସେ ଗଡ଼କରୀଙ୍କ ସହିତ ମିଳିତ ଭାବେ ଏବଂ ତାଙ୍କର ପରାମର୍ଶ ନେଇ ଗଂଗା ସଫେଇ ଅଭିଯାନ କାର୍ୟ୍ୟକାରୀ କରୁଥିଲେ ବୋଲି ଉମା କହିଛନ୍ତି ।
ପଶ୍ଚିମ ବଙ୍ଗର ଗଂଗାସାଗର ତଟରୁ ସେ ଅକ୍ଟୋବରରୁ ପଦଯାତ୍ରା ଆରମ୍ଭ କରିବେ ଏବଂ ଏହା ସରକାରଙ୍କ ବିରୋଧରେ କୌଣସି ପଦକ୍ଷେପ ହେବନାହିଁ ବୋଲି ସେ କହିଛନ୍ତି । ଏ ସଂପର୍କରେ ମୁଁ ବର୍ଷେ ତଳୁ ଘୋଷଣା କରିସାରିଛି ଏବଂ ଏ ବାବଦରେ ପ୍ରଧାନମନ୍ତ୍ରୀଙ୍କୁ ମଧ୍ୟ ଅବଗତ କରାଇଛି ବୋଲି ଉମା କହିଛନ୍ତି ।