କୁମ୍ଭୀର-ମଣିଷ ମୁହାଁମୁହିଁ । କେନାଲ ଭିତରେ କୁମ୍ଭୀର କବଳରୁ ମହିଳାଙ୍କୁ ବଞ୍ଚାଇଲେ ମାଛ ଧରାଳି । ଅଣ୍ଟାଏ ପାଣିରେ କୁମ୍ଭୀର ସହ ଲଢ଼ିଲେ ୨ ମହିଳା
କନକ ବ୍ୟୁରୋ: ପାଣି ଭିତରେ କୁମ୍ଭୀର କବଳରୁ ବାନ୍ଧବୀଙ୍କୁ ବଂଚାଇଲେ ଦୁଇ ମାଛ ଧରାଳି ମହିଳା । ଦୁଇ ମହିଳାଙ୍କ ସାହସିକତା ପାଇଁ ଅଳ୍ପକେ ବଂଚିଯାଇଛି କେନ୍ଦ୍ରାପଡା ଜିଲ୍ଳା ବତୀଘର ପଂଚାୟତ ବରକୋଲିଖୋଲ ଗାଁର ମାନି ଧଉଡିଆଙ୍କ ଜୀବନ । ପାଣି ଭିତରେ କୁମ୍ଭୀର ସହ ଲଢ଼ି ମାନିଙ୍କ ଜୀବନକୁ ବଂଚାଇଛନ୍ତି ସେହି ଗାଁର ବାସନ୍ତି ଜେନା ଓ କାଂଚନ ପ୍ରଧାନ ।
Kanak News is now on WhatsApp
Join and get latest news updates delivered to you via WhatsApp
କହିବା ଅନୁଯାୟୀ ସଂରକ୍ଷିତ ଅଭୟାରଣ୍ୟ ନିକଟସ୍ଥ ଖରିନାସୀ କେନାଲରେ ମାଛ ଧରୁଥିବାବେଳେ ଅଚାନକ ଏକ ୭ଫୁଟ ଲମ୍ବର କୁମ୍ଭୀର ମାନିଙ୍କୁ ମାଡି ବସିଥିଲା ଓ ପାଣି ଭିତରକୁ ଟାଣି ନେଇଥିଲା । ଏହି ସମୟରେ ନିକଟରେ ମାଛ ଧରୁଥିବା ବାସନ୍ତି ଓ କାଂଚନ ଅଂଟାଏ ପାଣି ଭିତରେ କୁମ୍ଭୀର ସହ ଲଢ଼େଇ କରିଥିଲେ । ନିଜ ପାଖରେ ଥିବା ଷ୍ଟିଲ ବାସନରେ କୁମ୍ଭୀରର ମୁହଁକୁ ବାରମ୍ବାର ଆକ୍ରମଣ କରିଥିଲେ ।
ତାପରେ କୁମ୍ଭୀରଟି ଭୟରେ ମାନିଙ୍କୁ ଛାଡି ଚାଲିଯାଇଥିଲା । ଆଉ ବଂଚିଯାଇଥିଲେ ମାନି । ହେଲେ କୁମ୍ଭୀର କାମୁଡାରେ ଲହୁ ଲୁହାଣ ହୋଇଥିଲେ ମାନି । ତାଙ୍କୁ ନିକଟସ୍ଥ ହସ୍ପିଟାଲରେ ଭର୍ତି କରାଯାଇଥିଲା । ତାଙ୍କ ଦେହରେ ୫୮ଟି ଷ୍ଟିଚ୍ ପଡିଥିବା ଜଣାପଡିଛି । ତେବେ ଦୁଇ ମହିଳାଙ୍କ ସାହାସିକତା ପାଇଁ ସବୁଆଡୁ ପ୍ରଶଂସା କରାଯାଇଛି । ଭିତରକନିକାର ଆଖପାଖ ଅଂଚଳରେ ଏହିଭଳି କୁମ୍ଭୀର ଆକ୍ରମଣ ବାରମ୍ବାର ଘଟୁଛି ।