କନକ ବ୍ୟୁରୋ : ଭଡ଼ା ବାହାନା ଡାକି ଉବର ଡ୍ରାଇଭରଙ୍କୁ ଡାକିଲେ ଏବଂ କାର ଲୁଟ୍ କରି ଚମ୍ପଟ୍ ହୋଇଗଲେ ଦୁଇ ଦୁର୍ବୃତ୍ତ । ଏଭଳି ଏକ ଘଟଣା ଘଟିଛି ରାଜଧାନୀ ଭୁବନେଶ୍ୱରରେ । ଦୁର୍ବୃତଙ୍କ ଆକ୍ରମଣର ଶିକାର ହୋଇଥିବା ଡ୍ରାଇଭର ଏବେ ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ବେଳେ କାର ନେଇ ଫେରାର୍ ହୋଇଯାଇଥିବା ଦୁର୍ବୃତ୍ତଙ୍କୁ ଖୋଜୁଛି କମିଶନରେଟ୍ ପୁଲିସ ।
Kanak News is now on WhatsApp
Join and get latest news updates delivered to you via WhatsApp
ଉବର ଅଫିସରୁ କଲ ପାଇ, ପ୍ରାୟ ଭୋର୍ ୪ଟା ବେଳେ ଖଣ୍ଡଗିରି ଅଂଚଳ ପହଂଚିଥିଲେ ଗାଡି ଡ୍ରାଇଭର ତଥା ମାଲିକ ବନେଶ ମହାକୁଡ଼ । ହେଲେ ସେଠାରେ କାହାରିକୁ ନପାଇ, ଉବର ବୁକ୍ କରିଥିବା ନମ୍ବରରେ ଫୋନ୍ କରିଥିଲେ । ଆଉ ଅଚାନକ ଏକ ସ୍କୁଟିରେ ଉବର ଡ୍ରାଇଭରଙ୍କ ପାଖରେ ପହଂଚିଥିଲେ ଦୁଇ ଜଣ ବ୍ୟକ୍ତି । ଡ୍ରାଇଭର ଉମେଶଙ୍କ ପାଖକୁ ଯାଇ ଅତର୍କିତ ଭାବରେ ଜଣେ ଭୁଜାଲିରେ ହାଣି ପକାଇଥିଲେ । ଭୁଜାଲି ମାଡ଼ରେ ବନେଶ ଛଟପଟ ହେଉଥିବା ବେଳେ ଜଣେ କାର୍ ନେଇ ଚମ୍ପଟ୍ ମାରି ଦେଲା ଏବଂ ଆଉ ଜଣେ ସ୍କୁଟିରେ ଦେଖୁ ଦେଖୁ ଉଭାନ୍ ହୋଇଗଲା ।
ଶୁନଶାନ୍ ରାସ୍ତାରେ ଡ୍ରାଇଭରକୁ ଏକୁଟିଆ ପାଇ, ନିଜ ପୂର୍ବ ନିର୍ଦ୍ଧାରିତ ଯୋଜନାକୁ ଚୁଡାନ୍ତ ରୁପ ଦେଇ ଫେରାର୍ ହୋଇଯାଇଥିଲେ ଦୁଇ ଦୁର୍ବୃତ୍ତ । ଆଉ ବେଶ କିଛି ସମୟ ଧରି ରାସ୍ତାକଡ଼ରେ ଛଟପଟ ହେଉଥିବା ବନେଶଙ୍କ ଉପରେ ପଡ଼ିଥିଲା, ମଣ୍ଣିଂ ୱାକରେ ଯାଉଥିବା ଲୋକମାନଙ୍କ ନଜର । ଏବେ ଏକ ଘରୋଇ ହସ୍ପିଟାଲରେ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି ଉବର ଡ୍ରାଇଭର ବନେଶ ମହାକୁଡ଼ । ତାଙ୍କ ଜଙ୍ଘରେ ଗୁରୁତର ଭାବେ ଆଘାତ ଲାଗିଛି । ଏପଟେ ଦୃର୍ବୃତଙ୍କୁ ଧରିବା ପାଇଁ ଜାଲ ବିଛାଇଛି କମିଶନରେଟ୍ ପୋଲିସ ।
ଗୋଟିଏ ଫୋନ୍ କଲରେ ଆପଣ ଅତି ଆରାମରେ ଓଲା-ଉବର ଭଳି କ୍ୟାପରୁ ଗାଡ଼ି ପାଇଯାଉଛନ୍ତି । ହେଲେ କିଛି ଛଦ୍ମବେଶୀ ଗ୍ରାହକଙ୍କ ପାଇଁ ବେଳେବେଳେ ଡ୍ରାଇଭରଙ୍କ ଜୀବନ ବାଜି ଲାଗିଯାଉଛି । ଭୁବନେଶ୍ୱରର ଏହି ଘଟଣା ଯାହାର ଏକ ବଡ ଉଦାହରଣ । ବଡ କଥା ହେଉଛି- ଦୁର୍ବୃତ୍ତମାନେ ଲୋକଙ୍କୁ ହାଣି ଗାଡ଼ି ଛଡ଼ାଇ ନେବା ଘଟଣା ଭୁବନେଶ୍ୱରରେ ନୂଆ ନୁହେଁ । ପୂର୍ବରୁ ଏଭଳି ସମାନ୍ ଢ଼ଙ୍ଗରେ କାର୍ ଏବଂ ବାଇକ୍ ଛଡ଼ାଇ ନେବାର ଅନେକ ଉଦହାରଣ ମଧ୍ୟ ରହିଛି ।