ହାଇଟେକ୍ ମେଡିକାଲ୍ କଲେଜରେ ଦଲାଲ୍ ! ସିଟ୍ କରାଇ ଦେବାକୁ କହି ଅଭିଭାବକଙ୍କ ଠାରୁ ଠକି ନେଲେ ୧୫ଲକ୍ଷ ଟଙ୍କା
ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ଡାକ୍ତର କରାଇ ଦେବାକୁ କହି ଲୁଟ୍ । ଘରୋଇ କଲେଜରେ ଏମବିବିଏସ୍ ଆଡମିଶନ୍ ପୂର୍ବରୁ ଦଲାଲ୍ ଲୁଟି ନେଲେ ୧୫ ଲକ୍ଷ ଟଙ୍କା । ଏମିତି ଏକ ଚାଂଚଲ୍ୟକର ଘଟଣା ସାମ୍ନାକୁ ଆସିଛି ଭୁବନେଶ୍ୱରରୁ । ଜଣେ ଅଭିଭାବକଙ୍କୁ ଠକେଇର ଚକ୍ରବ୍ୟୁହରେ ପକାଇ ଚମ୍ପଟ୍ ମାରିଛନ୍ତି ଦୁଇ ଦଲାଲ୍ । ହାଇଟେକ୍ ମେଡିକାଲ୍ କଲେଜ୍ କ୍ୟାମ୍ପସରେ ରଚା ଯାଇଥିଲା ଏହି ଠକେଇର ପ୍ଲାନ୍ । ।
Kanak News is now on WhatsApp
Join and get latest news updates delivered to you via WhatsApp
ନ୍ୟାସନାଲ୍ ଏଲିଜିବିଲିଟି ଟେଷ୍ଟରେ ରାଙ୍କ୍ କମ୍ ଆସିବାରୁ ପୁଅ ପାଇଁ ମେଡିକାଲ ସିଟ୍ ଯୋଗାଡ କରିବାକୁ ଶିବ ଶେଖର ମିଶ୍ର ପହଂଚିଥିଲେ ହାଇଟେକ୍ ମେଡିକାଲ୍ କଲେଜରେ । ଆଉ ସେଠାରେ ଦେଖା ହୋଇଥିଲେ ବିବେକ ଓ ବିକାଶ । ଏହି ଦୁଇ ଦଲାଲ୍ କଲେଜରେ ମ୍ୟାନେଜମେଂଟ କୋଟାରେ ସିଟ୍ କରାଇଦେବାକୁ ଶିବଙ୍କୁ କହିଲେ । କ୍ୟାମ୍ପସ୍ ଭିତରେ ଦେଖା ହୋଇଥିବାରୁ ସନ୍ଦେହ କରିବାର ଫୁରସତ୍ ପାଇ ନଥିଲେ ଶିବଶେଖର ।
ପୁଅକୁ ସିଟ୍ ମିଳିବ । ତେଣୁ ବି ବ୍ରଦର୍ସଙ୍କ କହିବା ମୁତାବକ ବିନା ରସିଦରେ ୧୦ଲକ୍ଷ ଟଙ୍କା ଓ ରସିଦରେ ୫ ଲକ୍ଷ ୨୫ ହଜାର ଟଙ୍କା ଦେଲେ ଶିବ । ସେତେବେଳକୁ ଲୁଟର ଜାଲ ବିଛାଇ ସାରିଥିଲେ ବି ବ୍ରଦର୍ସ । ଯେମିତି ସନ୍ଦେହ ନହେବ, ସେଥିପାଇଁ ୫ ଲକ୍ଷ ୨୫ହଜାର ଟଙ୍କର ରସିଦ୍ ମଧ୍ୟ ଦେଲେ ହାଇଟେକ୍ କଲେଜ ପ୍ୟାଡରେ । ଶିବ ଭାବିଲେ ପୁଅର ଆଡମିଶନ୍ ହୋଇଗଲା ।
କିଛି ଦିନ ପରେ ପୁଅକୁ ଧରି ଶିବ ପହଂଚିଲେ କଲେଜରେ । ହେଲେ କଲେଜ କର୍ତ୍ତୃପକ୍ଷ କହିଥିଲେ ଟଙ୍କା ନେଇନୁ କି ଏ ରସିଦ୍ ଆମର ନୁହେଁ । ତା ପରେ ଶିବ କଲ୍ କରିବା ବେଳକୁ ବି ବ୍ରଦର୍ସ ଫୋନ୍ ସୁଇଚ୍ ଅଫ୍ କରି ଫେରାର୍ ।
କ୍ୟାମ୍ପସ୍ ଭିତରୁ ଆରମ୍ଭ ଆଉ କ୍ୟାମ୍ପସ୍ ଭିତରେ ସରଗଲା । ୧୫ଲକ୍ଷର ଚୁୁନା ଲଗାଇ ଫେରାର୍ ହୋଇଗଲେ ବିକାଶ ଓ ବିବେକ୍ । ଆଉ ପୁଅକୁ ମେଡିକାଲ୍ ପାଠ ପଢାଇବାର ସ୍ୱପ୍ନ ଦେଖିଥିବା ଶିବ ଏବେ ଟଙ୍କା ଫେରି ପାଇବାକୁ ଚକ୍କର ମାରୁଛନ୍ତି ଥାନାରେ ।