୧୪ର ପୁନରାବୃତ୍ତି ୧୯ରେ । ସଂଖ୍ୟା ସମାନ ରହିଲା, ଚେହେରା ବଦଳିଲା । ମୋଦିଙ୍କ ମନ୍ତ୍ରିମଣ୍ଡଳରେ ସ୍ଥାନ ପାଇଲେ ୨ ଓଡିଆ
କନକ ବ୍ୟୁରୋ : ୧୪ର ପୁନରାବୃତ୍ତି ୧୯ରେ । ୨୦୧୪ ଭଳି ୨୦୧୯ରେ ମଧ୍ୟ ମୋଦିଙ୍କ ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି ୨ ଓଡିଆ । ସଂଖ୍ୟା ସମାନ ରହିଥିଲେ ମଧ୍ୟ ବଦଳିଛି ଚେହେରା । ଜଣେ ଲୋକସଭା ସାଂସଦ ଓ ଅନ୍ୟ ଜଣେ ରାଜ୍ୟସଭା ସାଂସଦ । ଆଜି ନୂଆ ମନ୍ତ୍ରିମଣ୍ଡଳ ସହ ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ମୋଦି । ଆଉ ମୋଦିଙ୍କ ଏହି ନୂଆ ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି ଦୁଇ ଓଡିଆ । ପ୍ରଥମ ଥର ବାଲେଶ୍ୱର ଲୋକସଭା ଆସନରୁ ସାଂସଦ ହୋଇଥିବା ପ୍ରତାପ ଷଡଙ୍ଗୀ ଓ ମଧ୍ୟପ୍ରଦେଶରୁ ରାଜ୍ୟସଭା ସାଂସଦ ଥିବା ଧର୍ମେନ୍ଦ୍ର ପ୍ରଧାନଙ୍କୁ ନିଜ ମନ୍ତ୍ରିମଣ୍ଡଳରେ ସାମିଲ କରିଛନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
ମୋଦିଙ୍କ ପ୍ରଥମ ପାଳିରେ ମନ୍ତ୍ରୀ ଥିବା ଧର୍ମେନ୍ଦ୍ରଙ୍କୁ ପୁଣିଥରେ ମନ୍ତ୍ରିମଣ୍ଡଳରେ ରିପିଟ୍ କରାଯାଇଥିବା ବେଳେ ନୂଆ ଚେହେରା ଭାବେ ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀଙ୍କୁ ମନ୍ତ୍ରିମଣ୍ଡଳରେ ରାଷ୍ଟ୍ରମନ୍ତ୍ରୀ ଭାବେ ସାମିଲ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି ନମୋ । ତେବେ ଗତ ଥର ଭଳି ଚଳିତ ଥର ମଧ୍ୟ ଓଡିଶା କୋଟାରେ ପଡିଛି ମାତ୍ର ଗୋଟିଏ ମନ୍ତ୍ରୀ ଆସନ । ଗତ ଥର ଅପେକ୍ଷା ଚଳିତ ଥର ରାଜ୍ୟରେ ବିଜେପି ଅତି ଭଲ ପ୍ରଦର୍ଶନ କରିଥିଲେ ମଧ୍ୟ ରାଜ୍ୟକୁ ଗୋଟିଏ ମନ୍ତ୍ରୀପଦରେ ସନ୍ତୁଷ୍ଟ ହେବାକୁ ପଡିଛି । ଯାହା ରାଜ୍ୟ ବିଜେପି ଶିବିରରେ ଟିକିଏ ନିରାଶା ଖେଳାଇ ଦେଇଛି ।
୨୦୧୪ରେ ନିର୍ବାଚନରେ ପୂରା ଦେଶରେ ମୋଦି ହାୱା ଚାଲିଥିବା ବେଳେ ଓଡିଶାରେ ଏହାର ପ୍ରଭାବ ପଡିନଥିଲା । ନବୀନଙ୍କ ଲୋକପ୍ରିୟତା ଆଗରେ ଫିକା ପଡି ଯାଇଥିଲା ମୋଦି ହାୱା । ୨୧ ଲୋକସଭା ଆସନରୁ ୨୦ଟିରେ ବିଜେଡି ବିଜୟ ବାନା ଉଡାଇଥିଲା । ତେବେ ନବୀନଙ୍କ ଲୋକପ୍ରିୟତାକୁ ମାତ୍ ଦେଇ ମାତ୍ର ଗୋଟିଏ ଆସନ ସୁନ୍ଦରଗଡରୁ ଜୁଏଲ ଓରାମ ବିଜୟୀ ହେବା ସହ ରାଜ୍ୟରେ ବିଜେପି ଖାତା ଖୋଲିବାକୁ ସକ୍ଷମ ହୋଇଥିଲା । ଆଉ ରାଜ୍ୟରେ ବିଜେପିର ସମ୍ମାନ ବଞ୍ଚାଇଥିବାରୁ ମୋଦି ସରକାରରେ ଜୁଏଲଙ୍କୁ ମିଳିଥିଲା ପୁରସ୍କାର । କ୍ୟାବିନେଟ ମନ୍ତ୍ରୀ ଭାବେ ମୋଦିଙ୍କ ମନ୍ତ୍ରିମଣ୍ଡଳରେ ସାମିଲ ହୋଇଥିଲେ ଜୁଏଲ ।
ମାତ୍ର ଗୋଟିଏ ଆସନ ଦେଇଥିବା ଓଡିଶାକୁ କ୍ୟାବିନେଟ ମନ୍ତ୍ରୀ ପଦ ଦେଇ ରାଜ୍ୟବାସୀଙ୍କୁ ଖୁସ୍ କରି ଦେଇଥିଲେ ମୋଦି । କିନ୍ତୁ ଏହି ଖୁସିର ସୀମା ସେତେବେଳେ ଡବଲ ହୋଇଯାଇଥିଲା ଯେତେବେଳେ ବିହାରରୁ ସାଂସଦ ଥିବା ଓଡ଼ିଆ ପୁଅ ଧର୍ମେନ୍ଦ୍ର ପ୍ରଧାନଙ୍କୁ ମଧ୍ୟ ନିଜ ମନ୍ତ୍ରିମଣ୍ଡଳରେ ସାମିଲ କରିଥିଲେ ନମୋ । ଏପରିକି ଧର୍ମେନ୍ଦ୍ରଙ୍କ ହାତରେ ଓଜନିଆ ବିଭାଗର ଦାୟିତ୍ୱ ଦେଇ ଓଡିଶାବାସୀଙ୍କୁ ଭିନ୍ନ ସଂକେତ ଦେଇଥିଲେ ମୋଦି ।
୨୦୧୯ରେ କିନ୍ତୁ ସ୍ଥିତି ବଦଳିଛି । ଚଳିତ ନିର୍ବାଚନରେ ବିଜେପି ଅବିଶ୍ୱସନୀୟ ପ୍ରଦର୍ଶନ କରିବା ସହ ଲୋକସଭାରେ ୮ଟି ସିଟରେ ବିଜୟୀ ହୋଇଛି । ଏପରିକି କିଛି ଆସନରେ ବିଜେପି ପ୍ରାର୍ଥୀ ଅଳ୍ପକେ ବିଜୟରୁ ବଞ୍ଚିତ ହୋଇଛନ୍ତି । ଆଉ ଏହି ଫଳାଫଳ ଅନୁଯାୟୀ ଚଳିତ ଥର ମୋଦିଙ୍କ ମନ୍ତ୍ରିମଣ୍ଡଳରେ ଓଡିଶାର ସାଂସଦଙ୍କ ସଂଖ୍ୟା ବଢିବ ବୋଲି ଅନୁମାନ କରାଯାଉଥିଲା । ନିର୍ବାଚନ ସମୟରେ ବାରମ୍ବାର ମୋଦିଙ୍କ ଓଡିଶା ଗସ୍ତ ମଧ୍ୟ ଏଭଳି କିଛି ସଂକେତ ଦେଉଥିଲା । ଏପରିକି ମନ୍ତ୍ରିମଣ୍ଡଳରେ କିଏ ସ୍ଥାନ ପାଇବ ତାହାକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଥିଲା । ଆଉ ଏହି ଚର୍ଚ୍ଚାର ଶୀର୍ଷରେ ବରଗଡ ସାଂସଦ ସୁରେଶ ପୂଜାରୀ, ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ଓ ସୁନ୍ଦରଗଡ ସାଂସଦ ଜୁଏଲ ଓରାମଙ୍କ ନାଁ ରହିଥିଲା ।
କିନ୍ତୁ ସବୁ ଚର୍ଚ୍ଚା ଓ ଆଲୋଚନାକୁ ପଛରେ ପକାଇ ମୋଦିଙ୍କ ମନ୍ତ୍ରିମଣ୍ଡଳର ଯେଉଁ ତାଲିକା ଆସିଥିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । କାରଣ ପ୍ରଥମ ଥର ସାଂସଦ ହୋଇଥିବା ପ୍ରତାପ ଷଡଙ୍ଗୀଙ୍କୁ ମୋଦିଙ୍କ ମନ୍ତ୍ରିମଣ୍ଡଳରେ ସ୍ଥାନ ଦିଆଯାଇଥିଲା । ଆଉ ୮ଟି ସାଂସଦ ଦେଇଥିବା ଓଡିଶାକୁ ମାତ୍ର ଗୋଟିଏ ମନ୍ତ୍ରୀ ପଦରେ ସନ୍ତୁଷ୍ଟ ହେବାକୁ ପଡିଥିଲା । ଆଉ ଏହାସହ ପୂର୍ବ ପାଳିରେ କ୍ୟାବିନେଟ ପାହ୍ୟା ପାଇଥିବା ଜୁଏଲ ଓରାମଙ୍କୁ ନିରାଶ ହେବାକୁ ପଡିଛି । ତେବେ ଗତ ଥର ଭଳି ପୁଣିଥରେ ଓଡିଆ ପୁଅ ତଥା ମଧ୍ୟପ୍ରଦେଶରୁ ରାଜ୍ୟସଭା ସାଂସଦ ଥିବା ଧର୍ମେନ୍ଦ୍ର ପ୍ରଧାନଙ୍କୁ ନିଜ ମନ୍ତ୍ରିମଣ୍ଡଳରେ ସାମିଲ କରି ଓଡିଶାବାସୀଙ୍କ ମନ ଜିଣିବାକୁ ପ୍ରୟାସ କରିଛନ୍ତି ମୋଦି ।