ଡେନିସ୍ ମୁକୱେଗେ ଓ ନାଦିୟା ମୁରାଦଙ୍କୁ ମିଳିଲା ୨୦୧୮ର ଶାନ୍ତିର ନୋବେଲ : ଜଣେ ଥିଲେ ଯୌନ ଦାସୀ, ତ ଆଉ ଜଣେ ହଜାର ହଜାର ଦୁଷ୍କର୍ମ ପୀଡିତାଙ୍କ ଦେବଦୂତ
୨୦୧୮ ବର୍ଷ ପାଇଁ ନୋବେଲ୍ ଶାନ୍ତି ପୁରସ୍କାର ଜିତିଛନ୍ତି କଙ୍ଗୋର ପ୍ରସିଦ୍ଧ ଡାକ୍ତର ଡେନିସ୍ ମୁକୱେଗେ ଏବଂ ଇରାକର ୟାଜିଦି ସମ୍ପ୍ରଦାୟ ମାନବାଧିକାର କର୍ମୀ ନାଦିୟା ମୁରାଦ୍ । ଯୌନ ହିଂସା ତଥା ଶାରୀରିକ ନିର୍ଯ୍ୟାତନା ଭଳି ଅମାନବୀୟ ଅତ୍ୟାଚାର ବିରୋଧରେ ଅବିରତ ଲଢ଼େଇ କରି ବିଶ୍ୱରେ ଚର୍ଚ୍ଚାର ପରିସରକୁ ଆସିଥିବା ଉଭୟ ଡେନିସ୍ ଏବଂ ନାଦିୟାଙ୍କୁ ନୋବେଲ୍ ଶାନ୍ତି ପୁରସ୍କାର ଦେବାକୁ ନିଷ୍ପତ୍ତି ନିଆଯାଇଛି। ନୋବେଲ୍ ସମିତି ପକ୍ଷରୁ ଉଭୟଙ୍କ ନାମ ନୋବେଲ୍ ଶାନ୍ତି ପୁରସ୍କାର ପାଇଁ ଘୋଷଣା କରାଯାଇଛି। ଉଭୟଙ୍କୁ ଡିସେମ୍ବର ୧୦ ତାରିଖରେ ନୋବେଲ ଶାନ୍ତି ପୁରସ୍କାରର ପ୍ରତିଷ୍ଠାତା ଆଲଫ୍ରେଡ୍ ନୋବେଲଙ୍କ ଶ୍ରାଦ୍ଧ ବାର୍ଷିକୀ ଉତ୍ସବରେ ଓସଲୋରେ ଏହି ପୁରସ୍କାର ଦିଆଯିବ।
Kanak News is now on WhatsApp
Join and get latest news updates delivered to you via WhatsApp
ଡେନିସ୍ କଙ୍ଗୋର ଜଣେ ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ ଡାକ୍ତର। ୧୯୯୯ ମସିହାରେ ପୂର୍ବ ସହର ବୁକାଭୁରେ ସେ ଖୋଲିଥିଲେ ପାନଜି ହସ୍ପିଟାଲ୍। ଏହି ହସ୍ପିଟାଲରେ ସେ ଯୌନ ନିର୍ଯ୍ୟାତନାର ଶିକାର ହୋଇଥିବା ହଜାର ହଜାର ମହିଳାଙ୍କୁ ଚିକିତ୍ସା କରୁଛନ୍ତି। ଯୁଦ୍ଧ ପ୍ରବଣ କଙ୍ଗୋର ପୂର୍ବ ଡେମୋକ୍ରାଟିକ୍ ରିପବ୍ଲିକରେ ଯୌନ ନିର୍ଯ୍ୟାତନାର ଶିକାର ହୋଇଥିବା ମହିଳାମାନଙ୍କୁ ସେ ସହଯୋଗର ହାତ ବଢ଼ାଇଛନ୍ତି ଏବଂ ସେମାନଙ୍କୁ ଚିକିତ୍ସା ସହ ସେମାନଙ୍କ ମାନସିକ ସ୍ଥିତି ସୁଦୃଢ଼ ରଖିବାପାଇଁ ମଧ୍ୟ ବେଶ୍ ଚେଷ୍ଟା ଜାରି ରଖିଛନ୍ତି।
ନୋବେଲ୍ ଶାନ୍ତି ପୁରସ୍କାର ଜିତିଥିବା ୨୫ ବର୍ଷୀୟା ନାଦିୟା ମୁରାଦ୍ ଇରାକର ୟାଜିଦି ସମ୍ପ୍ରଦାୟର ଜଣେ ମାନବିକ ଅଧିକାର କର୍ମୀ। ୨୦୧୪ ମସିହାରେ ତାଙ୍କୁ ଆଇଏସ୍ ଆତଙ୍କବାଦୀମାନେ ଅପହରଣ କରିନେଇ ପାଖାପାଖି ୩ ମାସ ପର୍ଯ୍ୟନ୍ତ ଯୌନ ଦାସୀ ଭାବେ ରଖି ଦୁଷ୍କର୍ମ କରିଥିଲେ। କୌଶଳ କ୍ରମେ ସେ ଖସି ଆସିବାପରେ ନିଜ ସହ ଘଟିଥିବା ଅଘଟଣ ବିଷୟରେ ମୁହଁ ଖୋଲିଥିଲେ। ଏହାପର ଠାରୁ ସେ ଯୌନ ନିର୍ଯ୍ୟାତନାର ଶିକାର ହୋଇଥିବା ମହିଳାମାନଙ୍କ ପାଇଁ କାମ କରୁଛନ୍ତି। ଇରାକରେ ସଂଖ୍ୟାଲଘୁ, ଶରଣାର୍ଥୀ ଏବଂ ମହିଳା ଅଧିକାର ପାଇଁ ଲଢ଼େଇ କରୁଛନ୍ତି।