ଅନଲାଇନରେ ବିବାହ ପ୍ରସ୍ତାବ ଗ୍ରହଣ କରି ଫସିଗଲେ ଓଡିଆ ମହିଳା ! ଆମେରିକାର ଡାକ୍ତର କହି ୧୦ ଲକ୍ଷ ଟଙ୍କା ଠକି ନେଲେ ନାଇଜେରିଆର ଦୁଇ ଠକ
କନକ ବୁରୋ : ଫୋନ କଲ କରି ଆକାଉଂଟ ନମ୍ବର, ଏଟିଏମ୍ ନମ୍ବର ମାଗିବା, ଗିଫ୍ଟ ପାଇଁ ଟଙ୍କା ପୈଠ କରିବା ଭଳି ଅନେକ ଖବର ଆପଣ ଶୁଣି ଥିବେ । କେହି କେହି ଏଭଳି ତିକ୍ତ ଅନୁଭୂତି ନିଜେ ଅଙ୍ଗେ ବି ନିଭେଇ ଥିବେ । ତେବେ ଏଭଳି ଏକ କାହାଣୀ, ଯାହା ଅନଲାଇନରେ ଚାଟିଂ କରୁଥିବା, ବିବାହ ପ୍ରସ୍ତାବ ଖୋଜୁଥିବା ଏବଂ ବ୍ୟବସାୟର ସ୍ୱପ୍ନ ଦେଖୁଥିବା ଲୋକଙ୍କ ଆଖି ଖୋଲିଦେବ । କ୍ରାଇମବ୍ରାଂଚ୍ ବୁଢ଼ିଆଣି ଜାଲରେ ଛନ୍ଦି ହୋଇଥିବା ଦୁଇ ଜଣ ଅପରାଧୀ ହେଉଛନ୍ତି ନାଇଜେରିଆର ମୁଳ ବାସିନ୍ଦା ଆଲେକ୍ସ ଏବଂ ଏରିକୁମେ । ଓଡ଼ିଶାର ଜଣେ ମହିଳାଙ୍କୁ ମିଛ ପରିଚୟ ଦେଇ ନିଜ ଜାଲରେ ଫସାଇ ଲୁଟି ନେଇଛନ୍ତି ୧୦ ଲକ୍ଷ ଟଙ୍କା ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶାର ଜଣେ ମହିଳା ଜଣକ ଏକ ମେଟ୍ରିମୋନିଆଲ ସାଇଟରେ ନିଜ ପ୍ରୋଫାଇଲ ଖୋଲିଥିଲେ । ଆଉ ମହିଳାଙ୍କୁ ଟାର୍ଗେଟ୍ କରି ନାଇଜେରିଆର ଦୁଇ ଅଭିଯୁକ୍ତ ଭୂପିନ୍ଦର ସିଂ ନାଁରେ ଏକ ଫେକ୍ ଆକାଉଣ୍ଟ ଖୋଲି ମହିଳାଙ୍କ ସହିତ ବନ୍ଧୁତ୍ୱ ସ୍ଥାପନ କରିଥିଲେ । ଆମେରିକାରେ ଡାକ୍ତର ଥିବା ପରିଚୟ ଦେଇ ମହିଳାଙ୍କୁ ବିବାହର ପ୍ରସ୍ତାବ ଦେଇଥିଲେ । ଚାଟିଂ କରି ବିଶ୍ୱାସ ଭାଜନ ହେବା ପରେ ଓଡ଼ିଶାରେ ଏକ କ୍ଲିନିକ୍ ଖୋଲିବାକୁ ପ୍ରସ୍ତାବ ବି ଦେଇଥିଲେ ।
ଆଉ ତା’ପରେ ଏକ କୋରିୟର ସଂସ୍ଥାରୁ ଜଣେ ମହିଳା ଫୋନ୍ କରି କହିଥିଲେ, ଆପଣଙ୍କ ନାଁରେ ଆସିଥିବା ବିପୁଳ ପରିମାଣର ବିଦେଶୀ ମୁଦ୍ରାକୁ ଦିଲ୍ଲୀ ଏକ୍ସସାଇଜ୍ ବିଭାଗ ଜବତ କରିଛି ଏବଂ ଓଡ଼ିଶା ଯାଇ ତାଙ୍କୁ ଗିରଫ କରିବ । ଆଉ ଏଥିରୁ ବଂଚିବା ପାଇଁ ହେଲେ ଟଙ୍କା ପଠାଇବାକୁ ହେବ । ଏହି ଘଟଣାରେ ଭୟଭୀତ ହୋଇ ୮ଟି ଆକାଉଣ୍ଟରେ ସାଢ଼େ ୧୦ ଲକ୍ଷ ଟଙ୍କା ପଠାଇଥିଲେ ଏହି ମହିଳା । ଦିଲ୍ଳୀରେ ବସି ଆମେରିକାର କାହାଣୀ କହୁଥିବା ନାଇଜେରିଆର ଦୁଇ ଅଭିଯୁକ୍ତଙ୍କ ଚାଲାକି କିନ୍ତୁ ବେଶି ସମୟ ଧରି କାମ କରିନଥିଲା । ଆଉ କ୍ରାଇମବ୍ରାଂଚ ହାତରେ ପଡ଼ି ଯାଇଥିଲେ ଦୁଇ ଅଭିଯୁକ୍ତ ।