ମୁଖ୍ୟମନ୍ତ୍ରୀଙ୍କ ଦ୍ୱାରା ସମ୍ବର୍ଦ୍ଧିତ ଦେବପ୍ରିୟ ସାମଲ ଟ୍ରେନରେ ହଟହଟା ! ସାର୍ଟିଫିକେଟକୁ ଫିଙ୍ଗିଦେଲେ ଟିଟିଇ
କନକ ବ୍ୟୁରୋ : ମୁଖ୍ୟମନ୍ତ୍ରୀଙ୍କ ଦ୍ୱାରା ସମ୍ବର୍ଦ୍ଧିତ ଦେବପ୍ରିୟ ସାମଲ ଟ୍ରେନରେ ହଟହଟା । ସ୍ୱାଧୀନତା ସଂଗ୍ରାମୀ ଲକ୍ଷ୍ମୀ ଇନ୍ଦିରା ପଣ୍ଡାଙ୍କ ବୋହୁ ସୁଜାତା ପଣ୍ଡାଙ୍କୁ ବାଲେଶ୍ୱର ରେଳଷ୍ଟେସନରେ ଅସହାୟ ଅବସାରେ ଉଦ୍ଧାର କରିଥିଲେ ଦେବପ୍ରିୟ । ଏହି ଘଟଣାରେ ଦେବପ୍ରିୟଙ୍କୁ ମିଳିଥିଲା ଅନେକ ପ୍ରଶଂସା । ଏପରିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଗତ ମାସ ୨୭ ତାରିଖରେ ଏଥିପାଇଁ ସମ୍ମାନିତ ଓ ସମ୍ବର୍ଦ୍ଧିତ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେବା କାର୍ଯ୍ୟ ପାଇଁ ଯୁବପିଢ଼ୀଙ୍କ ମଧ୍ୟରେ ଚର୍ଚ୍ଚାରେ ଥିବା ଦେବପ୍ରିୟ ଏବେ ପଶ୍ଚିମବଙ୍ଗ ମେଦିନାପୁରରେ ଥିବା ବିଦ୍ୟାସାଗର ୟୁନିଭରସିଟିରେ ଅଧ୍ୟୟନ କରୁଛନ୍ତି । ସେ ବୁଧବାର ଇଂଟରନାଲ ପରୀକ୍ଷା ଦେବାକୁ ଜନଶତାବ୍ଦୀ ଏକ୍ସପ୍ରେସରେ ଯାଉଥିବାବେଳେ ଆରପିଏଫ ପୁଲିସ ଓ ଟିଟିଇଙ୍କ ଦ୍ୱାରା ହଟହଟା ହୋଇଛନ୍ତି । ଟିଟି ତାଙ୍କ ସାର୍ଟିଫିକେଟକୁ ଫୋପାଡି ଦେବାରୁ ସେ ଇଂଟରନାଲ ପରୀକ୍ଷା ଦେବାରୁ ବଂଚିତ ହୋଇଛନ୍ତି ।
ଦେବପ୍ରିୟ ନିଜକୁ ଜଣେ ଛାତ୍ର ବୋଲି ପରିଚୟ ଦେବା ସହ ପରୀକ୍ଷା ଦେବାକୁ ଯାଉଥିବା କହିଥିଲେ । ଏପରିକି ଓଡିଶା ମୁଖ୍ୟମନ୍ତ୍ରୀଙ୍କଠାରୁ ପାଇଥିବା ସାର୍ଟିଫିକେଟ , ବାଲେଶ୍ୱର ଜିଲ୍ଲାପାଳଙ୍କ ନିକଟରୁ ପାଇଥିବା ପ୍ରଶଂସାପତ୍ର ଏବଂ ଅନ୍ୟ ପରିଚୟ ପତ୍ର ଦେଖାଇଥିଲେ ମଧ୍ୟ ଟିଟି ତାହା ଶୁଣିନଥିଲେ । ଏପରିକି ଟିଟି ଫୋପାଡି ଦେଇ ତାଙ୍କୁ ଖରାପ ବ୍ୟବହାର ପ୍ରଦର୍ଶନ କରିଥିଲେ ।
ଏନେଇ ଦେବପ୍ରିୟ ତାଙ୍କ ସମ୍ପର୍କୀୟଙ୍କୁ ଜଣାଇଥିଲେ । ସୂଚନା ପାଇ ବାଲେଶ୍ୱର ଆରପିଏଫ୍ , ପୋଲିସ ଅଧିକାରୀ ଜେ. ଏନ୍ ମହାପାତ୍ର ଖଡଗପୁର ଆରପିଏଫ୍ ସହ ଯୋଗାଯୋଗ କରିଥିଲେ । ତାପରେ ଆରପିଏଫ୍ ଏକ ଜରିମାନା ରସିଦ କାଟି ତାଙ୍କୁ ବାଲେଶ୍ୱର ପଠାଇ ଦେଇଥିଲେ ।