କରୋନାକୁ ପଶ୍ଚିମବଙ୍ଗରେ ତେଜିଲା ରାଜନୀତି: କରୋନା ସ୍ଥିତିର ଯାଂଚ ପାଇଁ ଆସିଥିବା କେନ୍ଦ୍ରୀୟ ଟିମର ଅଭିଯୋଗ; ସହଯୋଗ କରୁନାହାନ୍ତି ମମତା ସରକାର
ସେପଟେ ଦିଦି କହିଲେ, କରୋନା ସ୍ଥିତିର ଯାଂଚ ନୁହେଁ, ରାଜନୈତିକ ସଂକ୍ରମଣ କରୁଛନ୍ତି କେନ୍ଦ୍ରୀୟ ଟିମ
କନକ ବ୍ୟୁରୋ: କରୋନାର ସ୍ଥିତି ଯାଂଚ ପାଇଁ ଆସିଥିବା କେନ୍ଦ୍ରୀୟ ଟିମକୁ ନେଇ ପଶ୍ଚିମବଙ୍ଗରେ ରାଜନୀତି ଯୋର ଧରିଛି । ପଶ୍ଚିମବଙ୍ଗକୁ ଆସିଥିବା ଇଂଟର ମିନିଷ୍ଟରିଆଲ ସେଂଟ୍ରାଲ ଟିମ୍ ମମତା ସରକାର କରୋନା ନେଇ ସଠିକ ତଥ୍ୟ ଓ ସହଯୋଗ କରୁନଥିବା ଅଭିଯୋଗ ଆଣିଛନ୍ତି । ଶନିବାର କେନ୍ଦ୍ରୀୟ ଟିମ୍ ମୁଖ୍ୟ ଶାସନ ସଚିବ ରାଜୀବ ସିହ୍ନାଙ୍କୁ ଲିଖିତ ଅଭିଯୋଗ କରିଥିଲେ । ଯେଉଁଥିରେ ରାଜ୍ୟ ସରକାର ସହଯୋଗ କରୁନଥିବା ଉଲ୍ଲେଖ ରହିଛି । ସେଂଟ୍ରାଲ ଟିମ୍ ସହ ରାଜ୍ୟର କୌଣସି ପ୍ରତିନିଧି ନାହାନ୍ତି, ଏପରି କି ସୁରକ୍ଷା ପାଇଁ ପୁଲିସ କର୍ମଚାରୀ ମଧ୍ୟ ସାଙ୍ଗରେ ରହୁ ନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏପରି ସ୍ଥିତିରେ ରାଜ୍ୟ ପୁଲିସ ବଦଳରେ ବିଏସଏଫ ଯବାନଙ୍କ ନିୟୋଜିତ କରାଯିବ କି ବୋଲି ଚିଠିରେ ପ୍ରଶ୍ନ କରାଯାଇଛି । କେନ୍ଦ୍ରୀୟ ଟିମର ପଦାଧିକାରୀଙ୍କ କହିଛନ୍ତି ରାଜ୍ୟର ବରିଷ୍ଠ ଓ କନିଷ୍ଠ ସ୍ୱାସ୍ଥ୍ୟ ଅଧିକାରୀଙ୍କୁ ଭେଟି କରୋନାର ବାସ୍ତବିକ ସ୍ଥିତିର ସମୀକ୍ଷା କରିବାକୁ ଚାହୁଁଛନ୍ତି । ଯାହାଦ୍ୱାରା କରୋନା ସଂକ୍ରମିତଙ୍କ ସଂଖ୍ୟା ଓ ସ୍ୱାସ୍ଥ୍୍ୟ ସୁବିଧା ସଂପର୍କରେ ସଠିକ ତଥ୍ୟ କେନ୍ଦ୍ର ସରକାରଙ୍କ ପାଖରେ ପହଂଚିପାରିବ ।
ରାଜ୍ୟ ସରକାରଙ୍କ ୪ଟି ଚିଠି ଲେଖିବା ସତ୍ୱେ ସହଯୋଗ ମିଳୁନଥିବା ଅଭିଯୋଗ କରିଛନ୍ତି କେନ୍ଦ୍ରୀୟ ଟିମ୍ । ଅନ୍ୟପଟେ ଆରମ୍ଭରୁ କେନ୍ଦ୍ରୀୟ ଟିମର ଗସ୍ତକୁ ବିରୋଧ କରୁଥିବା ମମତା ଶନିବାର ପ୍ରତିକ୍ରିୟା ଦେଇଛନ୍ତି । କହିଛନ୍ତି କେନ୍ଦ୍ରୀୟ ଟିମ୍ ପଶ୍ଚିମବଙ୍ଗରେ କିଛି କରି ନାହାନ୍ତି । ତାଙ୍କର ଅସଲ ଉଦ୍ଦେଶ୍ୟ ରାଜନୈତିକ ଭୂତାଣୁ ସଂକ୍ରମିତ କରିବା ଓ ତାହା ସେମାନେ ନିର୍ଲଜ ଭାବେ କରୁଛନ୍ତି । ଦିଦିଙ୍କ ଏହି ଆକ୍ରାମଣାତ୍ମକ ବୟାନ ପରେ ପଶ୍ଚିମବଙ୍ଗ ରାଜନୀତି ସରଗରମ ହୋଇଛି ।