ଦୁଃସାହସିକ ଭ୍ରମଣକାରୀଙ୍କ ପାଇଁ ସ୍ୱର୍ଗପୁରୀଠାରୁ କମ୍ ନୁହେଁ ଏହି ସ୍ଥାନ ! ବାଇକ୍ ରାଇଡିଂ ଠାରୁ ଆରମ୍ଭ କରି ଟ୍ରେକିଙ୍ଗ୍ ପର୍ଯ୍ୟନ୍ତ ରହିଛି ସବୁ ସୁବିଧା ।
କର୍ମମୟ ଜୀବନ ଏବଂ ସାଂସାରିକ ଜଞ୍ଜାଳରେ ବ୍ୟସ୍ତ ରହି ଆମେ ବେଳେବେଳେ ଅସ୍ତବ୍ୟସ୍ତ ହୋଇପଡୁ । ଏବଂ କିଛି କ୍ଷଣ ଶାନ୍ତିରେ କଟାଇବା ପାଇଁ କେଉଁ ଦୂର ସ୍ଥାନକୁ ଯିବାକୁ ଇଚ୍ଛା କରିଥାଉ । ସହରର ଗହଳିପୂର୍ଣ୍ଣ ସ୍ଥାନ ଏବଂ ଗାଡିଗୋଡାର ପେଁ ପାଁ ଶବ୍ଦରୁ ବହୁ ଦୂରକୁ ଯିବାକୁ ସମସ୍ତେ ଇଚ୍ଛା କରିଥାନ୍ତି । କିନ୍ତୁ ଯଦି ଆପଣ ଭାରତର ପ୍ରମୁଖ ସ୍ଥାନଗୁଡିକ ବୁଲିସାରିଛନ୍ତି ଏବଂ ଭିନ୍ନ ଏକ ଶାନ୍ତିପୂର୍ଣ୍ଣ ସ୍ଥାନକୁ ଯିବାକୁ ଇଚ୍ଛା ରଖିଛନ୍ତି ତେବେ ଆମେ ଆପଣଙ୍କୁ ଉତ୍ତରାଖଣ୍ଡର ଧନୋଲ୍ଟୀ ସ୍ଥାନକୁ ଯିବାକୁ ପରାମର୍ଶ ଦେବୁ । ଯଦି ଆପଣ ଦୁଃସାହସିକ କାର୍ଯ୍ୟର ସୌଖିନ ଅଟନ୍ତି ତେବେ ଏହି ସ୍ଥାନ ଆପଣଙ୍କ ପାଇଁ ସ୍ୱର୍ଗ ସଦୃଶ ମନେ ହେବ । ତେବେ ଆସନ୍ତୁ ଜାଣିବା ଏହି ସ୍ଥାନର କିଛି ରୋଚକ ତଥ୍ୟ ବିଷୟରେ ।
Kanak News is now on WhatsApp
Join and get latest news updates delivered to you via WhatsApp
ବାଇକ୍ ରାଇଡରଙ୍କ ପାଇଁ ସର୍ବୋତ୍ତମ ସ୍ଥାନ :
ଯଦି ଆପଣ ବାଇକ୍ ରାଇଡିଂର ସୌଖିନ ତେବେ ଏଠାକାର ଉଚ୍ଚ ପାହାଡରେ ପ୍ରସ୍ତୁତ ହୋଇଥିବା ରୋଡରେ ବାଇକ୍ ଚଲାଇବା ଅନୁଭୁତିକୁ କେବେ ହାତଛଡା କରିବେ ନାହିଁ । ୬୦ କିଲୋମିଟର ଭିତରେ ଆପଣଙ୍କୁ ଏହି ବାଇକ୍ ରାଇଡିଂର ସଫରରେ ହିମାଳୟର ସୌନ୍ଦର୍ଯ୍ୟ,ଗଭୀର ଘାଟି ତଥା ପର୍ବତ ଏବଂ ଜଙ୍ଗଲର ମଜା ମିଳିପାରିବ ।
ମିଳିବ ଟ୍ରେକିଙ୍ଗର ସୁବିଧା :
ଖାସ୍ ଟ୍ରେକିଙ୍ଗ ପାଇଁ ଏହି ସ୍ଥାନ ଖୁବ୍ ଚର୍ଚ୍ଚିତ । ୧୦ ହଜାର ଫୁଟ୍ ଉଚ୍ଚରେ ଥିବା ପାହାଡ ଏବଂ ଦେବଦାରୁ ଏବଂ ଅନ୍ୟ ବଡବଡ ଗଛ ମଧ୍ୟ ଦେଇ ଜଙ୍ଗଲ ଭିତରେ ଟ୍ରେକିଙ୍ଗ୍ କରିବାର ସୁବିଧା ଆପଣଙ୍କୁ ଏଠାରେ ମିଳିବ । ଟ୍ରେକିଙ୍ଗ୍ ସମୟରେ ଆପଣଙ୍କ ସହାୟତା ସକାଶେ ପ୍ରଶିକ୍ଷକ ମଧ୍ୟ ରହିଥିବେ ।
କ୍ୟାମ୍ପରେ ରହିବାର ମଜା ଉଠାଇପାରିବେ :
ସହରର ଶୋରଶବ୍ଦରୁ ଦୂରରେ ରହି ପ୍ରକୃତିର କୋଳରେ କ୍ୟାମ୍ପରେ ରହିବାର ମଜା ହିଁ ନିଆରା । ଜଙ୍ଗଲରେ ତଥା ଧନୋଲ୍ଟୀ ପାର୍କରେ ଟେଣ୍ଟ୍ ବାନ୍ଧି ରହିବାର ମଜା ଆପଣ ଏଠାରେ ପାଇପାରିବେ ।
ଟ୍ୱିନ୍ ଟୁର ଦୁଃସାହସିକ ଅନୁଭୂତିର ମଜା :
ଟ୍ୱିନ୍ ଟୁର ଦୁଃସାହସିକ ଅନୁଭୂତିକୁ ଆପଣ ସ୍କାଏ ଡାଇଭିଂ ସହ ତୁଳନା କରିପାରିବେ । କିନ୍ତୁ ଏହା ସ୍କାଏ ଡାଇଭିଂ ବଦଳରେ ସ୍କାଏ ୱାର୍କ କହିଲେ ଯୁକ୍ତିଯୁକ୍ତ ହେବ । ଭୂମିରୁ ୧୨୦ ଫୁଟ ଉଚ୍ଚତାରେ ବନ୍ଧା ହୋଇଥିବା ୩୬୦ ଫୁଟ ଲମ୍ବା ତାରରେ ଚାଲିବାର ଅନୁଭୂତି ନିଜ ମଧ୍ୟରେ ହିଁ ଏକପ୍ରକାର ଦୁଃସାହସିକ ଅନୁଭବ ।
ଭ୍ରମଣ କରିବା ପାଇଁ ଉକୃଷ୍ଟସ୍ଥଳ :
ମାର୍ଚ୍ଚ ମାସରୁ ଅଗଷ୍ଟ ମାସ ସମୟକୁ ଏଠାକୁ ଯିବାର ଉକୃଷ୍ଟ ସମୟ କୁହାଯାଏ । ସୌନ୍ଦର୍ଯ୍ୟତାରେ ଘେରି ରହିଥିବା ଏହି ସ୍ଥାନକୁ ଦେଖିବା ପାଇଁ ଦେଶର କୋଣ ଅନୁକୋଣରୁ ଏଠାକୁ ଲୋକଙ୍କ ସୁଅ ଛୁଟେ ।