କନକ ବ୍ୟୁରୋ: ବର୍ଷା ପାଇଁ ବାତିଲ ହେଲା ଟ୍ରେନ । ରେଳଧାରଣାରେ ବର୍ଷା ପାଣି ଜମି ରହିବା କାରଣରୁ ଅନେକ ଟ୍ରେନକୁ ବାତିଲ କରିଛି ପୂର୍ବତଟ ରେଳବାଇ । ଉତ୍ତରପୂର୍ବ ସୀମାନ୍ତ ରେଳପଥର ଗାଈଶାଳ ନିକଟ କିଶନଗଞ୍ଜ ଓ ପାଞ୍ଜିପାରା ଠାରେ ଏଭଳି ସ୍ଥିତି ଉପୁଜିବା ଦ୍ୱାରା କିଛି ଟ୍ରେନର ଗତିପଥ ବଦଳା ଯାଇଥିବା ବେଳେ ଆଉ କିଛିକୁ ବାତିଲ କରାଯାଇଥିବା ପୂର୍ବତଟ ରେଳବାଇ ପକ୍ଷରୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ରେଳବାଇ ପକ୍ଷରୁ ମିଳିଥିବା ସୂଚନା ଅନୁସାରେ, ଉତ୍ତରପୂର୍ବ ସୀମାନ୍ତ ରେଳପଥର କଟିହାର ଡିଭିଜନ କିଶନଗଞ୍ଜ ଷ୍ଟେସନ ନିକଟରେ ବନ୍ୟା ପରିସ୍ଥିିତି ସୃଷ୍ଟି ହୋଇଛି । ଧିରେଧିରେ ବନ୍ୟାଜଳ ବଢ଼ୁଥିବାରୁ ରେଳ ଚଳାଚଳ ଉପରେ ଏହାର ପ୍ରଭାବ ପଡିଛି । ନିକଟସ୍ଥ ଯେ କୌଣସି ବଡ ଷ୍ଟେସନରେ ଟ୍ରେନକୁ ଅଟକାଇ ରଖିବାକୁ ସମସ୍ତ ଡିଆର୍ଏମ୍ଙ୍କୁ ନିର୍ଦ୍ଦେଶ ଦିଆଯାଇଛି । ଏହାସହ ଟ୍ରେନରେ ଅଟଳି ରହିଥିବା ସମସ୍ତ ଯାତ୍ରୀଙ୍କ ପାଇଁ ପ୍ରଚୁର ପରିମାଣରେ ଖାଦ୍ୟ ଓ ପାନୀୟ ଜଳର ସୁବିଧା କରିବା ପାଇଁ ମଧ୍ୟ କୁହାଯାଇଛି । ଯାତ୍ରୀଙ୍କ ସୁରକ୍ଷା ଓ ସୁବିଧା ପାଇଁ ସମସ୍ତ ବ୍ୟବସ୍ଥା ଗ୍ରହଣ କରିବାକୁ ପୂର୍ବତଟ ରେଳବାଇ ପକ୍ଷରୁ କୁହାଯାଇଛି ।
ବାତିଲ କରାଯାଇଥିବା ଟ୍ରେନଗୁଡିକର ବିବରଣୀ :
୧୩ ତାରିଖ ରବିବାର ଗୌହାଟୀରୁ ଛାଡିବାକୁ ଥିବା ୧୫୬୪୦ ଗୌହାଟୀ-ପୁରୀ ଏକ୍ସପ୍ରେସକୁ ବାତିଲ କରାଯାଇଛି । ସେହିଭଳି ରେଳପଥ ବିଛିନ୍ନ ହେବା କାରଣରୁ ଅଗଷ୍ଟ ୧୫ ତାରିଖରେ ପୁରୀରୁ ଛାଡିବାକୁ ଥିବା ୧୫୯୩୦ପୁରୀ-ଗୌହାଟୀ ଟ୍ରେନକୁ ମଧ୍ୟ ବାତିଲ କରାଯାଇଛି । ୧୩ ତାରିଖ ରବିବାର ଦିବ୍ରୁଗଡରୁ ଛାଡିବାକୁ ଥିବା ଦିବ୍ରୁଗଡ-ଚେନ୍ନାଇ ଏଗମୋର ଏକ୍ସପ୍ରେସକୁ ବାତିଲ କରାଯାଇଥିବା ପୂର୍ବତଟ ରେଳବାଇ ପକ୍ଷରୁ ସୂଚନା ଦିଆଯାଇଛି ।
୧୨ ତାରିଖରେ ଦେବ୍ରୁଗଡ ଷ୍ଟେସନରୁ ବାହାରିଥିବା ୧୫୯୦୬ ଦିବ୍ରୁଗଡ-କନ୍ୟାକୁମାରୀ ବିବେକଏକ୍ସପ୍ରେସ ଗୌହାଟୀ ଠାରୁ ସନ୍ଧ୍ୟା ୬ଟା ପରିବର୍ତ୍ତେ ୧୩ ତାରିଖ ଦିନ ୧୧ଟା୪୫ରେ ଛାଡିଛି । ସେହିଭଳି ଗୌହାଟୀରୁ ଛାଡିଥିବା ୧୨୫୧୦ ଗୌହାଟୀ-ବାଙ୍ଗାଲୋର କ୍ୟାଣ୍ଟ ଏକ୍ସପ୍ରେସ ବାରପେଟା ରୋଡରେ ଅଟକି ରହିଥିବା ସୂଚନା ମିଳିଛି ।