ବାଙ୍ଗଲାଦେଶୀଙ୍କୁ ଲଗାମ ନାହିଁ । ସରକାରଙ୍କ ହିସାବରେ ମାତ୍ର ୪ ହଜାର,ଗବେଷକଙ୍କ ହିସାବରେ ଲକ୍ଷ ଲକ୍ଷ ।
କନକ ବ୍ୟୁରୋ : ଓଡିଶାରେ ପ୍ରାୟ ୪ ହଜାର ଅନୁପ୍ରବେଶକାରୀ ବାଂଲାଦେଶୀ ରହିଥିବା ବିଧାନସଭାରେ ସ୍ୱୀକାର କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏପରକି ଅନେକେ ଏବେ ସ୍ଥାନୀୟ ଭୋଟର ପରିଚୟପତ୍ର ଓ ରାସନ କାର୍ଡ ହାତେଇ ସାରିଲେଣି । ତେବେ ଏମାନଙ୍କୁ ନେଇ ଆସାମ ପରି ଓଡିଶାରେ ମଧ୍ୟ ଆଗାମୀ ଦିନରେ ଜଟିଳ ପରିସ୍ଥିତି ସୃଷ୍ଟି ହେବା ଆଶଙ୍କା ଦେଖାଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଆସାମ ସରକାରଙ୍କ ଏନଆରସି ତାଲିକାରୁ ୪୦ ଲକ୍ଷ ଲୋକ ବାଦ ପଡିବା ପରେ ରାଜନୀତି ଯେପରି ବିସ୍ଫୋରକ ରୂପ ନେଉଛି, ସେହିପରି ଅନୁପ୍ରବେଶକାରୀଙ୍କ ଯୋଗୁଁ ଦେଶର ସୁରକ୍ଷା ପ୍ରତି ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ଓଡ଼ିଶାରେ କେତେ ବାଙ୍ଗଲାଦେଶୀ ଅଛନ୍ତି ସେ ନେଇ ମଧ୍ୟ ଆରମ୍ଭ ହୋଇଯାଇଛି ବିତର୍କ । ୨୦୧୫ରେ ବେଆଇନ ଭାବେ ୩୯୮୭ ଜଣ ବାଙ୍ଗଲାଦେଶୀ ଥିବା ନେଇ ବିଧାନସଭାକୁ ଅବଗତ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କେନ୍ଦ୍ରାପଡ଼ାରେ ସର୍ବାଧିକ ୧୬୪୯ ଓ ଜଗତସିଂହପୁର ଜିଲ୍ଲାରେ ୧୧୧୨ ଜଣ ବେଆଇନ ଅନୁପ୍ରବେଶକାରୀ ଚିହ୍ନଟ କରାଯାଇଥିଲା । ସେହିପରି ମାଲକାନଗିରିରେ ୬୫୫, ଭଦ୍ରକରେ ୩୧୩, ବାଲେଶ୍ୱରରେ ୧୫୦, ନବରଙ୍ଗପୁରରେ ୧୦୬ ଓ ବରଗଡ଼ରେ ୨ ଜଣ ଚିହ୍ନଟ ହୋଇଥିଲେ । ତେବେ ଗବେଷକ ଅନୀଲ ଧୀରଙ୍କ ମତରେ ଏହି ସଂଖ୍ୟା ବହୁ ଅଧିକ ।
୧୯୪୮ ଓ ୧୯୭୧ ମସିହା ଯୁଦ୍ଧ ସମୟରେ ଅନେକ ବାଙ୍ଗଲାଦେଶୀ ଓଡ଼ିଶାକୁ ଶରଣାର୍ଥୀ ଭାବେ ଆସିଥିଲେ ଏବଂ ସେମାନଙ୍କୁ ସରକାରଙ୍କ ତରଫରୁ ଥଇଥାନ କରାଯାଇଥିଲା । ତେବେ ଏହା ପରେ ମଧ୍ୟ ବାଙ୍ଗଲାଦେଶରୁ ବହୁ ସଂଖ୍ୟାରେ ଅନୁପ୍ରବେଶକାରୀ ସହଜରେ ଓଡ଼ିଶାକୁ ଆସୁଥିଲେ । କାରଣ ସରକାରଙ୍କ ପକ୍ଷରୁ ଏହାକୁ ରୋକିବା ପାଇଁ କିଛି ଠୋସ ପଦକ୍ଷେପ ନିଆଯାଇନାହିଁ ।
୪୮୦ କିଲୋମିଟରରୁ ଅଧିକ ବିସ୍ତୀର୍ଣ୍ଣ ଉପକୂଳ ଥିବାରୁ ଅନୁପ୍ରବେଶକାରୀଙ୍କ ଭୂସ୍ୱର୍ଗ ହୋଇଆସିଛି । ବିଶେଷକରି ମହାକାଳପଡ଼ା ବ୍ଳକର ଜମ୍ବୁ, ବନକଣ୍ଡା, ରାମନଗର, ବତୀଘର, ବଢିଅ ଆଦି ଅଂଚଳ ଏବଂ ରାଜନଗର ବ୍ଲକର ରଙ୍ଗଣି, ତାଳଚୁଆ, ଇଶ୍ୱରପୁର ଆଦି ଅଂଚଳକୁ ସମୁଦ୍ର ବାଟେ ସହଜରେ ବେଆଇନ ଭାବେ ଓଡ଼ିଶାକୁ ପ୍ରବେଶ କରିଥାନ୍ତି ବାଙ୍ଗଲାଦେଶୀ ନାଗରିକ । ସବୁଠୁ ବଡ଼ କଥା ହେଉଛି, ଭୋଟ ପରିଚୟପତ୍ର ସହ ରାସନ କାର୍ଡ ମଧ୍ୟ ହାତେଇ ସାରିଲେଣୀ ଏହି ଅନୁପ୍ରବେଶକାରୀ ।
ତଟସୁରକ୍ଷା ବାହିନୀ କିମ୍ବା ରାଜ୍ୟ ସରକାରଙ୍କ ପକ୍ଷରୁ ହୋଇଥିବା ମେରାଇନ ଥାନା ଏ କ୍ଷେତ୍ରରେ ସଂପୂର୍ଣ୍ଣ ଫେଲ ମାରିଥିବା ଅଭିଯୋଗ ହୋଇଛି । ଏବେ ପ୍ରଶ୍ନ ଉଠୁଛି, ଆସାମ ପରେ ନାଗରିକ ଚିହ୍ନଟ ପ୍ରକିୟା ଓଡ଼ିଶାରେ ଆରମ୍ଭ ହେବ କି? କାରଣ ଏହି ସମସ୍ୟା ଧିରେ ଧିରେ ଓଡ଼ିଶାରେ ଉକ୍ରଟ ସ୍ଥିତି ସୃଷ୍ଟି କରିବାର ଆଶଙ୍କା ରହିଛି ।