କନକ ବ୍ୟୁରୋ : ବିଜେପୁର ଉପ-ନିର୍ବାଚନର ଅନ୍ତିମ ଦିନରେ ନାମାଙ୍କନ ଦାଖଲ କରିବେ କଂଗ୍ରେସ ପ୍ରାର୍ଥୀ ପ୍ରଣୟ ସାହୁ । ଗାଏସିଲଟ ବ୍ଲକର ଉପାଧ୍ୟକ୍ଷ ତଥା ବିଜେପୁର ନିର୍ବାଚନ ମଣ୍ଡଳୀରେ ପ୍ରଭାବ ରଖିଥିବା ପ୍ରଣୟ ସାହୁଙ୍କୁ ଶେଷ ମୁହୁର୍ତ୍ତରେ କଂଗ୍ରେସ ପ୍ରାର୍ଥୀ କରି ଗୋଟିଏ ବଡ ଧରଣର କାର୍ଡ ଖେଳିଛି । ଆଉ ନାମାଙ୍କନ ଦାଖଲର ଶେଷ ଦିନରେ ପ୍ରଣୟ ସାହୁ ଶକ୍ତି ପ୍ରଦର୍ଶନ କରିବାକୁ ଯାଉଛନ୍ତି । ରାଜ୍ୟ କଂଗ୍ରେସର ତମାମ ବରିଷ୍ଠ ନେତା ପ୍ରଣୟଙ୍କ ନାମାଙ୍କନରେ ସାମିଲ ହେବାକୁ ବିଜେପୁର ଯାଇଛନ୍ତି । ବିଜେପି ଓ ବିଜେଡି ଭଳି ବିଜେପୁର ମାଟିରେ ଦମ୍ ଦେଖାଇବାକୁ ପ୍ରଣୟ ବଡଧରଣର ଉଦ୍ୟମ ଆରମ୍ଭ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଦିଲ୍ଲୀରୁ ରାଜ୍ୟ କଂଗ୍ରେସ ନେତାଙ୍କୁ ଫୋନ୍ ଆସିଛି, ବିଜେପୁରରେ ପ୍ରଣୟଙ୍କ ନାମାଙ୍କନ ବେଳେ ଉପସ୍ଥିତ ରହିବା ପାଇଁ । ଆଉ ଅନୁମାନ କରାଯାଉଛି, ପିସିସି ସଭାପତିଙ୍କ ସମେତ ଅନେକ ବିଧାୟକ ଓ ବରିଷ୍ଠ ନେତା ନାମାଙ୍କନ ବେଳେ ଉପସ୍ଥିତ ରହିବେ । ନାମାଙ୍କନ ବାହାନାରେ ରାଜ୍ୟ କଂଗ୍ରେସର ଦୁଇଗୋଷ୍ଠୀ କମସେ କମ୍ ଗୋଟିଏ ଜାଗାରେ ଉପସ୍ଥିତ ରହିବାର ଦେଖାଯିବ । ଗତ କିଛି ଦିନ ଧରି ରାଜ୍ୟ କଂଗ୍ରେସର ଦୁଇ ଗୋଷ୍ଠୀ ଭିତରେ ଛକାପଂଝା ଦେଖିବାକୁ ମିଳିଥିଲା । ଖାସ୍ କରି ପିସିସି ସଭାପତି ପରିବର୍ତ୍ତନ ନେଇ ବିଧାୟକ ଦଳ ଓ ପିସିସି ସଭାପତିଙ୍କ ଗୋଷ୍ଠୀ ଭିତରେ ଚାଲିଥିଲା ବୟାନବାଜି ।
ବିଜେପୁର ଉପ-ନିର୍ବାଚନରେ କିଏ ପ୍ରାର୍ଥୀ ହେବ, ତାକୁ ନେଇ ପିସିସିରେ ଛକାପଂଝା ଦେଖିବାକୁ ମିଳିଥିଲା । ଦୁଇଟି ନାଁ ଏଆଇସିସିକୁ ପଠାଯାଇଥିଲା । ଏପରିକି ପିସିସି ସଭାପତି ପ୍ରସାଦ ହରିଚନ୍ଦନ ଓ ପ୍ରାର୍ଥୀ ଚୟନ କମିଟିର ଅଧ୍ୟକ୍ଷଙ୍କ ଭିତରେ ମନୋମାଳିନ୍ୟ ରହିଥିବା ଚର୍ଚ୍ଚା ହେଲା । ଶେଷରେ ପ୍ରଣୟ ସାହୁଙ୍କ ନାଁରେ ମୋହର ମାରିଥିଲେ ରହୁଲ ଗାନ୍ଧୀ । ଆଉ ଏବେ ପ୍ରଣୟଙ୍କ ପଛରେ ପୁରା କଂଗ୍ରେସ କିଭଳି ଏକାଠି ହୋଇ ଠିଆହେବ, ସେନେଇ ଦିଲ୍ଲୀ କଡା ନଜର ରଖିଛି ।
ପିସିସି ସଭାପତି ପରିବର୍ତ୍ତନ ନେଇ ଯେତେବେଳେ ଦିଲ୍ଲୀରେ ଆଲୋଚନା ହୋଇଥିଲେ ସେତେବେଳେ ରାହୁଲ ଦଳରେ ଏକତା ଉପରେ ଯଥେଷ୍ଟ ଗୁରୁତ୍ୱ ଦେଇଥିଲେ । ଏପରିକି ସଫା ସଫା ଶୁଣାଇ ଦେଇଥିଲେ ଦଳରେ ବିଶୃଙ୍ଖଳାକୁ ବରଦାସ୍ତ କରାଯିବନି । ତେଣୁ ବିଜେପୁର ଉପ-ନିର୍ବାଚନକୁ ଆୟୁଧ କରି ରାହୁଲ ତମାମ ନେତାଙ୍କୁ ଏକାଠି ରହିବାକୁ ବାର୍ତ୍ତା ଦେଇଥିବା ଅନୁମାନ କରାଯାଉଛି । ଏମିତିବି ଗୁଜୁରାଟ ନିର୍ବାଚନ ସମୟରେ ସୁରଟରେ ହୋଇଥିବା ପ୍ରଚାରରେ ନିରଂଜନ ପଟ୍ଟନାୟକ ଓ ପ୍ରସାଦ ହରିଚନ୍ଦନଙ୍କୁ ଗୋଟିଏ ଷ୍ଟେଜରେ ଦେଖିବାକୁ ମିଳିଥିଲା । ତେଣୁ ବିଜେପୁ ଉପ-ନିର୍ବାଚନରେ ମଧ୍ୟ ଦଳ ଏକାଠି ହେବ ବୋଲି ଅନୁମାନ କରାଯାଉଛି ।
ସୂଚନା ଅନୁସାରେ, ଟିକେଟ ପାଇନଥିବା ରିପୁନାଥ ସେଠଙ୍କୁ ରାହୁଲ ଦିଲ୍ଲୀ ଡକାଇଛନ୍ତି । ବିଜେପୁର-ଉପନିର୍ବାଚନ ସଂକ୍ରାନ୍ତରେ ଆଲୋଚନା କରିବାକୁ ତାଙ୍କୁ ଦିଲ୍ଲୀ ଡକାଯାଉଥିବା କୁହାଯାଉଛି । ତେବେ ରିପୁନାଥ ଦିଲ୍ଲୀରେ ରାହୁଲଙ୍କୁ କେବେ ଭେଟିବେ ସ୍ପଷ୍ଟ ହୋଇନାହିଁ । ସେହିଭଳି ତିନି ତିନି ଥର ଏହି ଆସନରୁ କଂଗ୍ରେସ ପ୍ରାର୍ଥୀ ସୁବଳ ସାହୁ ବିଜୟୀ ହୋଇଥିବାରୁ ଏହି ଲଢେଇ କଂଗ୍ରେସ ପାଇଁ ସମ୍ମାନର ପ୍ରଶ୍ନ ପାଲଟିବ । ୨୦୧୯ ନିର୍ବାଚନ ଆଗରୁ କର୍ମୀଙ୍କ ମନରେ ବିଶ୍ୱାସ ଭରିବାକୁ ଦଳ ପାଇଁ ଏକ ସୁଯୋଗ ଆସିଛି । ତେବେ ନେତା ଏକ ମନ ଆଉ ପ୍ରାଣ ନେଇ ନିର୍ବାଚନ ଲଢୁଛନ୍ତି ନା ବହୁଧା ବିଭାଜିତ ଭାବେ ନିର୍ବାଚନକୁ ସାମ୍ନା କରୁଛନ୍ତି, ତା’ଉପରେ ନଜର ।