ଫେବ୍ରୁଆରୀ ୬ ତାରିଖ ସୁଦ୍ଧା ମୋବାଇଲରେ ଆଧାର ଲିଙ୍କ କରିବା ବାଧ୍ୟତାମୂଳକ ! ସୁପ୍ରିମକୋର୍ଟରେ ସତ୍ୟପାଠ ଦାଖଲ କଲା କେନ୍ଦ୍ର
କନକ ବ୍ୟୁରୋ : ଆଧାର ଆଇନର ସାମ୍ବିଧାନିକ ବୈଦ୍ଧତା ନେଇ ଆଜି ଶୁଣାଣି କରିବେ ସୁପ୍ରିମକୋର୍ଟ । ଗତକାଲି ହୋଇଥିବା ଏ ସଂପର୍କୀତ ଏକ ଆବେଦନକୁ ଗ୍ରହଣ କରିବା ସହ ଆଜି ଶୁଣାଣି ପାଇଁ ଦିନ ଧାର୍ଯ୍ୟ କରିଛନ୍ତି କୋର୍ଟ । ଆଜିର ଶୁଣାଣି ବେଳେ ସୁପ୍ରିମକୋର୍ଟଙ୍କ ଟିପ୍ପଣୀ ଆଧାରର ଭବିଷ୍ୟତ ନିର୍ଦ୍ଧାରଣ କରିବ ବୋଲି କୁହାଯାଉଛି । କାରଣ ବିଭିନ୍ନ ସରକାରୀ ସେବା ଓ ଯୋଜନାରେ ଆଧାରକୁ ବାଧ୍ୟତାମୂଳକ କରି ସମାଲୋଚନାର ଶିକାର ହେଉଛନ୍ତି କେନ୍ଦ୍ରରେ ମୋଦି ସରକାର । ଆଧାରକୁ ନେଇ ସୁପ୍ରିମକୋର୍ଟରେ କେନ୍ଦ୍ର ସରକାର ୧୧୩ ପୃଷ୍ଠାର ସତ୍ୟପାଠ ଦାଖଲ କରିଛନ୍ତିା
Kanak News is now on WhatsApp
Join and get latest news updates delivered to you via WhatsApp
ଆଇନଜୀବୀ ଜୋହେବ ହୁସେନଙ୍କ ଜରିଆରେ ଗୁରୁବାର ଏହି ସତ୍ୟପାଠ ଦାଖଲ କରିଛନ୍ତି ସରକାର । କେନ୍ଦ୍ର ସରକାର କୋର୍ଟରେ କହିଛନ୍ତି ଯେ, ଲୋକନୀତି ଫାଉଣ୍ଡେସନ ମାମଲାର ଶୁଣାଣି କରି ସୁପ୍ରିମକୋର୍ଟ ହିଁ ଆଧାରକୁ ଫୋନ ନମ୍ବର ସହ ଯୋଡିବା ପାଇଁ ନିର୍ଦ୍ଦେଶ ଦେଇଥିଲେ । ଏବଂ ଗୋଟିଏ ବର୍ଷ ମଧ୍ୟରେ ଏହି କାମ ଶେଷ କରିବାକୁ କହିଥିଲେ । ତେଣୁ ଫେବ୍ରୁଆରୀ ୬ ତାରିଖ ସୁଦ୍ଧା ସମସ୍ତେ ନିଜ ମୋବାଇଲ ଫୋନକୁ ଆଧାର ସହ ଲିଙ୍କ କରିବା ବାଧ୍ୟତାମୂଳକ କରାଯାଇଛି । ଏବଂ ସରକାର କେବଳ ବ୍ୟାଙ୍କ ଖାତା ସହ ଆଧାର ଯୋଡିବାର ସମୟ ସୀମାକୁ ୨୦୧୮ ମାର୍ଚ୍ଚ ୩୧ ଯାଏଁ ବୃଦ୍ଧି କରିଛନ୍ତି ।
ଆଧାରକୁ ଚ୍ୟାଲେଞ୍ଜ କରି ଅନେକ ପିଟିସନ ସୁପ୍ରିମକୋର୍ଟରେ ଶୁଣାଣି ପାଇଁ ପଡିରହିଥିବାବେଳେ ଏହାର ତୁରନ୍ତ ଶୁଣାଣି ପାଇଁ ଆବେଦନ କରିଥିଲେ କର୍ଣ୍ଣାଟକର ମାଥ୍ୟୁ ଥୋମାସ । ବ୍ୟାଙ୍କ ଖାତା ଓ ମୋବାଇଲ ଫୋନ ସହ ଆଧାରକୁ ଲିଙ୍କ କରିବା ନେଇ କେନ୍ଦ୍ର ସରକାରଙ୍କ ନିଷ୍ପତି, ବ୍ୟକ୍ତିଗତ ଗୋପନୀୟତାକୁ କ୍ଷୁଣ୍ଣ କରୁଥିବା ଦର୍ଶାଇ ଏହା ବିରୋଧରେ ସୁପ୍ରିମକୋର୍ଟରେ ଆବେଦନ କରିଥିଲେ ଥୋମାସ ।
ଜଷ୍ଟିସ ଜେ. ଚେଲାମେଶ୍ୱରଙ୍କ ଖଣ୍ଡପୀଠରେ ଆଧାର ସଂପର୍କୀତ ମାମଲାର ତୁରନ୍ତ ଶୁଣାଣି ପାଇଁ ଆବେଦନ କରିଥିଲେ ମାଥ୍ୟୁ ଥୋମାସଙ୍କ ଓକିଲ । ଏହାପରେ କୋର୍ଟ ବିଚାର ପାଇଁ ଆବେଦନକୁ ଗ୍ରହଣ କରିଛନ୍ତି । ଗତ ଅକ୍ଟୋବର ୩୦ ତାରିଖରେ ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ ଦୀପକ ମିଶ୍ରଙ୍କ ଖଣ୍ଡପୀଠ କହିଥିଲେ ଯେ, ଆଧାର ସଂପର୍କୀତ ସମସ୍ତ ଆବେଦନର ବିଚାର କରିବାକୁ ଏକ ସାମ୍ବିଧାନିକ ଖଣ୍ଡପୀଠ ଗଠନ କରାଯିବ । ଏବଂ ନଭେମ୍ବର ଶେଷ ସପ୍ତାହ ଆଡକୁ ସମସ୍ତ ଆବେଦନର ଏକକାଳୀନ ଶୁଣାଣି ହେବ ।