ଆଜି ଛତିଶା ନିଯୋଗ ବୈଠକ : ନୂଆ ଶ୍ରୀମନ୍ଦିର ପ୍ରଶାସକଙ୍କ ସହ ପ୍ରଥମ ସେବାୟତ ସମନ୍ୱୟ ବୈଠକ
କନକ ବ୍ୟୁରୋ : ଆଜି ବସିବ ଛତିଶା ନିଯୋଗ ବୈଠକ । ନୂତନ ଭାବେ ଦାୟିତ୍ୱ ନେଇଥିବା ମୁଖ୍ୟ ପ୍ରଶାସକ ପ୍ରଦୀପ ଜେନାଙ୍କର ସେବାୟତଙ୍କ ସହ ଏହା ପ୍ରଥମ ସମନ୍ୱୟ ବୈଠକ । ଶ୍ରୀମନ୍ଦିର ପ୍ରଶାସନିକ କାର୍ଯ୍ୟାଳୟରେ ବୈଠକ ହେବ । ବୈଠକରେ ସ୍ନାନଯାତ୍ରା ଓ ରଥଯାତ୍ରା ନୀତି ନିର୍ଘଂଟ ଏବଂ ଶୃଙ୍ଖଳିତ କରିବା ପାଇଁ ସ୍ୱତନ୍ତ୍ର ଆଲୋଚନା କରାଯିବ । ତେବେ ଗତ ରଥଯାତ୍ରା ସମନ୍ୱୟ କମିଟି ବୈଠକରେ ଏସପିଙ୍କ ସ୍ପର୍ଶ କଟକଣା ପରେ ଏବେ ପ୍ରସଙ୍ଗ ଅଧିକ ଜଟିଳ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ ବର୍ଷ ସ୍ନାନଯାତ୍ରା ବିଶୃଙ୍ଖଳା ପରେ ଚଳିତ ବର୍ଷ ଶୃଙ୍ଖଳିତ କରିବା ପାଇଁ ଉଦ୍ୟମ ଆରମ୍ଭ କରିଛି ଜିଲ୍ଲା ପ୍ରଶାସନ । ସ୍ନାନବେଦୀରେ ଓ ରଥ ଉପରେ ଅଧିକୃତ ପାଳିଆ ସେବାୟତଙ୍କ ତାଲିକା ଦେବା ପାଇଁ ଶ୍ରୀମନ୍ଦିର ପ୍ରଶାସନକୁ ଚିଠି ଲେଖିଛନ୍ତି ପୁରୀ ଏସପି ।
ସେପଟେ ଶ୍ରୀବିଗ୍ରହ ସ୍ପର୍ଶ ପ୍ରସଙ୍ଗରେ ସେବାୟତଙ୍କ ଉପରେ କଟକଣା ନିଷ୍ପତିକୁ ନେଇ ଏବେ ଅସନ୍ତୋଷ ବଢିବାରେ ଲାଗିଛି । ଆଜି ଅପରାହ୍ନରେ ହେବାକୁ ଥିବାକୁ ବୈଠକରେ ଏହି ପ୍ରସଙ୍ଗକୁ ନେଇ ତମ୍ବିତୋଫାନ ହେବାର ସମ୍ଭାବନା ରହିଛି । ପୁଣି ଆସନ୍ତାକାଲି ଶ୍ରୀମନ୍ଦିର ପରିଚାଳନା କମିଟି ବୈଠକ ହେବ । କମିଟି ସଭାପତି ଗଜପତି ଏହି ସ୍ପର୍ଶ ପ୍ରସଙ୍ଗରେ ସୃଷ୍ଟି ହୋଇଥିବା ବିବାଦ ଉପରେ ଗୁରୁତ୍ୱ ଦେଲେ ସମାଧାନବାଟ ଫିଟିବ ବୋଲି ଆଶା ରଖିଛନ୍ତି ସେବାୟତ ।