କନକ ବ୍ୟୁରୋ: ଆଜି ହେଉଛି ବନ୍ଧୁତ୍ୱର ଦିବସ । ବନ୍ଧୁ ପାଇଁ ଦିନଟିଏ । ହାତରେ ଫ୍ରେଣ୍ଡସିପ ବ୍ୟାଣ୍ଡ ପିନ୍ଧାଇ ପରସ୍ପରକୁ ଆଲିଙ୍ଗନ କରି ବନ୍ଧୁତ୍ୱର ପରିଭାଷାକୁ ଜଣାଇଥାନ୍ତି । ଏହି ଖାସ୍ ଦିନଟିକୁ ଆହୁରୀ ବି ଖାସ୍ କରିବାକୁ ବି ଲୋକେ ପଛାଇନଥାନ୍ତି । କେହି ଏକାଠି ହୋଇ ବୁଲିବାକୁ ଯାଆନ୍ତି ତ ପୁଣି କେହି ଏକାଠି ହୋଇ ବଣଭୋଜି କରି ଏହି ଦିନଟିକୁ ସେଲିବ୍ରେଟ କରିଥାନ୍ତି କିନ୍ତୁ ସମସ୍ତଙ୍କର ଏକମାତ୍ର ଉଦ୍ଦେଶ୍ୟ ହେଲା ବନ୍ଧୁଙ୍କ ପାଇଁ ଗୋଟିଏ ଦିନ । ଏହି ଗୋଟିଏ ଦିନରେ ପୁରୁଣ ରାଗରୁସାକୁ ଭୁଲିଯାଇ ପରସ୍ପରକୁ ଆଲିଙ୍ଗନ କରି ଏହି ସଂପର୍କକୁ ଆଉ ଗୋଟିଏ ସୁଯୋଗ ଦେବାକୁ ସମସ୍ତେ ଚାହିଁଥାନ୍ତି । ହେଲେ କିଏ ଜାଣିଥିଲା ଏହି ଦିନଟି କାହାପାଇଁ କାଳ ହୋଇଯିବ ବୋଲି । ଆଜିର ଦିନରେ ଏଭଳି ଏକ ମର୍ମନ୍ତୁଦ ଘଟଣା ଘଟିଛି ବଲାଙ୍ଗିରର ମାଲପଡା ଅଂଚଳରେ । ଯେଉଁଠି ପିଲାବେଳର ତିନିଜଣ ବନ୍ଧୁଙ୍କର ସଡକ ଦୁର୍ଘଟଣାରେ ଜୀବନ ଦୀପ ଲିଭିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବଲାଙ୍ଗିରର ମାଲପଡା ଅଂଚଳରେ ରହୁଥିବା ଲଲିତ କର, ଅଚ୍ୟୁତ ବଗର୍ତ୍ତି ଏବଂ ରାଜେଶ ବାଗ ହେଉଛନ୍ତି ଘନିଷ୍ଠ ବନ୍ଧୁ । ପିଲାଟି ଦିନରୁ ଏମାନେ ସମସ୍ତେ ଏକାଠି ପାଠପଢିବା ସହିତ ସବୁକାମ ଏକାଠି ମିଶି କରୁଥିଲେ । ଆଉ ପ୍ରତିବର୍ଷ ମଧ୍ୟ ବନ୍ଧୁତ୍ୱର ଦିବସଟିକୁ ନିଆରା ଢଙ୍ଗରେ ପାଳନ କରୁଥିଲେ । ଏଥରକ ବି ଏଭଳି କିଛି ଯୋଜନା କରିଥିଲେ ଲଲିତ, ଅଚ୍ୟୁତ ଏବଂ ରାଜେଶ । ହେଲେ ସେମାନଙ୍କୁ କଣ ଜଣା ଥିଲା କି ଗତରାତିର ସେଇ କାଳ ମୁହୂର୍ତ୍ତ ସେମାନଙ୍କ ବନ୍ଧୁତ୍ୱରେ ସବୁଦିନ ପାଇଁ ପୂର୍ଣ୍ଣଚ୍ଛେଦ ଟାଣିଦେବ ବୋଲି । ଗତକାଲି କୌଣସି ଏକ କାମରେ ସାଥିହୋଇ ତିନି ବନ୍ଧୁ ବାଇକରେ ବସି ବଜାର ଯାଇଥିଲେ ଏବଂ ଫେରୁ ଫେରୁ ବହୁତ ବିଳମ୍ବ ହୋଇଯାଇଥିଲା । ଫେରୁଥିବା ସମୟରେ ନିଛାଟିଆ ରାସ୍ତାରେ ସେମାନଙ୍କୁ କୌଣସି ଏକ ଅଜଣା ଗାଡି ଧକ୍କା ଦେଇ ଚାଲିଯାଇଥିଲା ଆଉ ଘଟଣାସ୍ଥଳରେ ହିଁ ଏକାବେଳେ ତିନି ବନ୍ଧୁଙ୍କ ଜୀବନ ଦୀପ ଲିଭିଯାଇଥିଲା । ତିନିବନ୍ଧୁଙ୍କର ସବୁ ଆଶା ଓ ସ୍ୱପ୍ନ ଜୁଇର ନିଆଁରେ ସବୁଦିନ ପାଇଁ ଜଳିଗଲା ।
ଗତକାଲି ରାତି ପ୍ରାୟ ସାଢେ ୧୨ଟା ସମୟରେ ତିନି ଜଣ ଯାକ ବନ୍ଧୁ ବାଇକରେ ଘରକୁ ଫେରୁଥିବା ସମୟରେ ବଲାଙ୍ଗୀର ପୁଇନ୍ତଳା ସାତମାଇଲ ନିକଟରେ ଅଜଣା ଗାଡି ଧକ୍କାରେ ୩ ବନ୍ଧୁଙ୍କର ଅକାଳ ବିୟୋଗ ଘଟିଛି । ଆଜି ଭୋରୁ ପୁଲିସ ଘଟଣାସ୍ଥଳରେ ପହଂଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି ।