ଆତଙ୍କୀଙ୍କ ଟାର୍ଗେଟରେ ଲାଲକିଲ୍ଲା ! ସତର୍କ କଲା ଗୁଇନ୍ଦା ବିଭାଗ, ଆଫଗାନିସ୍ତାନ ପାସପୋର୍ଟରେ ଦିଲ୍ଲୀରେ ପଶିବାକୁ ଆତଙ୍କବାଦୀଙ୍କ ଯୋଜନା ।
କନକ ବ୍ୟୁରୋ : ଆତଙ୍କୀ ଟାର୍ଗେଟରେ ଲାଲକିଲ୍ଲା । ଲାଲକିଲ୍ଲାରେ ହୋଇପାରେ ବଡ ଧରଣର ଆକ୍ରମଣ ।ଏନେଇ ଦିଲ୍ଲୀ ପୋଲିସକୁ ଆଲର୍ଟ କଲା ଜାତୀୟ ସୁରକ୍ଷା ଏଜେନ୍ସି । ଦେଶରେ ଆଗକୁ ସ୍ୱାଧୀନତା ଦିବସ ପାଳନ ହେବାକୁ ଥିବା ବେଳେ ଏହାପୂର୍ବରୁ ହାଇଆଲର୍ଟ ଜାରି କରିଛି ସୁରକ୍ଷା ଏଜେନ୍ସି । ସ୍ୱାଧିନତା ଦିବସ ପାଳନ ପୂର୍ବରୁ ରାଜଧାନୀ ଦିଲ୍ଲୀରେ ଆତଙ୍କ ସୃଷ୍ଟି କରିବାକୁ ଆତଙ୍କବାଦୀ ଗୋଷ୍ଠୀ ପକ୍ଷରୁ ବ୍ଲୁ-ପ୍ରିଣ୍ଟ ପ୍ରସ୍ତୁତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, ଆଫଗାନିସ୍ତାନ ପାସପୋର୍ଟରେ ଆତଙ୍କବାଦୀ ମାନେ ଦିଲ୍ଲୀରେ ପ୍ରବେଶ କରିବା ସହ ଏଭଳି ଆକ୍ରମଣ କରିପାରନ୍ତି । ଲାଲକିଲ୍ଲାର ୩ କିଲୋମିଟର ପରିଧି ମଧ୍ୟରେ ଆକ୍ରମଣ ହୋଇପାରେ । ସୁରକ୍ଷା ଏଜେନ୍ସିଙ୍କ ମୁତାବକ, ସ୍ୱରେଜ ଲାଇନ, ସୁଡଙ୍ଗ କିମ୍ବା ଅନ୍ୟ ବାଟରେ ଆକ୍ରମଣ କରିପାରନ୍ତି । ଆତଙ୍କବାଦୀ ମାନେ ସରକାରୀ ପୋଷାକ ଓ ଗାଡି ବ୍ୟବହାର କରିବା ସହ ଆକ୍ରମଣରେ ଆଇଡି ବ୍ୟବହାର କରିପାରନ୍ତି ।
ଗୁଇନ୍ଦା ସୂଚନା ଅନୁଯାୟୀ, ୩ରୁ ୪ ଜଣ ଆତଙ୍କବାଦୀ ଦିଲ୍ଲୀରେ ପ୍ରବେଶ କରି ଏହି ଆକ୍ରମଣ କରିପାରନ୍ତି । ବିଭିନ୍ନ ସଦିଗ୍ଧ କଲକୁ ଯାଞ୍ଚ କରିବା ପରେ ଗୁଇନ୍ଦା ବିଭାଗ ଏଭଳି ଆଶଙ୍କା କରିଛି । ଏହାଛଡା ଦେଶର ବିଭିନ୍ନ ବିମାନବନ୍ଦରରେ ମଧ୍ୟ ଆକ୍ରମଣ ନେଇ ସର୍ତକ ସୂଚନା ଜାରି କରିଛି ଗୁଇନ୍ଦା ବିଭାଗ । ତେଣୁ ପ୍ରତ୍ୟେକ ବିମାନ ବନ୍ଦରରେ ସୁରକ୍ଷା ବ୍ୟବସ୍ଥାକୁ କଡାକଡି କରିବା ସହ ହାଇ ଆଲର୍ଟ ଜାରି କରାଯାଇଛି । ଏପରିକି ଭିଭିଆଇପି ଶ୍ରେଣୀର ବ୍ୟକ୍ତି ମଧ୍ୟ ଆତଙ୍କବାଦୀଙ୍କ ଟାର୍ଗେଟରେ ଥିବା କହିଛି ଗୁଇନ୍ଦା ବିଭାଗ ।
ଆତଙ୍କୀ ହମଲାକୁ ଦୃଷ୍ଟିରେ ରଖି ଦିଲ୍ଲୀରେ ସୁରକ୍ଷା ବ୍ୟବସ୍ଥାକୁ କଡାକଡି କରିବାକୁ କହିଛି ଗୁଇନ୍ଦା ବିଭାଗ । ସଦିଗ୍ଧ ବ୍ୟକ୍ତି କିମ୍ବା ସଦିଗ୍ଧ ଗାଡିକୁ ବାରମ୍ବାର ଯାଞ୍ଚ କରିବାକୁ କହିଛି ଗୁଇନ୍ଦା ବିଭାଗ । ଆତଙ୍କୀ ଆକ୍ରମଣ କରି ଭାରତରେ ଅସ୍ଥିରତା ସୃଷ୍ଟି କରିବାକୁ ପାକିସ୍ତାନ ଚାହୁଁଥିବା କହିଛି ଗୁଇନ୍ଦା ବିଭାଗ ।