କନକ ବ୍ୟୁରୋ : ବରଗଡ ଗସ୍ତରେ ରାଜ୍ୟ ସରକାରଙ୍କ ତିନିଜଣିଆ ଟିମ୍ । ଚାଷୀ ମୃତ୍ୟୁ ଓ ଚକଡା ପୋକ ଲାଗି ଫସଲ ନଷ୍ଟ ଘଟଣାର ତଦନ୍ତ କରିବେ ଏହି ତିନି ଜଣିଆ ଟିମ୍ । ବରଗଡରେ ପହଂଚିଛନ୍ତି କୃଷି ଉପନିର୍ଦେଶକ ପ୍ରମୋଦ ମହାନ୍ତିଙ୍କ ସମେତ ତିନି ଜଣିଆ ଟିମ୍ । ଏହି ଟିମ୍ ମୃତ ଚାଷୀ ବୃନ୍ଦାବନ ସାହୁଙ୍କ ଘରକୁ ଯାଇ ତାଙ୍କ ଆତ୍ମହତ୍ୟାର ସତ୍ୟାସତ ଖୋଜିବେ । ଜିଲ୍ଲା ପ୍ରଶାସନର ଅଧିକାରୀଙ୍କ ସହ ଏମାନେ ଚାଷୀର ଜମିକୁ ଯାଇ ଚାଷର କ୍ଷୟକ୍ଷତି ବାବଦରେ ମଧ୍ୟ ତଥ୍ୟ ସଂଗ୍ରହ କରିବେ । ଘଟଣାର ତଦନ୍ତ କରି ରିପୋର୍ଟ ଦେବା ପାଇଁ ଜିଲ୍ଲାପାଳଙ୍କୁ ନିର୍ଦେଶ ଦେଇଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଜମିରେ ନିଆଁ ଲଗାଇବା ପରେ ଆତ୍ମହତ୍ୟା କରିଥିବା ଚାଷୀ ବୃନ୍ଦାର ମୃତଦେହ ରଖି ବରଗଡର କଳାପାଣିରେ ଚାଲିଥିବା ରାସ୍ତାରୋକ ପ୍ରତ୍ୟାହୃତ ହୋଇଛି । ପ୍ରାୟ ୧୬ ଘଂଟା ଧରି ରାସ୍ତାରୋକ ଚାଲିଥିଲା । ଗତକାଲି ରାତିରେ ଶବ ବ୍ୟବଚ୍ଛେଦ ହେବା ପରେ ମୃତଦେହ କଳାପାଣିକୁ ଅଣାଯାଇଥିଲା । ଏହା ପରେ ଆରମ୍ଭ ହୋଇଯାଇଥିଲା ରାସ୍ତାରୋକ । କୃଷକ ନେତା ଲିଙ୍ଗରାଜଙ୍କ ନେତୃତ୍ୱରେ ଲୋକମାନେ ମୃତଦେହଙ୍କୁ ୫୩ ନମ୍ବର ଜାତୀୟ ରାଜପଥରେ ରଖି ରାସ୍ତାରୋକ କରିଥିଲେ ।
ଚକଡା ପୋକ ନିରାକରଣ ପାଇଁ ଚାଷୀମାନେ ବାରମ୍ବାର ପ୍ରଶାସନର ଦ୍ୱାରସ୍ଥ ହେଉଥିଲେ ବି କିଛି ପଦକ୍ଷେପ ନିଆଯାଉନାହିଁ । ତେଣୁ ଖୋଦ କୃଷିମନ୍ତ୍ରୀ ଆସି ଆଲୋଚନା କରିବାକୁ ଆନ୍ଦୋଳନକାରୀମାନେ ଦାବି କରିଥିଲେ । ଆନ୍ଦୋଳନ ଯୋଗୁଁ ୫୩ ନମ୍ବର ଜାତୀୟ ରାଜପଥରେ ଶହ ଶହ ଗାଡି ଅଟକି ରହିଥିଲା । ପରସ୍ଥିତି ଦୃଷ୍ଟିରେ ରଖି ଜିଲ୍ଲାପାଳ, ଏସପି ଓ ବରିଷ୍ଠ ଅଧିକାରୀ ଓ ସ୍ଥାନୀୟ ବିଧାୟକ ଘଟଣାସ୍ଥଳରେ ପହଂଚିଥିଲେ । ମୃତ ଚାଷୀଙ୍କ କ୍ଷତିପୂରଣ ମିଳିବ ବୋଲି ପ୍ରତିଶ୍ରୃତି ମିଳିବା ପରେ ଭୋର ୪ଟାରେ ରାସ୍ତାରୋକ ହଟିଥିଲା । ପରେ ମୃତ ଚାଷୀ ବୃନ୍ଦାଙ୍କ ଶବତ୍ସକାର କରାଯାଇଛି । ଚକଡା ପୋକ ଯୋଗୁଁ ବୃନ୍ଦା ମଙ୍ଗଳବାର ଦିନ ନିଜ ଜମିରେ ନିଆଁ ଲଗାଇଦେବା ପରେ ଗତକାଲି ଆତ୍ମହତ୍ୟା କରିଥିଲେ ।