ଆଉ ୪୫ ଦିନ, ବଦଳିଯିବ କଂଗ୍ରେସର କାୟା ! ତାରାଙ୍କ ବିରୋଧରେ ହୋଇପାରେ କାର୍ଯ୍ୟାନୁଷ୍ଠାନ. . କନକ ନ୍ୟୁଜ୍ ୱେବ୍ ଏକ୍ସକ୍ଲୁସିଭ୍
କଂଗ୍ରେସରେ ରାଜ୍ୟ ସଭାପତି ପରିବର୍ତ୍ତନ ପାଇଁ ଦାବି ହେଉଛି । ପ୍ରସାଦଙ୍କ ହଟାଇବାକୁ ଗୋଟିଏ ଗୋଷ୍ଠୀର ଦାବି ଦିଲ୍ଲୀରେ ଲବି କରିଛନ୍ତି । ଏପରିକି ରାହୁଲ ଗାନ୍ଧୀ ରାଜ୍ୟର ବରିଷ୍ଠ ନେତାଙ୍କ ସହ ଆଲୋଚନା କରି ମନ୍ତ୍ରଣା ମଧ୍ୟ କରିଥିଲେ । ହେଲେ ହଠାତ୍ ଏହାପରେ ସଭାପତି ପରିବର୍ତ୍ତନ ପ୍ରକ୍ରିୟା ଅଟକି ଯାଇଥିଲା । କାହିଁକି ପ୍ରସାଦ ବଦଳିଲେନି, କଂଗ୍ରେସର ଓଡିଶା ଶାଖାକୁ ରାହୁଲ ଗୁରୁତ୍ୱ ଦେଉଛନ୍ତି କି ନାହିଁ, ସେନେଇ କଳ୍ପନା ଜଳ୍ପନା ପ୍ରକାଶ ପାଇଲା । ହେଲେ ଏହାରି ଭିତରେ କନକ ନ୍ୟୁଜ ହାତରେ ଲାଗିଛି ଏକ୍ସକ୍ଲୁସିଭ୍ ତଥ୍ୟ ।
Kanak News is now on WhatsApp
Join and get latest news updates delivered to you via WhatsApp
ଅତି ବିଶ୍ୱସ୍ତ ସୁତ୍ରରୁ ମିଳିଥିବା ସୂଚନା ଅନୁସାରେ, ଆଉ ୪୫ ଦିନ ଭିତରେ ବଦଳିବେ ପିସିସି ସଭାପତି ପ୍ରସାଦ ହରିଚନ୍ଦନ । ଏହାପଛରେ ରହିଛି ଏକ ସୁଚିନ୍ତିତ ରଣନୀତି । ନା ପ୍ରସାଦ ଅପମାନିତ ହେବେ, ନା ନିର୍ବାଚନ ବିପର୍ଯ୍ୟୟ ବୋଝ ଲଦି ତାଙ୍କୁ ସଭାପତି ପଦରୁ ବାହାର କରାଯିବ, ଏହାର ମଝି ବାଟ ହାଇକମାଣ୍ଡ ଖୋଜି ବାହାର କରିଛନ୍ତି । ସର୍ବଭାରତୀୟ ସ୍ତରରେ କଂଗ୍ରେସର ଏବେ ସାଂଗଠନିକ ନିର୍ବାଚନ ହେବ । ଜାତୀୟ ନିର୍ବାଚନ କମିଶନ ଏନେଇ କଂଗ୍ରେସ ହାଇକମାଣ୍ଡଙ୍କୁ ଅବଗତ କରାଇ ସାରିଛନ୍ତି । ଯଦି ଅକ୍ଟୋବର ୧୫ ସୁଧା କଂଗ୍ରେସ ସାଂଗଠନିକ ନିର୍ବାଚନ କାର୍ଯ୍ୟ ନସାରେ ତେବେ ଦଳ ମାନ୍ୟତା ହରାଇବାର ଆଶଙ୍କା ରହିଛି । ସେଦୃଷ୍ଟିରୁ ସର୍ବଭାରତୀୟ ସ୍ତରରେ ଏବେ ଆରମ୍ଭ ହୋଇଛି ସାଂଗଠନିକ ନିର୍ବାଚନ ପ୍ରକ୍ରିୟା ।
ଆଉ ଏହାକୁ ଆୟୁଧ କରି ରାଜ୍ୟରେ ପିସିସି ସଭାପତି ପରିବର୍ତ୍ତନ ପ୍ରକ୍ରିୟାକୁ ଅଟକାଇ ଦେଇଛନ୍ତି ହାଇକମାଣ୍ଡ । ସାଂଗଠନିକ ନିର୍ବାଚନ ଭିତରେ ହିଁ ପ୍ରସାଦ ବଦଳିଯିବେ । ତେଣୁ ରାଜନୈତିକ ସ୍ତରରେ ଆଉ ଭୁଲ ବାର୍ତ୍ତା ଯିବନି । ତେଣୁ ପଂଚାୟତ ନିର୍ବାଚନ ପରେ ପରେ ପ୍ରସାଦଙ୍କ ପଡଦ ଯିବାନେଇ ଯେଉଁ ଆଶଙ୍କା ସୃଷ୍ଟି ହୋଇଥିଲା ସେଥିରେ ସାମୟିକ ବ୍ରେକ ଲାଗିଛି । ପ୍ରସାଦ ହରିଚନ୍ଦନ ପିସିସି ପଦରୁ ହଟିବା ସ୍ପଷ୍ଟ ହୋଇଯାଇଥିବା ବେଳେ, ଖାଲି ସମୟକୁ ଏବେ ଗୁରୁତ୍ୱ ଦିଆଯାଉଛି ।
ଗୋଟିଏ ପଟେ ପ୍ରସାଦ ହରିଚନ୍ଦନ ସଭାପତି ପଦରୁ ବଦଳୁନଥିବା ବେଳେ ଅନ୍ୟପଟେ ଦଳୀୟ ରାଜନୀତି ଏବେ ରୋଚକ ମୋଡରେ ପହଂଚିଛି । ପ୍ରସାଦଙ୍କୁ ଗୋଟିଏ ଗୋଷ୍ଠୀ ଲଗାତର ବିରୋଧ କରି ଆସୁଛନ୍ତି । ଏପରିକି ଚାଲିଛି ବେଲଗାମ ବୟାନବାଜୀ । ଆଉ ଏହାରି ଭିତରେ କନକ ନ୍ୟୁଜକୁ ମିଳିଛି ଆଉ ଏକ ଏକ୍ସକ୍ଲୁସିଭ ତଥ୍ୟ ।
ଅତି ବିଶ୍ୱସ୍ତ ସୁତ୍ରରୁ ମିଳିଥିବା ସୂଚନା ଅନୁସାରେ, ବିରୋଧୀ ଦଳ ମୁଖ୍ୟ ସଚେତକ ତାରା ପ୍ରସାଦ ବାହିନୀପତିଙ୍କୁ କଂଗ୍ରେସ ଦଳରୁ ସସପେଣ୍ଡ କରିବାର ଯଥେଷ୍ଟ ସମ୍ଭାବନା ରହିଛି । ଏନେଇ ହାଇକମାଣ୍ଡ ମନସ୍ଥ କରିନେଇଥିବା ସୂଚନା ମିଳିଛି । ତେବେ ସମୟକୁ ଅପେକ୍ଷା କରାଯାଇଛି । କଂଗ୍ରେସର ଶୀର୍ଷ ସ୍ତରରୁ ମିଳିଥିବା ସୂଚନା ଅନୁସାରେ, ଯେତେବେଳେ ରାହୁଲ ଗାନ୍ଧୀ ରାଜ୍ୟର ବହୁ ନେତାଙ୍କୁ ଦିଲ୍ଲୀ ଡକାଇ ସଂଗଠନ ବାବଦରେ ଆଲୋଚନା କରିଥିଲେ, ସେତେବେଳେ ତାରା ପ୍ରସାଦ ବାହିନୀପତିଙ୍କୁ ରାହୁଲ ଭେଟିନଥିଲେ । ଏପରିକି ଅତିରିକ୍ତ ଦୁଇ ଦିନ ଦିଲ୍ଲୀରେ ରହି ତାରା ବାହିନୀପତି ରାହୁଲଙ୍କୁ ଭେଟିବାକୁ ଉଦ୍ୟମ କରିଥିଲେ ବି ବିଫଳ ହୋଇଥିଲେ ।
ଖାଲି ତାରା ପ୍ରସାଦ ବାହିନୀପତି ନୁହଁନ୍ତି ବରଂ ବିଧାୟକ ପ୍ରଫଲ୍ଲ ମାଝୀ ଓ ଯୋଗେଶ ସିଂଙ୍କ ଉପରେ ମଧ୍ୟ ଖୁସି ନାହାନ୍ତି ରାହୁଲ । ଏହି ତିନି ନେତାଙ୍କୁ ରାହୁଲ ଦିଲ୍ଲୀରେ ଭେଟିନଥିଲେ । ରାଜ୍ୟ କଂଗ୍ରେସର ୪୦ ତୁଙ୍ଗ ନେତା ଦିଲ୍ଲୀ ଯାଇ ରାହୁଲଙ୍କୁ ଭେଟି ଆଲୋଚନା କରିବା ତାଲିକାରେ ଏମାନଙ୍କ ନାଁ ଥିଲା, ହେଲେ ଶେଷ ମୁହୁର୍ତ୍ତରେ ନାଁକୁ କାଟି ଦିଆଯାଇଥିଲା । ଯାହା ଏହି ବିଧାୟକଙ୍କ ପାଇଁ ବେଶ ଅପମାନଜନକ ଥିଲା । ଏପରିକି ଦିଲ୍ଲୀରେ ରହି ରାହୁଲଙ୍କୁ ଭେଟିବାକୁ ଉଦ୍ୟମ କରିବା ସତ୍ତେ୍ୱ ରାହୁଲ ସମୟ ଦେଇନଥିଲେ ।
ସୂଚନା ଅନୁସାରେ, ତାରାଙ୍କୁ ପୂର୍ବରୁ ଦଳରୁ ସସପେଣ୍ଡ କରିବାକୁ ହାଇକମାଣ୍ଡ ନିଷ୍ପତ୍ତି ନେଇସାରିଥିଲେ । ଯଦି ତାରା ବାହିନୀପତି ସେ ସମୟରେ ଦଳରୁ ସସପେଣ୍ଡ ହୋଇଥାନ୍ତେ, ତେବେ ବିଧାନସଭାରେ ବିରୋଧୀଦଳର ମାନ୍ୟତା ହରାଇଥାନ୍ତା କଂଗ୍ରେସ । କାରଣ ଆବଶ୍ୟକୀୟ ସଂଖ୍ୟା ଆଉ ଦଳ ପାଖରେ ରହିବନି । ଅନୁମାନ କରାଯାଉଛି, ଏଭଳି କିଛି ସଂକେତର ଆଶଙ୍କା କରି ସେହି ସମୟରେ ବିରୋଧୀଦଳ ନେତା ନରସିଂହ ମିଶ୍ର ନାଲିବତୀ ବ୍ୟବହାର କରିବାକୁ ମନା କରିଦେଇଥିଲେ । ସୂଚନା ଅନୁସାରେ, ବିରୋଧୀଦଳ ନେତାଙ୍କ ମାନ୍ୟତା ହରାଇବା ଆଗରୁ ନାଲିବତୀ ଛାଡିବାକୁ ନରସିଂହ ନିଷ୍ପତ୍ତି ନେଇଥିଲେ । କିନ୍ତୁ ସେତେବେଳେ ନରସିଂହ କହିଥିଲେ, ଭିଆଇପି କଲଚରକୁ ସାରିବାକୁ ସେ ଏଭଳି ନିଷ୍ପତ୍ତି ନେଇଛନ୍ତି ।
ଆଗାମୀ ଦିନରେ ଓଡିଶାରେ ହେବାକୁ ଥିବା ସାଂଗଠନିକ ନିର୍ବାଚନ ସମୟରେ ଅନେକ ପରିବର୍ତ୍ତନ ଦେଖିବାକୁ ମିଳିପାରେ । ଯେଉଁ ଜିଲ୍ଲାରେ ଜିଲ୍ଲା ସଭାପତି ବଦଳାଇବାକୁ ଚାହିଁବେ ସେତେବେଳେ ଏହାକୁ ମାଧ୍ୟମ କରାଯିବ । କୁହାଯାଉଛି, ଏହି ସମୟ ବେଳେ ତାରା ବାହିନୀପତିଙ୍କୁ ଦଳରୁ ସସପେଣ୍ଡ କରାଯିବ । ଆଗାମୀ ୪୫ ଦିନରେ କଂଗ୍ରେସ ରାଜନୀତି ଏଭଳି କିଛି ରୋଚକ ମୋଡ ନେବାକୁ ଯାଉଛି । ଯେଉଁଥିରେ ପିସିସି ସଭାପତି ବଦଳିବେ, ତାରାଙ୍କ ବିରୋଧରେ ବଡ ଧରଣର କାର୍ଯ୍ୟାନୁଷ୍ଠାନ ହେବ, କିଛି ବିଧାୟକଙ୍କୁ କାରଣ ଦର୍ଶାଅ ନୋଟିସ୍ ଦିଆଯିବ ଆଉ ଦଳର ସାଂଗଠନିକ ସ୍ଥିତି ମଜଭୁତ କରିବାକୁ ଉଦ୍ୟମ କରାଯିବ । ହେଲେ ବଡ କଥା ହେଉଛି, ଏହାର ପ୍ରଭାବ ଆଗାମୀ ଦିନରେ କଂଗ୍ରେସ ରାଜନୀତି ଉପରେ କଣ ରହିବ ।