କନକ ବ୍ୟୁରୋ: ତାମିଲନାଡ଼ୁ ସରକାରଙ୍କ ବଡ଼ ଘୋଷଣା । ସ୍କୁଲ ଛାତ୍ର ଛାତ୍ରୀଙ୍କୁ ଡିଜିଟାଲ ଏଜୁକେସନ ଅଭିଯାନରେ ଯୋଡିବା ପାଇଁ ଇ ପଲାନିସାମୀ ସରକାର ରାଜ୍ୟରେ ମାଗଣାରେ ଲ୍ୟାପଟପ୍ ବିତରଣ କରିବା ପାଇଁ ଯୋଜନା କରିଛନ୍ତି । ସୂଚନା ମୁତାବକ ତାମିଲନାଡ଼ୁର ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀଙ୍କୁ ଲ୍ୟାପଟପ୍ ପ୍ରଦାନ କରିବାକୁ ନିର୍ଣ୍ଣୟ ନେଇଛନ୍ତି ଇ ପଲାନିସାମୀ ସରକାର ।
Kanak News is now on WhatsApp
Join and get latest news updates delivered to you via WhatsApp
ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଦ୍ଵାରା ଆରମ୍ଭ କରାଯାଇଥିବା ଏହି ଯୋଜନାକୁ ଆଗକୁ ବଢାଇ ବର୍ତ୍ତମାନ ସରକାର ସ୍କୁଲ ପିଲାଙ୍କ ପାଇଁ ନୂଆ ବର୍ଷ ଭେଟି ଦେଇଛନ୍ତି । ଏଥିପାଇଁ ଶିକ୍ଷା ବିଭାଗଠୁ ପ୍ରସ୍ତାବ ମଧ୍ୟ ମଗାଯାଇଛି । ଉଲ୍ଲେଖଯୋଗ୍ୟ ତାମିଲନାଡୁରେ ଲ୍ୟାପଟପ୍ ବିତରଣର ଏ ହି ଯୋଜନାର ଆରମ୍ଭ ୨୦୧୧-୧୨ରେ ହୋଇଥିଲା । ଏହି ଯୋଜନା ଆଧାରରେ ଦ୍ଵାଦଶ ଶ୍ରେଣୀର ଛାତ୍ରଙ୍କୁ ମାଗଣାରେ ଲ୍ୟାପଟପ୍ ବିତରଣ କରାଯାଉଥିଲା। ଏବେ ନବମ ଓ ଦଶମ ଶ୍ରେଣୀର ଛାତ୍ରଙ୍କୁ ମଧ୍ୟ ଏହି ଯୋଜନାରେ ସାମିଲ କରିବାକୁ ଶିକ୍ଷା ବିଭାଗଠୁ ପ୍ରସ୍ତାବ ମାଗିଛନ୍ତି ସରକାର। କେନ୍ଦ୍ର ସରକାର ମଧ୍ୟ ଏହି ଯୋଜନାରେ ରୁଚି ଦେଖାଇ ତାମିଲନାଡୁ ସରକାରଙ୍କୁ ଜରୁରୀ ଆର୍ଥିକ ସହାୟତା ଦେବାକୁ ଆଶ୍ଵାସନା ଦେଇଛନ୍ତି ବୋଲି ଜଣାପଡ଼ିଛି ।
ତାମିଲନାଡୁ ଶିକ୍ଷା ବିଭାଗର ଜଣେ ଅଧିକାରୀ କହିଛନ୍ତି ଯେ ଏହି ଯୋଜନାରେ ନବମ ଓ ଦଶମ ଶ୍ରେଣୀର ଛାତ୍ରଙ୍କୁ ସାମିଲ କଲେ ବି ରାଜ୍ୟ ସରକାରଙ୍କ ଉପରେ ଖାସ୍ ଆର୍ଥିକ ବୋଝ ପଡ଼ିବ ନାହିଁ। ତାମିଲନାଡୁରେ ଏହି ଯୋଜନାର ପ୍ରାରମ୍ଭରେ ରାଜ୍ୟ ସରକାର କେବଳ ଦ୍ଵାଦଶ ଶ୍ରେଣୀର ଛାତ୍ରଙ୍କୁ ସାମିଲ କରିଥିଲେ । ଏହା ପରେ ଏକାଦଶ ଶ୍ରେଣୀର ବିଦ୍ୟାର୍ଥୀଙ୍କୁ ସାମିଲ କରାଯାଇଥିଲା। ଏହି ଯୋଜନା ଆଧାରରେ ଏ ପର୍ୟ୍ୟନ୍ତ ମୋଟ୍ ୩୮ ଲକ୍ଷ ଛାତ୍ରଙ୍କୁ ମାଗଣାରେ ଲ୍ୟାପଟପ ବିତରଣ କରାଯାଇଛି ବୋଲି କହିଛନ୍ତି ଅଧିକାରୀ ।