ତଳସରାରେ କାହାର ହେବ ରାଜତିଳକ? କଂଗ୍ରେସର ଅଭେଦ୍ୟ ଦୁର୍ଗ ଭେଦ କରିବାକୁ ବିଜେଡିରୁ କିଏ , ପଞ୍ଚାୟତ ନିର୍ବାଚନର ସଫଳତା ଦୋହରାଇବାକୁ ବ୍ଲୁ-ପ୍ରିଣ୍ଟ କରୁଛି ବିଜେପି ।
କନକ ବ୍ୟୁରୋ : କଂଗ୍ରେସର ଗଡ କୁହାଯାଉଥିବା ତଳସରା ନିର୍ବାଚନମଣ୍ଡଳୀରେ ଚଳିତ ଥର ବିଗ୍ ଫାଇଟ ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି । ଖାସକରି ଗତ ଅଢେଇ ଦଶନ୍ଧି ଧରି ଏହି ଆସନ କଂଗ୍ରେସ କବଜାରେ ରହି ଆସିଛି । ବିଜେଡି ଗଠନ ପରଠାରୁ ଦଳ ଏଠାରେ ବିଜୟର ବାସ୍ନା ପାଇନାହିଁ । ଅନ୍ୟପଟେ ବିଜେପିର ମଧ୍ୟ ସମାନ ଅବସ୍ଥା । କଂଗ୍ରେସର ଏହି ଅଭେଦ୍ୟ ଦୁର୍ଗରେ ବିରୋଧୀ ବାରମ୍ବାର ପଶିବାକୁ ଉଦ୍ୟମ କରିଥିଲେ ମଧ୍ୟ ଏଥିରେ ଫେଲ ମାରିଛନ୍ତି । ଗତ ନିର୍ବାଚନ ଗୁଡିକରେ ନବୀନଙ୍କ ସ୍ୱଚ୍ଛ ନିର୍ମଳ ଭାବମୂର୍ତ୍ତି ଏଠାରେ କାମ କରିନଥିବା ବେଳେ ମୋଦିଙ୍କ ମ୍ୟାଜିକ ମଧ୍ୟ କଂଗ୍ରେସ ଆଗରେ ଫିକା ପଡିଛି ।
Kanak News is now on WhatsApp
Join and get latest news updates delivered to you via WhatsApp
ଅନୁସୂଚିତ ଜନଜାତିଙ୍କ ପାଇଁ ସଂରକ୍ଷିତ ତଳସରା ବିଧାନସଭା କ୍ଷେତ୍ରରେ ବିଜୟର ହ୍ୟାଟ୍ରିକ ମାରି ଆସୁଥିବା ପ୍ରଫୁଲ ମାଝୀ ଏହାକୁ କଂଗ୍ରେସର ଅଭେଦ୍ୟ ଦୁର୍ଗରେ ପରିଣତ କରିଛନ୍ତି । ପୂର୍ବରୁ ଏହି ଆସନରୁ ସର୍ବାଧିକ ୫ ଥର ବିଧାୟକ ହୋଇଥିବା ସ୍ୱର୍ଗତ ଗଜାଧର ମାଝୀଙ୍କ ଅନ୍ତେ ଏହି ଆସନର ଉତ୍ତରାଧିକାରୀ ଭାବେ ପ୍ରଫୁଲ କଂଗ୍ରେସର ଏହି ଗଡକୁ ସମ୍ଭାଳିଛନ୍ତି । କିନ୍ତୁ ନିର୍ବାଚନ ପୂର୍ବରୁ କଂଗ୍ରେସର ଏହି ଦୁର୍ଗ ଦୋହଲିବା ଆରମ୍ଭ ହୋଇଛି । ଖାସକରି ପଞ୍ଚାୟତ ନିର୍ବାଚନର ଫଳାଫଳ ତଳସରା ରାଜନୈତିକ ଗଣିତକୁ ଓଲଟପାଲଟ କରି ଦେଇଛି । ଏଭଳି ସ୍ଥିତିରେ ୨୦୧୯ ନିର୍ବାଚନରେ ତଳସରା ନିର୍ବାଚନମଣ୍ଡଳୀ ତାଜ୍ କିଏ ପିନ୍ଧିବ ତାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
୨୦୦୪ରେ ପ୍ରଥମ ଥର ପାଇଁ ବିଧାୟକ ହୋଇଥିବା ପ୍ରଫୁଲ ୨୦୦୯ରେ ନିକଟତମ ପ୍ରତିଦ୍ୱନ୍ଦୀ ବିଜେପିର ସହଦେବ ଖାଖାଙ୍କୁ ୨୦ ହଜାର ଭୋଟରେ ମାତ୍ ଦେଇ ଗଡ ରକ୍ଷା କରିଥିଲେ । ତେବେ ବିଜୟର ହ୍ୟାଟ୍ରିକ ମାରିବାକୁ ପ୍ରଫୁଲଙ୍କୁ ନାକେଦମ ହେବାକୁ ପଡିଥିଲା । କାରଣ ୨୦୧୪ ନିର୍ବାଚନରେ ପ୍ରଫୁଲଙ୍କୁ କଡା ଟକ୍କର ଦେଇଥିଲେ ବିଜେଡିର ବିନୟ ଟପ୍ପୋ । ମାତ୍ର ୧୪ ଶହ ଭୋଟରେ ବିଜୟୀ ହୋଇ ନିର୍ବାଚନ ବୈତରଣୀ ପାର କରିଥିଲେ ପ୍ରଫୁଲ । କିନ୍ତୁ ଏହା ଭିତରେ ତଳସରାରେ ପ୍ରଫୁଲଙ୍କ ବିରୋଧରେ ଜନ ଅସନ୍ତୋଷ ଦେଖିବାକୁ ମିଳିଛି । ଯାହା ପ୍ରଫୁଲଙ୍କ ପାଇଁ ଆଗାମୀ ନିର୍ବାଚନରେ ବଡ ଚ୍ୟାଲେଞ୍ଜ ସୃଷ୍ଟି କରିଛି ।
ଏପରିକି ବିଜୟର ଚୌକା ମାରିବାକୁ ନବ ଓ ଯୋଗେଶଙ୍କ ପରେ ପ୍ରଫୁଲ ମଧ୍ୟ କଂଗ୍ରେସର ହାତ ଛାଡି ବିଜେଡିକୁ ଯିବେ ବୋଲି ଚର୍ଚ୍ଚା ହେଉଥିଲା । କିନ୍ତୁ ସାରା ଜୀବନ କଂଗ୍ରେସରେ ରହିବି ବୋଲି ଘୋଷଣା କରିବା ପରେ ପ୍ରଫୁଲ ବିଜେଡିକୁ ଯିବା ନେଇ ହେଉଥିବା ଚର୍ଚ୍ଚାରେ ପୂର୍ଣ୍ଣଛେଦ ପଡିଥିଲା । ବିଧାୟକ ଥିବାରୁ ଆଗାମୀ ନିର୍ବାଚନରେ ତାଙ୍କର ଟିକେଟ ଏକପ୍ରକାର ଫାଇନାଲ ହୋଇଛି । ତେବେ ପ୍ରଫୁଲଙ୍କ ବ୍ୟତୀତ ପୂର୍ବତନ ସାଂସଦ ମୋରିସ କୁଜୁରଙ୍କ ପୁତ୍ରବଧୂ ଅନିତା କୁଜୁର, ଗେରୋଟି ଖେସ୍ ମଧ୍ୟ କଂଗ୍ରେସ ଟିକେଟ ପାଇଁ ଲବି ଆରମ୍ଭ କରିଛନ୍ତି ।
ଅନ୍ୟପଟେ ଏହି ଆସନରେ ଜନ୍ମରୁ ଜିତିନଥିବା ବିଜେଡି ଚଳିତଥର କଂଗ୍ରେସର ଅଭେଦ୍ୟ ଦୁର୍ଗକୁ ଭେଦ କରିବାକୁ ନୂଆ ରଣନୀତି ପ୍ରସ୍ତୁତ କରୁଛି । ଗତ ନିର୍ବାଚନରେ ମାତ୍ର ୧୪ ଶହ ଭୋଟରେ ପରାଜୟ ବରଣ କରିଥିବା ବିନୟ ଟପ୍ପୋ ଟିକେଟ ଆଶାୟୀ ରେସରେ ସର୍ବାଗ୍ରେ ରହିଛନ୍ତି । ଅନ୍ୟପଟେ ଏହି ଆସନ ହାତେଇବାକୁ ବିଜେଡି ବଡ ଅସ୍ତ୍ର ପ୍ରୟୋଗ କରିବାକୁ ଯାଉଛି । ମେକ୍ ଇନ୍ ଓଡିଶା କାର୍ଯ୍ୟକ୍ରମରେ ନିଜ ଭାଷଣ ଦ୍ୱାରା ମୁଖ୍ୟମନ୍ତ୍ରୀଙ୍କ ମନ ଜିଣିବା ସହ ରାତାରାତି ଷ୍ଟାର ପାଲଟିଯାଇଥିବା ଜୟନ୍ତୀ ଏକ୍କାଙ୍କୁ ପ୍ରାର୍ଥୀ କରି ଶଙ୍ଖ ଧ୍ୱନିରେ ତଳସରାକୁ ପ୍ରକମ୍ପିତ କରିବାକୁ ବିଜେଡି ଶିବିରରେ ଅଙ୍କ କଷା ଯାଉଥିବା ଚର୍ଚ୍ଚା ହେଉଛି । ଆଉ ଏହି ଚର୍ଚ୍ଚାକୁ ଅଧିକ ଖୋରାକ ଯୋଗାଉଛି ମୁଖ୍ୟମନ୍ତ୍ରୀଙ୍କ ମହିଳା କାର୍ଡ । ଏହାଛଡା ଆଶାୟୀ ତାଲିକାରେ ବାଲିଶଙ୍କରା ବ୍ଲକର ପୂର୍ବତନ ଚେୟାରମ୍ୟାନ କୁଞ୍ଜଲତା ଭିତିରିଆଙ୍କ ନାଁକୁ ନେଇ ମଧ୍ୟ ଜୋରଦାର ଚର୍ଚ୍ଚା ହେଉଛି । ଏମାନଙ୍କ ବ୍ୟତୀତ ଦାମୋଦର ମାଝି, ରମାକାନ୍ତ ସାଏ, ଷ୍ଟିଫେନ ସୋରେଙ୍ଗ, ଦେବେନ୍ଦ୍ର ମାଝୀ, ରଞ୍ଜିତ ଭିତିରିଆ, ପ୍ରବୋଧ ତିର୍କୀଙ୍କ ନାମ ବି ଆଶାୟୀ ତାଲିକାରେ ରହିଛି।
ସେହିଭଳି ପଞ୍ଚାୟତ ନିର୍ବାଚନ ଫଳାଫଳ ବିଜେପିକୁ ବଳ ଯୋଗାଇଛି । ବର୍ଷ ବିତିିବା ସହ ବିଜେପିର ଭୋଟହାର ମଧ୍ୟ ବଢି ବଢି ଚାଲିଛି । ଖାସକରି ପଞ୍ଚାୟତ ନିର୍ବାଚନର ଫଳାଫଳ ତଳସରା ରାଜନୀତିର ଗଣିତ ବଦଳାଇଦେଇଛି । ଏହି ନିର୍ବାଚନମଣ୍ଡଳୀ ଅଧିନରେ ଆସୁଥିବା ୭ଟି ଜିଲ୍ଲା ପରିଷଦ ଆସନରୁ ୫ଟିରେ ଗେରୁଆ ବାନା ଉଡାଇଥିଲା ବିଜେପି । ତେଣୁ ପଞ୍ଚାୟତ ନିର୍ବାଚନର ସଫଳତାକୁ ଚଳିତ ନିର୍ବାଚନରେ ଦୋହରାଇବାକୁ ଲକ୍ଷ୍ୟ ରଖିଛି ଦଳ । ତେବେ ବିଜେପି ପାଇଁ ଏକାଧିକ ଆଶାୟୀ ପ୍ରାର୍ଥୀ ଚିନ୍ତାର କାରଣ ପାଲଟିଛନ୍ତି । ଦଳ ପକ୍ଷରୁ ଭବାନୀ ଭୋଇ, ଧ୍ରୁବ କାଲୋ ଓ ଜଗବନ୍ଧୁ ଭୋଇ ଆଶାୟୀ ପ୍ରାର୍ଥୀ ଭାବେ ଟିକେଟ ରେସରେ ରହିଛନ୍ତି ।ତେବେ ଆଗାମୀ ନିର୍ବାଚନରେ ତଳସରାରେ କେଉଁ ଦଳର ରାଜତିଳକ କରିବେ ଭୋଟର ତାହା ଉପରେ ସମସ୍ତଙ୍କର ନଜର ରହିଛି ।