ଭୟଙ୍କର ରୂପ ନେଲା ସ୍ୱାଇନ୍ ଫ୍ଲୁ ! ଚିକିତ୍ସାଧିନ ଅବସ୍ଥାରେ ଏସସିବିରେ ଆଉ ଜଣଙ୍କର ମୃତ୍ୟୁ
କନକ ବ୍ୟୁରୋ: ଏସସିବି ମେଡିକାଲରେ ସ୍ୱାଇନ୍ ଫ୍ଲୁରେ ଆକ୍ରାନ୍ତ ଆଉ ଜଣଙ୍କର ମୃତ୍ୟୁ ହୋଇଛି । ମୃତକ ଜଣକ ହେଉଛନ୍ତି ଯାଜପୁରର ୬୦ ବର୍ଷିୟ ମହିଳା ସ୍ୱର୍ଣ୍ଣଲତା ସାହୁ । ସେ ଗତ ୩୦ ତାରିଖରେ ଗୁରୁତର ଅବସ୍ଥାରେ ଭର୍ତ୍ତି ହୋଇଥିଲାବେଳେ ତାଙ୍କର ମୃତ୍ୟୁ ହୋଇଯାଇଛି । ଫଳରେ ବଡ଼ ମେଡିକାଲରେ ସ୍ୱାଇନ୍ ଫ୍ଲୁ ଜନିତ ମୃତ୍ୟୁ ସଂଖ୍ୟା ୧୧ରେ ପହଞ୍ଚିଛି । ଗତକାଲି ଓ୍ଵାର୍ଡରୁ ୧୦ଜଣ ଏଚ୍୧ଏନ୍୧ ପଜିଟିଭ୍ ରୋଗୀ ସୁସ୍ଥ ହୋଇ ଘରକୁ ଫେରିଥିବା ସୂଚନା ଦିଆଯାଇଛି । ଫଳରେ ବର୍ତ୍ତମାନ ପୁରୁଣା ଓ୍ଵାର୍ଡରେ ୪ଜଣ ଚିକିତ୍ସିତ ହେଉଛନ୍ତି । ସେମାନଙ୍କ ମଧ୍ୟରୁ ତିନିଜଣ ଏଚ୍୧ଏନ୍୧ ପଜିଟିଭ୍ ରୋଗୀ ଥିବାବେଳେ ଅନ୍ୟଜଣେ ସନ୍ଦିଗ୍ଧ ଭାବେ ଭେଣ୍ଟିଲେଟରରେ ଅଛନ୍ତି । ଅନ୍ୟପକ୍ଷରେ ନୂଆ ଓ୍ଵାର୍ଡରେ ୮ଜଣ ରୋଗୀଙ୍କୁ ରଖାଯାଇଥିବା ନୋଡାଲ ଅଫିସର ପ୍ରଫେସର ଡାକ୍ତର ମନୋରଂଜନ ପଟ୍ଟନାୟକ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଠାରେ ଆମେ କହି ରଖୁଛୁ କି, ଗତକାଲି ସକାଳେ ମଧ୍ୟ ଏସସିବିରେ ଆଉ ଜଣେ ରୋଗୀଙ୍କର ମୃତ୍ୟୁ ଘଟିଥିଲା । ମତକ ଜଗତସିଂହପୁରର ବୋଲି ଜଣାପଡିଛି । ଏହାସହ ରାଜ୍ୟରେ ସ୍ୱାଇନ ଫ୍ଲୁ ମୃତକଙ୍କ ସଂଖ୍ୟା ୩୩ରେ ପହଂଚିଛି । ତେବେ ଚିକିତ୍ସା ସତ୍ୱେ ମୃତ୍ୟୁ ସଂଖ୍ୟା ବଢିଚାଲିବା ଏସସିବି କର୍ତ୍ତୃପକ୍ଷଙ୍କ ଚିନ୍ତା ବଢାଇ ଦେଇଛି ।
ସେହିପରି ଆକ୍ରାନ୍ତଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି । ରାଜ୍ୟରେ ମୋଟ ସ୍ୱାଇନ ଫ୍ଲୁ ଆକ୍ରାନ୍ତଙ୍କ ସଂଖ୍ୟା ୩ ୩୦ ରହିଛି । ଯାହା ୨୦୧୦ର ସର୍ବାଧିକ ୯୯ଜଣ ଆକ୍ରାନ୍ତଙ୍କ ସଂଖ୍ୟାକୁ ପାର କରିଛି । ବର୍ଷା ଲାଗିରହିଥିବା ଯୋଗୁଁ ଆକ୍ରାନ୍ତଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି ।
ସ୍ୱାସ୍ଥ୍ୟ ବିଭାଗର ସୂଚନା ଅନୁଯାୟୀ, ଗୁରୁବାର ୩୮ଟି ସ୍ୱାବ୍ ନମୁନା ପରୀକ୍ଷା ପାଇଁ ଆରଏମଆରସିକୁ ପଠାଯାଇଥିଲା । ଏଥିରେ ୧୨ଟି ନମୁନା ପଜିଟିଭ୍ ରହିଛି । ଏହାକୁ ମିଶାଇ ରାଜ୍ୟରେ ଚଳିତବର୍ଷ ୩୨୯ଜଣ ଚିହ୍ନଟ ହୋଇଛନ୍ତି । ଏଥିରେ ଖୋର୍ଦ୍ଧା ଜିଲ୍ଲାର ୬ଜଣ ଥିବା ବେଳେ କଟକ, ଭଦ୍ରକ, ଯାଜପୁର, କେନ୍ଦୁଝର, ମୟୂରଭଞ୍ଜ ଓ ସୋନପୁରର ଜଣେ ଲେଖାଏଁ ଆକ୍ରାନ୍ତ ରହିଛନ୍ତି । ଏଥିରୁ ଏସସିବିରେ ଜଣେ ଚିକିତ୍ସିତ ହେଉଥିବା ବେଳେ ଅନ୍ୟମାନେ ରାଜଧାନୀର ବିଭିନ୍ନ ଘରୋଇ ହସ୍ପିଟାଲରେ ସେମାନଙ୍କ ଚିକିତ୍ସା ଜାରି ରହିଛି । ଆକ୍ରାନ୍ତଙ୍କ ମଧ୍ୟରେ ୯ଜଣ ପୁରୁଷ ଓ ୩ଜଣ ମହିଳା ରହିଥିବା ବେଳେ ଏଥିରେ ୫ବର୍ଷର ଶିଶୁ ରହିଛି । ପୁରୁଷଙ୍କ ବୟସ ୩୬, ୩୭, ୫୫, ୫୬, ୬୧, ୬୭, ୬୮ ଓ ୭୫ ଥିବା ବେଳେ ମହିଳାଙ୍କ ବୟସ ୪୫, ୫୭ ଓ ୬୯ବର୍ଷ ବୋଲି ଜଣାପଡ଼ିଛି । ଚଳିତବର୍ଷ ଏ ପର୍ଯ୍ୟନ୍ତ ୯୭୮ଟି ସ୍ୱାବ୍ ନମୁନା ପରୀକ୍ଷା ହୋଇଛି ।
ମଙ୍ଗଳବାର ୨୯ଟି ନମୁନା ଆରଏମଆରସିକୁ ପରୀକ୍ଷା ପାଇଁ ପଠାଯାଇଥିଲା । ଏଥିରୁ ୧୪ଟି ନମୁନା ପଜଟିଭ୍ ରହିଛି । ଏଥିରେ ୯ଜଣ ପୁରୁଷ ରହିଥିବା ବେଳେ ୫ଜଣ ମହିଳା ରହିଛନ୍ତି । ଜଣେ ଶିଶୁ ରହିଛନ୍ତି । ଏଥିରେ ଖୋର୍ଦ୍ଧା ଓ କଟକ ଜିଲ୍ଲାର ସର୍ବାଧିକ ୩ଜଣ ଲେଖାଏଁ ଆକ୍ରାନ୍ତ ରହିଛନ୍ତି । ଏହାସହ ବଲାଙ୍ଗୀର ଜିଲ୍ଲା ୨, ଅନୁଗୁଳ, ଜଗତସିଂହପୁର, ଗଞ୍ଜାମ, ସୋନପୁର, ବରଗଡ଼ ଓ କନ୍ଧାମାଳ ଜିଲ୍ଲାର ଜଣେ ଲେଖାଏଁ ଆକ୍ରାନ୍ତ ରହିଛନ୍ତି । ଏସସିବି ଓ ଭିମସାରରେ ୩ଜଣ ଲେଖାଏଁ, ଏମ୍ସ, ଏମକେସିଜି ଓ ଭୁବନେଶ୍ୱରର ରେଳବାଇ ହସ୍ପିଟାଲରେ ଜଣେ ଲେଖାଏଁ ଆକ୍ରାନ୍ତ ଚିକିତ୍ସିତ ହେଉଛନ୍ତି । ଚଳିତବର୍ଷ ଏପର୍ଯ୍ୟନ୍ତ ମୋଟ ୯୧୦ଟି ନମୁନା ପରୀକ୍ଷା ହୋଇଥିବା ବେଳେ ଏଥିରେ ୩୧୧ଜଣ ଆକ୍ରାନ୍ତ ରହିଥିଲା ।
ଅନ୍ୟପଟେ ରାଜ୍ୟରେ ସ୍ୱାଇନ୍-ଫ୍ଲୁର ଆତଙ୍କକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ତତ୍ପରତା ଦେଖାଦେଇଛି । ଏନେଇ କ୍ୟାପିଟାଲ ହସ୍ପିଟାଲର ସ୍ୱାଇନ୍ ଫ୍ଲୁ ଓ୍ଵାର୍ଡରେ ଥିବା ଆଇସୋଲେସନ୍ ଆଇସିୟୁରେ ଭେଣ୍ଟିଲେଟରର ବ୍ୟବସ୍ଥା କରାଯାଇଛି । ଏହାସହ ୪ଟି ମନିଟରର ମଧ୍ୟ ବ୍ୟବସ୍ଥା କରାଯାଇଛି । ଏଥିପାଇଁ ଆବଶ୍ୟକ ପରିମାଣର ଔଷଧ ଓ ମାସ୍କ ମଧ୍ୟ ଯୋଗାଇ ଦିଆଯାଇଛି ।