ପୁଣି ନୂଆ ବିଧାୟକ ପ୍ରାର୍ଥୀ ଦେଖିଲା ଭୁବନେଶ୍ୱର ଉତ୍ତର । ୩ଟି ନିର୍ବାଚନରେ ୩ଥର ପ୍ରାର୍ଥୀ ବଦଳାଇଲା ବିଜେଡି, ଏଥର ସୁଶାନ୍ତଙ୍କୁ ସାମ୍ନା କରିବେ ଅପରାଜିତା ।
କନକ ବ୍ୟୁରୋ: ପୁଣି ବଦଳିଲା ଭୁବନେଶ୍ୱର ଉତ୍ତର ବିଜେଡି ପ୍ରାର୍ଥୀ । ତିନୋଟି ନିର୍ବାଚନରେ ବଦଳିଲା ବିଜେଡି ବିଧାୟକ ପ୍ରାର୍ଥୀ । ପ୍ରିୟଦର୍ଶୀଙ୍କ ଟିକେଟ୍ କଟିଲା ନୂଆ ମୁହଁକୁ ଭରସିଲେ ବିଜେଡି ସୁପ୍ରିମୋ । ସବୁ କଳ୍ପନାଜଳ୍ପନାର ଅନ୍ତଘଟାଇ ଶେଷରେ ବିଜେଡି ସୁପ୍ରିମୋ ଏହି ବିଧାନସଭା କ୍ଷେତ୍ର ପାଇଁ ସୁଶାନ୍ତ ରାଉତଙ୍କୁ ଟିକେଟ୍ ଦେଇଛନ୍ତି । ତେବେ ତୃତୀୟ ଥର ପାଇଁ ଏହି ବିଧାନସଭା କ୍ଷେତ୍ରରେ ପ୍ରାର୍ଥୀ ଦଳାଇଛି ବିଜେଡି । ବର୍ତ୍ତମାନର ବିଧାୟକ ପ୍ରିୟଦର୍ଶୀଙ୍କୁ ଟିକେଟ୍ ତାଲିକାରୁ ବାଦ୍ କରି ଉତ୍ତର ବିଜେଡିର ମଙ୍ଗ ସୁଶାନ୍ତ ରାଉତଙ୍କୁ ଧରାଇଛନ୍ତି ବିଜେଡି ସୁପ୍ରିମୋ ।
Kanak News is now on WhatsApp
Join and get latest news updates delivered to you via WhatsApp
୨୦୦୯ରେ ଗଠନ ହୋଇଥିବା ଏହି ନିର୍ବାଚନ ମଣ୍ଡଳୀ ଏଯାବତ୍ ଦୁଇଟି ନିର୍ବାଚନ ଦେଖିଥିଲେ ମଧ୍ୟ ଏଥିରେ ବିଜେଡି ଦୁଇଥର ବିଜୟ ତିଳକ ପିନ୍ଧିଛି । ୨୦୦୯ ନିର୍ବାଚନରେ ଏଠାରେ ବିଜେଡି ପ୍ରାର୍ଥୀ ଭାଗୀରଥି ବଡ଼ଜେନା ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେପିର ଗୋଲକ ମହାପାତ୍ରଙ୍କୁ ପରାସ୍ତ କରିଥିଲେ । ତେବେ ୨୦୧୪ରେ ତିନି ଦଳ ପ୍ରାର୍ଥୀ ପରିବର୍ତ୍ତନ କରିଥିଲେ । ବିଜେଡି ପ୍ରାର୍ଥୀ ପ୍ରିୟଦର୍ଶୀ ମିଶ୍ର ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେପିର ଦିଲ୍ଲୀପ ମହାନ୍ତିଙ୍କୁ ୪୮ ହଜାରରୁ ଅଧିକ ଭୋଟ ବ୍ୟବଧାନରେ ପରାସ୍ତ କରି ବିଜୟୀ ହୋଇଥିଲେ । କିନ୍ତୁ ଚଳିତଥର ବିଜେଡି ସୁପ୍ରିମୋ ପ୍ରିୟଦର୍ଶୀଙ୍କୁ ବାଦ୍ ଦେଇ ସୁଶାନ୍ତଙ୍କୁ ଉତ୍ତର ଭୁବନେଶ୍ୱର ମଙ୍ଗ ଧରାଇଛନ୍ତି ।
ସେପଟେ ଗତ ଦୁଇଟି ନିର୍ବାଚନରେ ବିଜେଡିର ପ୍ରମୁଖ ପ୍ରତିଦ୍ୱନ୍ଦୀ ରହିଥିବା ବିଜେପି ମଧ୍ୟ ଏହି ଆସନକୁ କବଜା କରିବାକୁ ଏଥର ପ୍ରାର୍ଥୀ ବଦଳାଇଛି । ଆଉ ସିନେ ଅଭିନେତ୍ରୀ ଅପରାଜିତା ମହାନ୍ତିଙ୍କୁ ପ୍ରାର୍ଥୀ କରିଛି ଦଳ । ତେବେ ଅପରାଜିତା ଗତଥର କଂଗ୍ରେସ ତରଫରୁ ଟିକେଟ୍ ପାଇ କଟକ ଲୋକସଭା ଆସନରୁ ନିର୍ବାଚନ ଲଢ଼ି ପରାଜିତ ହୋଇଥିଲେ । ଏହାପରେ ବିଜେପିରେ ସାମିଲ ହେବାପରେ ତାଙ୍କୁ ବିଜେପି ଏହି ଆସନରୁ ଟିକେଟ୍ ଦେଇଛି । ଏବେ ବିଜେଡି ମଧ୍ୟ ତାଙ୍କ କାର୍ଡ଼ ଖୋଲିଛି ଆଉ ଅପରାଜିତାଙ୍କୁ କଡ଼ା ଟକ୍କର ଦେବା ପାଇଁ ସୁଶାନ୍ତଙ୍କୁ ଭରସି ଟିକେଟ୍ ଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ ।