ପୋଲାଭରମ ପ୍ରକଳ୍ପ ଦ୍ୱାରା କ୍ଷୟକ୍ଷତିର ଆକଳନ ପାଇଁ ସର୍ଭେ କାର୍ଯ୍ୟ ଆରମ୍ଭ :ଜଳସମ୍ପଦ ବିଭାଗ ଯନ୍ତ୍ରୀଙ୍କ ଦ୍ୱାରା ମୋଟୁ ଅଂଚଳର ୨୦ଟି ଗାଁରେ ଚାଲିଛି ଅନୁଧ୍ୟାନ
କନକ ବ୍ୟୁରୋ : ଗୋଟିଏ ପଟେ ମହାନଦୀ ବିବାଦ, ଅନ୍ୟପଟେ ପୋଲାଭରମ ପ୍ରକଳ୍ପ । ପଶ୍ଚିମରେ ଛତିଶଗଡ ତ ଦକ୍ଷିଣରେ ଆନ୍ଧ୍ରର ଦାଦାଗିରି । ଉଭୟ ମହାନଦୀ ଓ ପୋଲାଭରମ ପ୍ରକଳ୍ପକୁ ନେଇ ଓଡିଶାର କ୍ଷତି ହେବ କୁହାଯାଉଥିଲେ ମଧ୍ୟ ପ୍ରକୃତରେ କେତେ କ୍ଷତି ହେବ ସେ ନେଇକୌଣସି ନିର୍ଦ୍ଧିଷ୍ଟ ତଥ୍ୟ ରାଜ୍ୟ ସରକାରଙ୍କ ପାଖରେ ନଥିଲା । ଏହାକୁ ଆଖି ଆଗରେ ରଖି ପୋଲାଭରମ ପ୍ରକଳ୍ପ ଦ୍ୱାରା କେତେ କ୍ଷତି ହେବ ସେ ନେଇ ସର୍ଭେ କାମ ଆରମ୍ଭ କରିଛନ୍ତି ରାଜ୍ୟ ସରକାର । ପୋଲାଭରମ ପ୍ରକଳ୍ପ ଯୋଗୁ ମାଲକାନଗିରି ଜିଲ୍ଲାରେ ପ୍ରକୃତ କ୍ଷୟକ୍ଷତି ଆକଳନ କରିବା ପାଇଁ ବିଧିବଦ୍ଧ ସର୍ଭେ ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ମାଲକାନଗିରି ଜିଲ୍ଳା ଜଳସେଚନ ବିଭାଗ ଯନ୍ତ୍ରୀଙ୍କ ତତ୍ୱାବଧାନରେ ୨୦ଜଣ ସଦସ୍ୟଙ୍କୁ ନେଇ ୪ଟି ଟିମ୍ ଗଠନ କରି ସର୍ଭେ କାର୍ଯ୍ୟ ଆରମ୍ଭ ହୋଇଛି । ୨୦ ଦିନ ଧରି ଏହି ସର୍ଭେ ଚାଲିବ । ମୋଟୁ ଅଂଚଳର ୨୦ଟି ଗାଁରେ ଅନୁଧ୍ୟାନ କରୁଛନ୍ତି ଅନୁଧ୍ୟାନକାରୀ ଦଳ । ପୂର୍ବରୁ ମାଲକାନଗିରି ମୋଟୁ ଅଂଚଳର ୩ଟି ଗ୍ରାମପଂଚାୟତର ୨୦ରୁ ୨୫ଟି ଗାଁ ଜଳ ମଗ୍ନ ହେବ ବୋଲି ବିଭିନ୍ନ ସଂଗଠନ ଦାବି କରି ଆସୁଛନ୍ତିି । ଏହା ଦ୍ୱାରା ୨୦ରୁ ୨୫ ହଜାର ହେକ୍ଟର ଜଙ୍ଗଲ ଓ ଚାଷ ଜମି ଜଳମଗ୍ନ ହେବ ବୋଲି ମଧ୍ୟ କୁହାଯାଉଥିଲା । ପୋଲାଭରମ ପ୍ରକଳ୍ପ ଦ୍ୱାରା ରାଜ୍ୟର କେତେ କ୍ଷତି ହେବ ଏହି ସର୍ଭେରୁ ସ୍ପଷ୍ଟ ହୋଇପାରେ ।