ଲାଲଗଡରୁ କଳିଙ୍ଗ ଷ୍ଟାଡିୟମ !ଆତ୍ମସର୍ମପଣ କରିଥିବା ନକ୍ସଲଙ୍କ ସାଥୀରେ ବସି ନବୀନ ଦେଖିଲେ ହକି ମ୍ୟାଚ୍, ହାତ ମିଳାଇଲେ, ଭଲମନ୍ଦ ପଚାରିଲେ

648

କନକ ବ୍ୟୁରୋ : ବିଶ୍ୱକପ ହକିର କ୍ୱାର୍ଟର ଫାଇନାଲରେ ଭାରତୀୟ ଦଳ ନେଦରଲାଣ୍ଡ ଠାରୁ ପରାସ୍ତ ହେବା ସହ ଅଭିଯାନ ଶେଷ କରିଛି । ଏହି ସଂଘର୍ଷପୂର୍ଣ୍ଣ ମ୍ୟାଚକୁ ବେଶ ଉପଭୋଗ କରିଛନ୍ତି ହକି ପ୍ରେମୀ । ତେବେ ମ୍ୟାଚ ମଧ୍ୟରେ କଳିଙ୍ଗ ଷ୍ଟାଡିୟମର ଆଉ ଏକ ଦୃଶ୍ୟ ସମସ୍ତଙ୍କୁ ବେଶ ଆଶ୍ଚର୍ଯ୍ୟ କରିଥିଲା । କ୍ୱାର୍ଟର ଫାଇନାଲ ମ୍ୟାଚର ଦ୍ୱିତୀୟ କ୍ୱାର୍ଟର ସରିବା ପରେ ଯେତେବେଳେ କ୍ୟାମେରା ମୁଖ୍ୟମନ୍ତ୍ରୀ ବସିଥିବା ଗ୍ୟାଲେରୀ ଉପରେ ପଡିଥିଲା ସେତେବେଳେ ତାଳି ମାଡରେ ଫାଟି ପଡିଥିଲା ପୂରା ଷ୍ଟାଡିୟମ । କାରଣ ଗ୍ୟାଲେରୀରେ କେବଳ ନବୀନ ବସିନଥିଲେ ବରଂ ତାଙ୍କ ପାଖରେ ଘେରି ବସିଥିଲେ ଆତ୍ମସର୍ମପଣ କରିଥିବା ହାର୍ଡକୋର ମାଓବାଦୀ ।

ଗୋଟିଏ ପଟେ ପଡ଼ିଆ ଭିତରେ କ୍ୱାଟର ଫାଇନାଲରେ ଜୋରଦାର ମୁକାବିଲା ହେଉଥିଲା, ଅନ୍ୟପଟେ ଆତ୍ମସମର୍ପଣ କରିଥିବା ହାର୍ଡକୋର ମାଓବାଦୀଙ୍କ ସହ ହକି ମ୍ୟାଚ ଦେଖିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଏହା ପୂର୍ବରୁ ପୋଲିସ ନିକଟରେ ଆତ୍ମସମର୍ପଣ କରିଥିବା ପ୍ରାୟ ୩୦ଜଣ ନକ୍ସଲ ଆଜି ବିଶ୍ୱକପ ହକି ଖେଳ ଦେଖିବା ପାଇଁ ଇଚ୍ଛାପ୍ରକାଶ କରିଥିଲେ । ସେମାନଙ୍କୁ ହକି ମ୍ୟାଚ୍ ଦେଖାଇବା ପାଇଁ ବ୍ୟବସ୍ଥା କରିଥିଲା ପୋଲିସ ପ୍ରଶାସନ । ତେବେ ସେମାନଙ୍କ ଖେଳ ଦେଖା ଆହୁରି ଗୁରୁତ୍ୱପୂର୍ଣ୍ଣ ହୋଇ ଯାଇଥିଲା, ଯେତେବେଳେ ମୁଖ୍ୟମନ୍ତ୍ରୀ ସେମାନଙ୍କ ସହ ହକି ଦେଖିଥିଲେ । ଏବଂ ସେମାନଙ୍କ ସହ କରମର୍ଦ୍ଦନ କରି ଭଲମନ୍ଦ ପଚାରି ବୁଝିଥିଲେ ନବୀନ ।

କୋରାପୁଟରୁ ୧୦ଜଣ ଏବଂ ମାଲକାନଗିରିର ୨୦ଜଣ ନକ୍ସଲ ପୋଲିସ ନିକଟରେ ଆତ୍ମସମର୍ପଣ କରିଥିଲେ । ଆଉ ଏହି ପୂର୍ବତନ ନକ୍ସଲଙ୍କ ମଧ୍ୟରେ ଥିଲେ ୧୬ ଜଣ ମହିଳା କ୍ୟାଡର ।

ମୁଖ୍ୟମନ୍ତ୍ରୀଙ୍କ ସହ ହକି ମ୍ୟାଚ୍ ଦେଖିବା ପରେ ଏହି ପୂର୍ବତନ ନକ୍ସଲ କ୍ୟାଡର ବେଶ୍ ଖୁସି ଜାହିର କରିଛନ୍ତି । ପ୍ରକୃତରେ ସମାଜର ମୁଖ୍ୟସ୍ରୋତକୁ ଆସି ଯାଇଥିବା ସେମାନେ ଅନୁଭବ କରୁଥିବା କହିଛନ୍ତି । ଶାନ୍ତି ପାଇଁ ମୁଖ୍ୟମନ୍ତ୍ରୀଙ୍କ ଆହ୍ୱାନ, ରାଜ୍ୟ ସରକାରଙ୍କ ଥଇଥାନ ନୀତି, ଆଦିବାସୀ ଅଧ୍ୟୁଷିତ ଅଂଚଳରେ ସରକାରଙ୍କ ବିକାଶ କାର୍ଯ୍ୟକ୍ରମ ପ୍ରତି ଆକୃଷ୍ଟ ହୋଇ ଲାଲଗଡ଼ ଛାଡିଥିବା କହିଛନ୍ତି ଏହି ପୂର୍ବତନ ମାଓବାଦୀମାନେ ।

ହକି ମ୍ୟାଚ ଦେଖିବା ପରେ ଭୁବନେଶ୍ୱର ଡଟ୍ ଫେଷ୍ଟ ବୁଲିଦେଖିବା ସହ ସେମାନେ ଆସନ୍ତାକାଲି ଲିଙ୍ଗରାଜ ମନ୍ଦିର ଓ ଶ୍ରୀମନ୍ଦିର ଦର୍ଶନ କରିବେ । ପୂର୍ବତନ ନକ୍ସଲଙ୍କ ସହ ନବୀନ ମ୍ୟାଚ୍ ଦେଖିବାକୁ ସାଧାରଣ ଲୋକ ବେଶ ପ୍ରଂଶସା କରିଛନ୍ତି ।

Comments are closed.