କାଉଡିଆଙ୍କ ଉତ୍ପାତ ନେଇ ଉଦବେଗ ପ୍ରକାଶ କଲେ ସୁପ୍ରିମକୋର୍ଟ । କଡ଼ା କାର୍ଯ୍ୟାନୁଷ୍ଠାନ ପାଇଁ ପୋଲିସକୁ ଦେଲେ ନିର୍ଦ୍ଦେଶ ।
କନକ ବ୍ୟୁରୋ : କାଉଡିଆଙ୍କ ଭଙ୍ଗାରୁଜା ଘଟଣାକୁ ନେଇ ସୁପ୍ରିମକୋର୍ଟଙ୍କ କଡା ଆଭିମୁଖ୍ୟ । ଦେଶର ବିଭିନ୍ନ ସହରରେ କାଉଡିଆଙ୍କ ଭଙ୍ଗାରୁଜା ଘଟଣାରେ ସଂପୃକ୍ତ ଅଭିଯୁକ୍ତମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ଆଇନକୁ ହାତକୁ ନେଇଥିବା କାଉଡିଆମାନଙ୍କ ପ୍ରତି ଆଇନ ଅନୁଯାୟୀ ପଦକ୍ଷେପ ଗ୍ରହଣ କରାଯିବ ବୋଲି ସୁପ୍ରିମକୋର୍ଟ କହିଛନ୍ତି । ଏପରିକି ଭିଡତନ୍ତ୍ର ଦ୍ୱାରା ପୀଡିତ ବ୍ୟକ୍ତି ଏତଲା ନ ଦେଲେ ବି ପୁଲିସ ନିଜ ଆଡୁ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ନ୍ୟାୟାଳୟ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ଭିଡତନ୍ତ୍ର ଦ୍ୱାରା ବ୍ୟକ୍ତିଗତ ସଂପତି ନଷ୍ଟ ସଂପର୍କିତ ଜନସ୍ୱାର୍ଥ ମାମଲାର ଶୁଣାଣି ସମୟରେ ଆଟର୍ଣ୍ଣି ଜେନେରାଲ କେ.କେ. ବେଣୁଗୋପାଳ କାଉଡିଆଙ୍କ ଉତ୍ପାତକୁ ନେଇ କୋର୍ଟଙ୍କ ଦୃଷ୍ଟି ଆକର୍ଷଣ କରିଥିଲେ । ପ୍ରଧାନ ବିଚାରପତି ଦିପକ ମିଶ୍ରଙ୍କ ଖଣ୍ଡପୀଠ ଆଗରେ ଏଜି କହିଥିଲେ ମହାରାଷ୍ଟ୍ର, ରାଜସ୍ଥାନ ଓ ଉତ୍ତରପ୍ରଦେଶରେ କାଉଡିଆମାନେ ଗାଡି ଭାଙ୍ଗୁଥିବା ଭିଡିଓ ଭାଇରାଲ ହୋଇଛି । ଏହାସହ ଅଣାୟତ କାଉଡିଆ ଓ ଶ୍ରଦ୍ଧାଳୁଙ୍କୁ ଠିକ ଭାବେ ପୁଲିସ ନିୟନ୍ତ୍ରଣ କରିପାରି ନାହିଁ ବୋଲି ଅସନ୍ତୋଷ ପ୍ରକାଶ କରିଛନ୍ତି ଏଜି । ଏହା ସହ ଦେଶରେ ବଢୁଥିବା ଭିଡତନ୍ତ୍ରକୁ ନେଇ ଏଜି କହିଥିଲେ, ଶିକ୍ଷିତ ଯୁବକମାନେ ଗଣ୍ଡଗୋଳ କରୁଛନ୍ତି, ଯାହା ଏକ ସଭ୍ୟ ଦେଶରେ କେବେ ବି ବରଦାସ୍ତ କରାଯିବ ନାହିଁ ।