ଦୀପାବଳିକୁ ଫିକା କରିବ ସୁପ୍ରିମକୋର୍ଟଙ୍କ କଟକଣା ! ରାତି ୮ରୁ ୧୦, ମାତ୍ର ଦୁଇ ଘଂଟା ବାଣ ଫୁଟାଇବାକୁ କୋର୍ଟଙ୍କ ଅନୁମତି
କନକ ବ୍ୟୁରୋ : ଦୀପାବଳୀ ପୂର୍ବରୁ ଦେଶବ୍ୟାପୀ ବାଣ ବିକ୍ରି ନେଇ ସୁପ୍ରିମକୋର୍ଟ ଆଜି ବଡ ରାୟ ଶୁଣାଇଛନ୍ତି । ବାଣ ବିକ୍ରି ଉପରେ ସମ୍ପୂର୍ଣ୍ଣ କଟକଣା ନଲଗାଇ ସର୍ତ୍ତମୂଳକ ଭାବେ ବାଣ ବିକ୍ରି ପାଇଁ ଅନୁମତି ଦେଇଛନ୍ତି ର୍ସବୋଚ୍ଚ ନ୍ୟାୟାଳୟ । ଦୀପାବଳୀରେ ମାତ୍ର ଦୁଇଘଂଟା ପାଇଁ ରାତି ୮ଟାରୁ ୧୦ଟା ଯାଏଁ ବାଣ ଫୁଟାଯାଇପାରିବ ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ବାୟୁ ପ୍ରଦୂଷଣ ବଢୁଥିବାରୁ ଆଗାମୀ ଦୀପାବଳିରେ ବାଣ ଫୁଟାଇବା ଉପରେ କଡା କଟକଣା ଲଗାଇଛନ୍ତି ସର୍ବୋଚ୍ଚ ନ୍ୟାୟାଳୟ । ତେବେ ଆଶ୍ୱସ୍ତିର ବିଷୟ ହେଉଛି ଯେ, ବାଣକୁ ସଂପୂର୍ଣ୍ଣ ବ୍ୟାନ କରିନାହାନ୍ତି ସୁପ୍ରିମକୋର୍ଟ ।
ସୁପ୍ରିମକୋର୍ଟଙ୍କ କଟକଣା
– ଦୀପାବଳିରେ କେବଳ ୨ ଘଂଟା ବାଣ ଫୁଟାଇ ପାରିବେ
– ରାତି ୮ଟାରୁ ୧୦ ପର୍ଯ୍ୟନ୍ତ ବାଣ ଫୁଟାଇବାକୁ ଅନୁମତି
– ନୂଆବର୍ଷ ଓ ଖ୍ରୀଷ୍ଟମାସରେ ମାତ୍ର ଘଂଟାଏ ଫୁଟାଇବେ ବାଣ
– ରାତି ୧୧ଟା ୪୫ରୁ ୧୨ଟା ୪୫ ଯାଏଁ ବାଣ ଫୁଟାଇବାକୁ ଅନୁମତି
ଦିଲ୍ଲୀ ଭଳି ଦେଶର ଅନେକ ପ୍ରମୁଖ ସହରରେ ପ୍ରଦୂଷଣର ମାତ୍ରା ଅଧିକ ରହୁଥିବାରୁ ବାଣକୁ ସଂପୂର୍ଣ୍ଣ ବ୍ୟାନ କରିବା ଲାଗି ସୁପ୍ରିମକୋର୍ଟରେ ଆବେଦନ ହୋଇଥିଲା । ହେଲେ ବାଣ ବ୍ୟବସାୟୀ ଓ କାରିଗରଙ୍କ ଜୀବନ ଜୀବିକାର ଅଧିକାରକୁ ଆଖିରେ ରଖି ସୁପ୍ରିମକୋର୍ଟ ଏହିସବୁ କଡା ସର୍ତ୍ତ ସହ ବାଣ ଫୁଟାଇବାକୁ ଅନୁମତି ଦେଇଛନ୍ତି । ଏଥିସହ କୋର୍ଟ କହିଛନ୍ତି
– ଅନଲାଇନରେ ବିକ୍ରି ହୋଇପାରିବନି ବାଣ
– ବାଣ ବିକି ପାରିବେନି ଫ୍ଲିପକାର୍ଟ ଓ ଆମାଜନ୍ ଭଳି ଇ-କମର୍ସ ସଂସ୍ଥା
ପ୍ରଦୂଷଣର ମାତ୍ରାକୁ ଦେଖି ଗତବର୍ଷ ଅକ୍ଟୋବରରେ ଦିଲ୍ଲୀ-ଏନସିଆରରେ ବାଣ ବିକ୍ରିକୁ ସଂପୂର୍ଣ୍ଣ ବନ୍ଦ କରିଦେଇଥିଲେ ସୁପ୍ରିମକୋର୍ଟ । ଅବଶ୍ୟ ନଭେମ୍ବରରେ ଏହି କଟକଣା ହଟାଇ ଦିଆଯାଇଥିଲା । ହେଲେ ଚଳିତବର୍ଷ ଦୀପାବଳିରେ ବାଣ ଫୁଟାଇବାକୁ ସଂପୂର୍ଣ୍ଣ ବନ୍ଦ କରିଦେବା ଲାଗି ସୁପ୍ରିମକୋର୍ଟରେ ଏକାଧିକ ପିଟିସନ୍ ହୋଇଥିଲା । ତେବେ ବାଣ ପ୍ରସ୍ତୁତକାରୀ ଓ ଦେଶର ପ୍ରାୟ ୧୩୦ କୋଟି ଲୋକଙ୍କ ସ୍ୱସ୍ଥ୍ୟକୁ ବିଚାରକୁ ନେଇ ଏଭଳି କଟକଣା ସହ ବାଣ ଫୁଟାଇବାକୁ ଅନୁମତି ଦେଇଛନ୍ତି ସୁପ୍ରିମକୋର୍ଟର ବିଚାରପତି ଜଷ୍ଟିସ ଏକେ ସିକ୍ରି ଓ ଜଷ୍ଟିସ ଅଶୋକ ଭୂଷଣଙ୍କ ଖଣ୍ଡପୀଠ ।