ଅଯୋଧ୍ୟାକୁ ନେଇ ‘ସୁପ୍ରିମ’ ଫଇସଲା । ୭୦ ବର୍ଷ ପରେ ଅଯୋଧ୍ୟା ବିବାଦରେ ପୂର୍ଣ୍ଣଛେଦ ଟାଣିଲେ ସୁପ୍ରିମକୋର୍ଟ, ବିବାଦୀୟ ସ୍ଥଳରେ ହେବ ରାମ ମନ୍ଦିର ।
କନକ ବ୍ୟୁରୋ : ଦୀର୍ଘ ୭୦ ବର୍ଷର ଆଇନଗତ ଲଢେଇ । ସାତ ସାତ ଥରର ମଧ୍ୟସ୍ଥତା ପ୍ରୟାସ । କୋଟି କୋଟି ଦେଶବାସୀଙ୍କ ଆକାଂକ୍ଷାର ଅବସାନ ଘଟାଇ ଐତିହାସିକ ରାୟ ଶୁଣାଇଛନ୍ତି ସୁପ୍ରିମକୋର୍ଟ । ସ୍ପଷ୍ଟ କରିଦେଇଛନ୍ତି ଅଯୋଧ୍ୟାର ବିବାଦୀୟ ଜମିରେ ହେବ ମନ୍ଦିର । ୨ ଦଶମିକ ୭୭ ଏକର ଜମିକୁ ରାମ ଜନ୍ମଭୂମୀ ନ୍ୟାସକୁ ହସ୍ତାନ୍ତର କରିବା ପାଇଁ ଏକ ଟ୍ରଷ୍ଟ ଗଠନ କରିବାକୁ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି । ଏଥିସହ ମୁସଲମାନ ପକ୍ଷରୁ ମସଜିଦ୍ ନିର୍ମାଣ ପାଇଁ ବିକଳ୍ପ ସ୍ଥାନ ଯୋଗାଇଦେବା ପାଇଁ କହିଛନ୍ତି । ଅଯୋଧ୍ୟାରେ ସୁନ୍ନି ୱାକଫ୍ ବୋର୍ଡକୁ ୫ ଏକର ଜମି ଯୋଗାଇଦେବାକୁ କହିଛନ୍ତି ସୁପ୍ରିମକୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଅଯୋଧ୍ୟାକୁ ନେଇ ‘ସୁପ୍ରିମ’ ଫଇସଲା । ବିବାଦୀୟ ସ୍ଥଳରେ ହେବ ରାମ ମନ୍ଦିର । ଭାରତୀୟ ନ୍ୟାୟିକ ଇତିହାସରେ ସବୁଠାରୁ ଦୀର୍ଘ ସମୟଧରି ଚାଲିଥିବା ଏକ ଗୁରୁତ୍ୱପୂର୍ଣ୍ଣ ମାମଲାର ଆସିଛି ରାୟ । ପ୍ରାୟ ୭୦ ବର୍ଷ ପରେ ଅଯୋଧ୍ୟା ବିବାଦରେ ପୂର୍ଣ୍ଣଛେଦ ଟାଣିଛନ୍ତି ଦେଶର ସର୍ବୋଚ୍ଚ ନ୍ୟାୟାଳୟ । ଆସ୍ଥା ଓ ବିଶ୍ୱାସ ବନାମ ଜମି ମାଲିକାନାରେ ପରିଣତ ହୋଇଥିବା ଏହି ମାମଲାରେ ସୁପ୍ରିମକୋର୍ଟ ଦେଇଥିବା ରାୟ, ଅଯୋଧ୍ୟାର ବିବାଦୀୟ ସ୍ଥଳରେ ରାମ ମନ୍ଦିର ନିର୍ମାଣ ପାଇଁ ବାଟ ଫିଟାଇଛି । କାରଣ କୋର୍ଟ କହିଛନ୍ତି,
– ଅଯୋଧ୍ୟାର ବିବାଦୀୟ ୨.୭୭ ଏକର ଜମି ରାମ ଜନ୍ମଭୂମି ନ୍ୟାସକୁ ହସ୍ତାନ୍ତର କରାଯିବ
– ମନ୍ଦିର ନିର୍ମାଣ ପାଇଁ ତିନିମାସ ଭିତରେ ଏକ ଟ୍ରଷ୍ଟବୋର୍ଡ ଗଠନ କରିବେ କେନ୍ଦ୍ର ସରକାର
– ଜମିକୁ ୩ ଭାଗରେ ବିଭକ୍ତ କରିବା ନେଇ ଆଲ୍ଲାହାବାଦ ହାଇକୋର୍ଟଙ୍କ ୨୦୧୦ ରାୟ ଖାରଜ
– ଜମି ଉପରେ ନିର୍ମୋହୀ ଆଖଡା ଓ ସୁନ୍ନି ୱାକଫ ବୋର୍ଡର ଦାବି ସୁପ୍ରିମକୋର୍ଟରେ ଖାରଜ
– ମନ୍ଦିର ନିର୍ମାଣ ପାଇଁ ହେବାକୁ ଥିବା ଟ୍ରଷ୍ଟବୋର୍ଡରେ ରହିବେ ନିର୍ମୋହୀ ଆଖଡା ପ୍ରତିନିଧି
ଆଲ୍ଲାହାବାଦ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ହୋଇଥିବା ୧୪ଟି ମାମଲାକୁ ବିଚାର ପାଇଁ ଗ୍ରହଣ କରିଥିଲେ ସୁପ୍ରିମକୋର୍ଟ । ଅଗଷ୍ଟ ୬ ତାରିଖରୁ ପ୍ରତିଦିନିଆ ଶୁଣାଣି କରି ଅକ୍ଟୋବର ୧୫ ତାରିଖରେ ରାୟ ସଂରକ୍ଷିତ ରଖିଥିଲେ । ମାମଲାର ତିନିଟି ପକ୍ଷଥିଲେ – ରାମଲଲ୍ଲା ବିରାଜମାନ, ନିର୍ମୋହୀ ଆଖଡା ଓ ସୁନ୍ନି ୱାକଫ ବୋର୍ଡ ।
ଅଯୋଧ୍ୟାର ଏହି ବିବାଦୀୟ ସ୍ଥଳରେ ୧୫୨୮ ମସିହାରୁ ଏକ ମସଜିଦ୍ ଥିଲା । ମୋଗଲ ସମ୍ରାଟ ବାବରଙ୍କ ଦ୍ୱାରା ଏହି ମସଜିଦ ନିର୍ମାଣ କରାଯାଇଥିବାବେଳେ ୧୯୯୨ରେ ହିନ୍ଦୁମାନେ ଭାଙ୍ଗିଦେଇଥିବା କହି ଜମିର ମାଲିକାନା ଦାବି କରୁଥିଲା ସୁନ୍ନି ୱାକଫ ବୋର୍ଡ । ତେଣୁ ସାଂପ୍ରଦାୟିକ ସଦଭାବକୁ ଅକ୍ଷୁଣ୍ଣ ରଖି ସୁପ୍ରିମକୋର୍ଟ ମୁସଲମାନ ପକ୍ଷକୁ ସୁହାଇଲା ଭଳି ରାୟ ମଧ୍ୟ ଦେଇଛନ୍ତି ।
ଅଯୋଧ୍ୟା ରାୟ :
– ସେହି ଅଯୋଧ୍ୟାରେ ମସଜିଦ ନିର୍ମାଣ ପାଇଁ ଏକ ବିକଳ୍ପ ସ୍ଥାନ ଚିହ୍ନଟ କରିବେ କେନ୍ଦ୍ର ସରକାର
– ୫ ଏକର ଜାଗା ଚିହ୍ନଟ କରି ମସଜିଦ ନିର୍ମାଣ ପାଇଁ ସୁନ୍ନି ୱାକଫ ବୋର୍ଡକୁ ହସ୍ତାନ୍ତର କରାଯିବ
– ବାବ୍ରି ମସଜିଦ ଉପରେ ସୁନ୍ନି ବୋର୍ଡ ଅଧିକାର ବିରୋଧରେ ସିହା ବୋର୍ଡର ଆବେଦନ ଖାରଜ
ମୋଟ ୧ ହଜାର ୪୫ ପୃଷ୍ଠାର ରାୟକୁ ୩୦ ମିନିଟରେ ପଢି ଶୁଣାଇଥିଲେ ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇ । ସର୍ବୋଚ୍ଚ ନ୍ୟାୟାଳୟଙ୍କ ୫ ଜଣିଆ ସାମ୍ବିଧାନିକ ଖଣ୍ଡପୀଠ ଏହି ମାମଲାର ଶୁଣାଣି କରିଥିବାବେଳେ ସର୍ବସମ୍ମତିରେ ଶନିବାର ଐତିହାସିକ ରାୟ ପ୍ରକାଶ କରିଛନ୍ତି ।