ନାଗବଂଶ ରହସ୍ୟରୁ ଉଠିଲା ପରଦା ! ଅନ୍ଧ ବିଶ୍ୱାସରୁ ବଂଶ ବଢାଉଥିଲା ନାଗ ସାପ । ଧାମନଗର ପରେ ପିପିଲିରୁ ୧୨ଟି ନାଗ ସାପ ଛୁଆ ଉଦ୍ଧାର ।
କନକ ବ୍ୟୁରୋ : ଭଦ୍ରକ ଧାମନଗରରେ ନାଗବଂଶର ଖବରକୁ ନେଇ ଯେଉଁ ତିନି ଦିନ ହେଲା ଚର୍ଚ୍ଚା ଆଲୋଚନା ଲାଗି ରହିଛି ତା’ ଉପରୁ ଏକ ବଡ ରହସ୍ୟ ଉନ୍ମୋଚିତ ହୋଇଛି । କେଉଁଠୁ ଆସିଲେ ଶହଶହ ନାଗ, ଗୋଟିଏ ଘରୁ ଏତେ ସାପ ବାହାରିବା ସଂଭବ କି ? ଏଭଳି ଯେଉଁ ପ୍ରଶ୍ନ ଉଠୁଥିଲା, ତା ଉପରୁ ପରଦା ଉଠିଛି । ଆଉ ସାପ ବଂଶବୃଦ୍ଧି ପାଇବାର କାରଣ ଜାଣିଲେ ଆପଣ ମଧ୍ୟ ଆଶ୍ଚର୍ଯ୍ୟ ହୋଇଯିବେ ।
Kanak News is now on WhatsApp
Join and get latest news updates delivered to you via WhatsApp
ମାଟି ଘରର ଏହି ସବୁ ଗାତରେ ହିଁ ବର୍ଷ ବର୍ଷ ଧରି ରହି ଆସୁଥିଲେ ସେହି ବିଶଧର ସାପ । ଦୁଇ-ଚାରିଟି ନୁହେଁ ଗୋଟିଏ ଘରୁ ଉଦ୍ଧାର ହୋଇଥିଲେ ପ୍ରାୟ ଦେଢ଼ ଶହ ନାଗସାପ । ଘରର ବିଭିନ୍ନ କୋଣରେ ଲୁଚି ରହିଥିବା ଏହି ସାପ ସବୁ ଗୋଟିଏ ସ୍ଥାନରୁ ବାହାରିବା ପରେ ଘଟଣାର ଗୁରୁତ୍ୱ ବଢ଼ିଯାଇଥିଲା । ସାପ ସବୁ ବିଭିନ୍ନ ଗାତରେ ରହି ଆସୁଥିଲେ ।
ତେବେ ସବୁଠାରୁ ବଡ କଥା ହେଉଛି ସାପ ବଂଶବୃଦ୍ଧି ପଛରେ ରହିଛି ଏମିତି ଏକ କାରଣ, ଯାହା ଅନ୍ଧବିଶ୍ୱାସ ଉପରେ ପର୍ଯ୍ୟବେସିତ । ଘରେ ଭିତରେ ଥିବା ଉଈ ହୁଙ୍କା ଏବଂ ଏହାକୁ ନେଇ ଜଣେ ମଙ୍ଗଳା ସାଧକ ପରାମର୍ଶ ହିଁ ସାପବଂଶ ବୃଦ୍ଧିର କାରଣ । ଘରର ମୁରବୀ ବିଜୟ ଭୁୟାଁ ଘରେ ସାପ ରହିଥିବା ଜାଣିଥିଲେ ସୁଦ୍ଧା ସାଧକଙ୍କ ପରାମର୍ଶ ଅନୁସାରେ କ୍ଷୀର, ଧୂପ ଏବଂ ଫୁଲ ଦେଇ ପୂଜା କରୁଥିଲେ । ଯାହା ଫଳରେ ଘରେ ସାପସବୁ ଅନାୟାସରେ ବଢ଼ିବାରେ ଲାଗିଥିଲେ । ଧାମନଗର ପାଇକସାହିର ବିଜୟଙ୍କ ଘରୁ ୧୩୦ଟି ନାଗ ସାପ ବାହାରି ଥିବା ବେଳେ ପାଖ ଗାଁ କଂଟାବାରେଣୀରୁ ବାହାରିଥିଲା ୨୦ଟି ସାପ । ଯାହାକୁ ଏବେ ସାରା ଅଂଚଳରେ ଏକ ଆତଙ୍କର ବାତାବରଣ ଖେଳି ଯାଇଛି । ଆଉ ଏସବୁ ଭିତରେ ଘର ଛାଡି ଅନ୍ୟତ୍ର ଆଶ୍ରୟ ନେଇଛନ୍ତି ବିଜୟ ଭୁୟାଁ ।
ସେପଟେ ପିପିଲିରୁ ମଧ୍ୟ ଉଦ୍ଧାର ହୋଇଛି ନାଗ ସାପ ଛୁଆ । ପିପିଲି ସୁହାଗପୁରରୁ ଆଜି ୧୨ଟି ନାଗ ସାପ ଉଦ୍ଧାର କରାଯାଇଛି । ସ୍ଥାନୀୟ ବାସିନ୍ଦା ଅନାଦି ସାହୁଙ୍କ ଘରୁ ଏ ସବୁ ସାପକୁ ଉଦ୍ଧାର କରିଛନ୍ତି ସ୍ନେକ ହେଲ୍ପଲାଇନ୍ ସଦସ୍ୟ । ତେବେ ଏବେ ବି ତାଙ୍କ ଘରେ ଆହୁରି ନାଗ ଥିବା ସନ୍ଦେହ କରାଯାଉଛି । ଘଟଣା ସମ୍ପର୍କରେ ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି ।