ଯେଉଁ ନିୟମ ବଳରେ ଇଂଲଣ୍ଡ ବିଶ୍ୱକପ ବିଜେତା ହୋଇଥିଲା, ସେହି ନିୟମକୁ ବଦଳାଇଲା ଆଇସିସି । ଜାଣନ୍ତୁ ନୂଆ ନିୟମରେ କେମିତି ବଛାଯିବ ବିଜେତା ।
ଇଂଲଣ୍ଡ ଯେଉଁ ନିୟମ ପାଇଁ ବିଶ୍ୱକପ ଟ୍ରଫି ହାତେଇଥିଲା ସେହି ନିୟମକୁ ରଦ୍ଦ କରିଲା ଆଇସିସି । ଆଉ ଏହାସହ ବଦଳିଲା ସୁପର ଓଭରର ନିୟମ । ଏଣିକି ସୁପର ଓଭରରେ ମ୍ୟାଚ୍ ଟାଇ ରହିଲେ ବାଉଣ୍ଡରୀ ଆଧାରରେ ବିଜେତା ବଛା ଯିବ ନାହିଁ । ବରଂ ଯେତେ ଯାଏଁ ଗୋଟିଏ ଦଳ ଅନ୍ୟ ଦଳ ଠାରୁ ଅଧିକ ରନ୍ ସଂଗ୍ରହ ନ କରିଛି ସେତେବେଳ ଯାଏଁ ସୁପର ଓଭର ଖେଳାଯିବ ବୋଲି ସ୍ପଷ୍ଟ କରିଛି ଆଇସିସି । ତେବେ ଏହି ନିୟମ କେବଳ ସେମିଫାଇନାଲ ଓ ଫାଇନାଲ ମ୍ୟାଚରେ ଲାଗୁହେବ । ଗ୍ରୁପ ପର୍ଯ୍ୟାୟ ମ୍ୟାଚରେ ସୁପର ଓଭରରେ ମ୍ୟାଚ୍ ଟାଇ ରହିଲେ ଦୁଇ ଦଳକୁ ସମାନ ପଏଣ୍ଟ ମିଳିବ ।
Kanak News is now on WhatsApp
Join and get latest news updates delivered to you via WhatsApp
ଉଦାହରଣ ଅନୁଯାୟୀ, ଯଦି ଗ୍ରୁପ ପର୍ଯ୍ୟାୟରେ ଉଭୟ ଦଳ ୫୦ ଓଭରରେ ସମାନ ସ୍କୋର କରନ୍ତି ତେବେ ମ୍ୟାଚର ଫଳାଫଳ ପାଇଁ ଥରେ ମାତ୍ର ସୁପର ଓଭର ଖେଳାଯିବ । ଆଉ ଏହି ସୁପର ଓଭର ମ୍ୟାଚ୍ ଟାଇ ରହିଲେ ଦୁଇ ଦଳ ମଧ୍ୟରେ ସମାନ ପଏଣ୍ଟ ବାଣ୍ଟି ଦିଆଯିବ । କିନ୍ତୁ ସେମିଫାଇନାଲ ଓ ଫାଇନାଲ ମୁକାବିଲାରେ ଫଳାଫଳ ନ ଆସିବା ଯାଏଁ ସୁପର ଓଭର ଖେଳାଯିବ । ଦିନିକିଆ ଓ ଟି-୨୦ ବିଶ୍ୱକପର ପ୍ରତିଟି ମ୍ୟାଚରେ ଏହି ନୂଆ ସୁପର ଓଭର ନିୟମ ଲାଗୁ କରାଯିବ ।
ଏହାପୂର୍ବରୁ ଚଳିତ ବିଶ୍ୱକପ ଫାଇନାଲ ମ୍ୟାଚରେ ମଧ୍ୟ ସୁପର ଓଭରରେ ବିଜେତା ବଛା ଯାଇଥିଲା । ଏହି ରୋମାଞ୍ଚକର ମୁକାବିଲାରେ ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୨୪୧ ରନ୍ କରିଥିବା ବେଳେ ଇଂଲଣ୍ଡ ମଧ୍ୟ ନିର୍ଦ୍ଧାରିତ ଓଭରରେ ୨୪୧ ରନ୍ କରିବାକୁ ସକ୍ଷମ ହୋଇଥିଲା । ଫଳରେ ମ୍ୟାଚଟି ଟାଇ ହୋଇଥିଲା । ଫଳରେ ବିଶ୍ୱବିଜେତା ବାଛିବାକୁ ସୁପର ଓଭର ଖେଳାଯାଇଥିଲା । ସୁପର ଓଭରରେ ମଧ୍ୟ ଉଭୟ ଟିମ୍ ୧୫ ରନ୍ କରିଥିବା ବେଳେ ଅଧିକ ବାଉଣ୍ଡରୀ ଆଧାରରେ ଇଂଲଣ୍ଡକୁ ବିଶ୍ୱବିଜେତା ଘୋଷଣା କରାଯାଇଥିଲା । ସେତେବେଳେ ଆଇସିସିର ଏହି ନିୟମକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିଲା ।