ଲାଞ୍ଚ ନେଇଥିଲେ, ଜେଲ ଗଲେ । ଜାମିନ ଆବେଦନ ଶୁଣାଣି ପରେ ନିଲମ୍ବିତ ଆଇଏଏସ ବିଜୟ କେତନଙ୍କୁ ପଠାଗଲା ଜେଲ, ଅନ୍ୟ ଅଭିଯୁକ୍ତ କହିଲେ, ଜବରଦସ୍ତି ଟଙ୍କା ରଖି ଗିରଫ କରିଛି ଭିଜିଲାନ୍ସ ।
କନକ ବ୍ୟୁରୋ : ଜେଲ ଗଲେ ଉଦ୍ୟାନ କୃଷିର ନିଲମ୍ବିତ ନିର୍ଦ୍ଦେଶକ ତଥା ଆଇଏଏସ ଅଧିକାରୀ ବିଜୟ କେତନ ଉପାଧ୍ୟାୟ । ଆସନ୍ତା ୮ ତାରିଖରେ ହେବ ପରବର୍ତି ଶୁଣାଣି । ବିଲ୍ ରିଲିଜ୍ ପାଇଁ ଲକ୍ଷେ ଟଙ୍କା ଲାଞ୍ଚ ନେଉଥିବା ଅଭିଯୋଗରେ ଆଇଏଏସ୍ ବିଜୟ କେତନ ଉପାଧ୍ୟାୟଙ୍କୁ ଗିରଫ କରିଥିଲା ଭିଜିଲ୍ାନ୍ସ । ୬ଦିନିଆ ରିମାଣ୍ଡରେ ନେଇ ପଚାରାଉଚରା କରିବା ପରେ ଆଜି ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ତାଙ୍କୁ ହାଜର କରାଯାଇଥିଲା । ଜାମିନ ଆବେଦନ ରାୟ ସଂରକ୍ଷିତ ହେବା ପରେ ବିଜୟ କେତନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭିଜିଲାନ୍ସର ଅଭିଯୋଗ, ପ୍ରଧାନମନ୍ତ୍ରୀ କୃଷି ସିଞ୍ଚନ ଯୋଜନାରେ ବଡ଼ ଧରଣର ଦୁର୍ନୀତିର କାର୍ପେଟଦାର ହେଉଛନ୍ତି ଉଦ୍ୟାନକୃଷିର ତକ୍ରାଳୀନ ନିର୍ଦ୍ଦେଶକ ବିଜୟ କେତନ ଉପାଧ୍ୟାୟ । ଚାଷୀମାନଙ୍କୁ ଜଳ ସିଞ୍ଚନ ଉପକରଣ ଯୋଗାଉଥିବା ଅଧିକୃତ ସପ୍ଲାୟରଙ୍କ ଠାରୁ ବିଲ୍ ଟଙ୍କା ପଇଠ ପାଇଁ ନେଇଥାନ୍ତି ଲାଞ୍ଚ । ତାଙ୍କ ପାଇଁ ଲାଞ୍ଚ ଟଙ୍କା ଆଦାୟ କରିଥାନ୍ତି ୟେସ ବ୍ୟାଙ୍କର ରିଲେସନସିପ ମ୍ୟାନେଜର ସନ୍ତୋଷ ପଟ୍ଟନାୟକ । ଭିଜିଲାନ୍ସର ୬ ଦିନିଆ ରିମାଣ୍ଡ ଶେଷ ହେବା ପରେ ଆଜି ଉଭୟ ବିଜୟ କେତନ ଓ ସନ୍ତୋଷ ପଟ୍ଟନାୟକଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ତେବେ ସନ୍ତୋଷଙ୍କ ଅଭିଯୋଗ, ବଡ଼ ବଡ଼ିଆଙ୍କ ଷଡଯନ୍ତ୍ରର ସେ ଶିକାର ହୋଇଛନ୍ତି । ତାଙ୍କ ପକେଟରେ ଜବରଦସ୍ତ ଟଙ୍କା ରଖି ତାଙ୍କୁ ଗିରଫ କରିଥିଲା ଭିଜିଲାନ୍ସ ।
ସେପଟେ ଭିଜିଲାନ୍ସର ଯୁକ୍ତି ହେଉଛି, ଏସଆରଏମ ପ୍ଲାଷ୍ଟୋକେମ ପ୍ରାଇଭେଟ ଲିିମିଟେଡର ୫୦ ଲକ୍ଷ ଟଙ୍କାର ବିଲ୍ ରିଲିଜ କରିବା ପାଇଁ ୧ ଲକ୍ଷ ଟଙ୍କା ଦାବି କରିଥିଲେ ଆଇଏଏସ ଅଫିସର ବିଜୟ କେତନ ଉପାଧ୍ୟାୟ । ତାଙ୍କ ପାଇଁ ସନ୍ତୋଷ ପଟ୍ଟନାୟକ ଟଙ୍କା ନେଲା ବେଳେ ଧରା ପଡିଥିଲେ । ତେବେ ସନ୍ତୋଷଙ୍କ ଭଳି ପୂର୍ବରୁ ବିଜୟ କେତନ ମଧ୍ୟ ଏହାକୁ ସୁପରିକଳ୍ପିତ ଷଡ଼ଯନ୍ତ୍ର ବୋଲି କହିଥିଲେ ।
ଗୋଟିଏ ପଟେ, ଅନ୍ୟ ଲାଞ୍ଚ ମାମଲା ଗୁଡିକରେ ବିଜୟ କେତନ ଉପାଧ୍ୟାୟ ଓ ସନ୍ତୋଷ ପଟ୍ଟନାୟକଙ୍କର ସଂପୃକ୍ତି ନେଇ ଖୋଳତାଡ ଚଳାଇଛି ଭିଜିଲାନ୍ସ ବିଭାଗ । ଅନ୍ୟପଟେ ଏହାକୁ ଏକ ବଡ଼ ଷଡ଼ଯନ୍ତ୍ର ବୋଲି ଅଭିଯୋଗ କରୁଛନ୍ତି ଦୁଇ ଅଭିଯୁକ୍ତ । ଫଳରେ ଦିନକୁ ଦିନ ଏହି ମାମଲା ନେଇ ରହସ୍ୟ ବଢ଼ିବାରେ ଲାଗିଛି ।