ମଧ୍ୟାହ୍ନ ଭୋଜନ ଖାଇଲେ ସୁନ୍ଦରଗଡ ଜିଲ୍ଲାପାଳ । ହଠାତ ସ୍କୁଲରେ ପହଂଚି ପାଠ ପଚାରିଲେ, ଛାତ୍ରଛାତ୍ରୀଙ୍କ ସହ ଚଟାଣରେ ବସି ଖାଇଲେ ।
ସ୍କୁଲ ଛାତ୍ର ଛାତ୍ରୀଙ୍କ ସହ ମଧ୍ୟାହ୍ନ ଭୋଜନ କଲେ ସୁନ୍ଦରଗଡ ଜିଲ୍ଲାପାଳ । ଆଜି ଜିଲ୍ଲାପାଳ ସୁରେନ୍ଦ୍ର ମୀନା ଅଚାନକ ସ୍କୁଲ ପରିଦର୍ଶନ କରି ସେଠାରେ ଖାଦ୍ୟ ଗ୍ରହଣ କରିବାକୁ ଚାହିଁଥିଲେ । ସ୍କୁଲରେ ପହଂଚି ଛାତ୍ରଛାତ୍ରୀଙ୍କ ସହ ମିଶି ମିଡ ଡେ ମିଲ ଖାଇଥିଲେ ଏହି ଆଇଏଏସ ଅଧିକାରୀ । ରାଜ୍ୟର ବିଭିନ୍ନ ପ୍ରାନ୍ତରୁ ଅନେକ ସମୟରେ ନିମ୍ନ ମାନର ମଧ୍ୟାହ୍ନ ଭୋଜନ ଦିଆଯାଉଥିବାର ଅଭିଯୋଗ ହେଉଥିଲା । ଏହାର ଯାଂଚ ପାଇଁ ଅନେକ ପଦକ୍ଷେପ ନିଆଯାଉଥିବା ବେଳେ ଜିଲ୍ଲାପାଳ ଯେଉଁ ଉଦାହରଣ ସୃଷ୍ଟି କରିଛନ୍ତି, ତାକୁ ଢେର ପ୍ରଶଂସା ମିଳୁଛି । ଏଭଳି ତଦାରଖ ଜାରି ରହିଲେ ଆଗାମୀ ଦିନରେ ଚାଉଳ ବାଟମାରଣା ହେଉ ବା ନିମ୍ନ ମାନର ରୋଷେଇକୁ ପ୍ରତିହତ କରାଯାଇ ପାରିବ ।
Kanak News is now on WhatsApp
Join and get latest news updates delivered to you via WhatsApp
ସ୍କୁଲରେ ମଧ୍ୟାହ୍ନ ଭୋଜନ ଗ୍ରହଣ କରିବା ପ୍ରସଙ୍ଗରେ ଆମ ସୁନ୍ଦରଗଡ ପ୍ରତିନିଧି ଦେବାଶିଷ କବି, ଜିଲ୍ଲାପାଳ ସୁରେନ୍ଦ୍ର ମୀନାଙ୍କ ସହ ଆଲୋଚନା କରିଥିଲେ । ଜିଲ୍ଲାପାଳଙ୍କ କହିବା ଅନୁସାରେ, ରାଜ୍ୟରେ ପ୍ରଥମ ଥର ପାଇଁ ସୁନ୍ଦରଗଡରେ ପଂଚାୟତ ସ୍ତରରେ ଗ୍ରିଭାନ୍ସ ସେଲ ଆରମ୍ଭ କରାଯାଇଛି । ଲୋକଙ୍କ ସମସ୍ୟା ଯାହା ପୂର୍ବରୁ ଜିଲ୍ଲା ଆଉ ବ୍ଲକ ସ୍ତରରେ ଶୁଣାଯାଉଥିଲା, ଏବେ ପଂଚାୟତ ସ୍ତରରେ ଅଧିକାରୀ ଲୋକଙ୍କ ସମସ୍ୟା ଶୁଣି ସମାଧାନ କରିବେ । ଏହି କ୍ରମରେ ଆଜିର ଗ୍ରୀଭାନ୍ସ ସେଲରେ ଶୁଣାଣି ପରେ ହଠାତ ଆମ୍ବଗୋଭା ସ୍କୁଲ ପରିଦର୍ଶନ କରିଥିଲେ ଜିଲ୍ଲାପାଳ । କିଛି ସମୟ ପିଲାଙ୍କ ସହ କ୍ଲାସରୁମରେ ଆଲୋଚନା କରିଥିଲେ, ଆଉ ଏହାପରେ ମିଡ ଡେ ମିଲ୍ ଖାଇଥିଲେ । ଏଥିରେ ଜିଲ୍ଲାର ଅନ୍ୟ କିଛି ଅଧିକାରୀ ମଧ୍ୟ ସାମିଲ ହୋଇଥିଲେ ।
କିଛି ଦିନ ପୂର୍ବରୁ ନୂଆପଡାରେ ମଧ୍ୟ ଏଭଳି ଏକ ଚିତ୍ର ଦେଖିବାକୁ ମିଳିଥିଲା । ଖରିଆର ବ୍ଲକ ଚନାବେଡା ସେବାଶ୍ରମରେ ଅଚାନକ ପହଂଚି ମଧ୍ୟାହ୍ନ ଭୋଜନ ସ୍ଥିତି ପରଖିଥିଲେ ଡକ୍ଟର ପୋମ୍ମା ଟୁଡୁ । ଜିଲ୍ଲାପାଳ ହଠାତ୍ ସେବାଶ୍ରମରେ ପହଂଚି ଯାଇଥିଲେ । ସେଠାରେ ପିଲାଙ୍କ ପାଇଁ ରୋଷେଇ ହୋଇଥିବା ଖାଦ୍ୟକୁ ନିଜେ ଖାଇଥିଲେ ପୋମା ଟୁଡୁ । ତେବେ ଖାଦ୍ୟର ମାନକୁ ନେଇ ଜିଲ୍ଲାପାଳ ନିଜ ଅସନ୍ତୋଷ ଜାହିର କରିଥିଲେ । ସେବାଶ୍ରମର ଅନ୍ତେବାସୀଙ୍କୁ ଉନ୍ନତମାନର ଖାଦ୍ୟ ଯୋଗାଇବା ପାଇଁ ପ୍ରଧାନ ଶିକ୍ଷୟିତ୍ରୀ ଓ ମଧ୍ୟାହ୍ନ ଭୋଜନ ଯୋଗାଉଥିବା ଶିକ୍ଷକଙ୍କୁ ନୋଟିସ୍ କରିଛନ୍ତି ଜିଲ୍ଲାପାଳ । ପ୍ରଶାସନିକ ଅଧିକାରୀଙ୍କ ଏଭଳି ପ୍ରୟାସ ଆଗାମୀ ଦିନରେ ମଧ୍ୟାହ୍ନ ଭୋଜନର ସ୍ଥିତି ସୁଧାରି ପାରୁଛି କି ନାହିଁ, ତାଉପରେ ନଜର ।