ପିଲା ଖାଇଲେ ଭାତ-ଡାଲି, ବାବୁଙ୍କୁ ପରସା ଗଲା ଚିକେନ୍-ଭାତ : ସୁନ୍ଦରଗଡ ତିଲେଇମାଲ ସ୍କୁଲରେ ମଧ୍ୟାହ୍ନ ଭୋଜନ ମାନ ଯାଞ୍ଚବେଳେ ଆସିଲା ସମ୍ବେଦନହୀନ ଚିତ୍ର
କନକ ବ୍ୟୁରୋ : ଆଜି ବଣାଇରେ ଏଭଳି ଏକ ଘଟଣା ଦେଖିବାକୁ ମିଳିଛି , ଯାହା ଶୁଣିଲେ ଆପଣ ଅଶ୍ଚର୍ଯ୍ୟ ହେବେ । ମଧ୍ୟାହ୍ନ ଭୋଜନ କେମିତି ଚାଲିଛି ତାହା ଦେଖିବା ପାଇଁ ଏକ ସ୍କୁଲକୁ ଯାଇଥିଲେ ବ୍ଲକ ଶିକ୍ଷା ଅଧିକାରୀ । ତାପରେ ଖାଇବାର ଫଟୋ ବି ସୋସିଆଲ ମିଡିଆରେ ଅପଲୋଡ କଲେ । ଆଉ ଏଥିରୁ ଜଣାପଡିଲା, ପିଲାମାନେ ଭାତ, ଡାଲି ଖାଉଛନ୍ତି, କିନ୍ତୁ ବ୍ଲକ ଶିକ୍ଷାଅଧିକାରୀ ପିଲାଙ୍କ ସହ ବସି ଚିକେନ ଖାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୁନି କୁନି ସ୍କୁଲ ପିଲାଙ୍କ ସାମ୍ନାରେ ଶିକ୍ଷକ, ପ୍ରଧାନଶିକ୍ଷକ ଏବଂ ବ୍ଲକ୍ ଶିକ୍ଷା ଅଧିକାରୀ ଭାତ, ଚିକେନ୍, ସାଲାଟ୍ ଖାଉଥିବେ ଏବଂ ପିଲାଙ୍କୁ ପରସି ଦିଆଯାଇଥିଲା ଭାରତ-ଡାଲି । ଆଉ ସେତିକିବେଳେ କୁନି କୁନି ପିଲାଙ୍କ ମନରେ କ’ଣ ବିତୁଥିବ ଥରେ ଚିନ୍ତା କରନ୍ତୁ? ସୁସ୍ୱାଦୁ ଖାଦ୍ୟ ଦେଖି ପିଲାଙ୍କ ମନରେ କ’ଣ ପ୍ରତିକ୍ରିୟା ହେଉଥିବ ସେଥି ପ୍ରତି ତିଳେ ହେଲେ ଦୃଷ୍ଟିନଥିଲେ ବ୍ଲକ ଶିକ୍ଷାଧିକାରୀ ଏବଂ ସ୍କୁଲର ପ୍ରଧାନଶିକ୍ଷକ ।
ସରକାରଙ୍କ ନିର୍ଦ୍ଦେଶ ଅନୁଯାୟୀ ସ୍କୁଲରେ ଦିଆଯାଉଥିବା ମଧ୍ୟାହ୍ନ ଭୋଜନର ମାନ ଯାଞ୍ଚ ପାଇଁ ବଣେଇ ବ୍ଲକ ଶିକ୍ଷାଧିକାରୀ ବିନୟ ପ୍ରକାଶ ସାଏ ତିଲେଇମାଲ ସ୍କୁଲକୁ ଯାଇଥିଲେ । ତାଙ୍କୁ ସ୍ୱାଗତ କରିଥିଲେ ବିଦ୍ୟାଳୟର ପ୍ରଧାନଶିକ୍ଷକ ତୁପି ଚନ୍ଦନ କିସାନ । ତାପରେ ଆରମ୍ଭ ହୋଇଥିଲା ମଧ୍ୟାହ୍ନ ଭୋଜନର ମାନ ଯାଂଚ ପ୍ରକ୍ରିୟା । ଛାତ୍ରଛାତ୍ରୀ, ପ୍ରଧାନଶିକ୍ଷକଙ୍କ ସହ ତଳେ ବସି ଖାଇଥିଲେ ବିଇଓ । ହେଲେ ଏହି ସମୟରେ ଏକ ବ୍ୟତିକ୍ରମ ଦେଖିବାକୁ ମିଳିଥିଲା । ପିଲାଙ୍କ ଥାଳିରେ ଭାତ-ଡାଲି ଥିବା ବେଳେ ଉଭୟ ସାରଙ୍କ ଥାଳିରେ ଥିଲା ଭାତ, ଡାଲି, ସହିତ ସାଲାଡ୍ ଓ ଚିକେନ । ସେହି ସମୟର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଶିକ୍ଷା ଅଧିକାରୀ ଏବେ ସଫେଇ ଦେଇ କହୁଛନ୍ତି-ସ୍କୁଲର ଜଣେ ଶିକ୍ଷୟତ୍ରୀ ଘରୁ ଖାଇବା ପ୍ରସ୍ତୁତ କରି ଆଣିଥିଲେ ଆଉ ଏଥିରେ କୌଣସି ଆମିଷ ତରକାରୀ ନଥିଲା । ହେଲେ ପ୍ରଶ୍ନ ଉଠୁଛି-
-ପିଲାଙ୍କ ସାମ୍ନାରେ ସୁସ୍ୱାଦୁ ବ୍ୟଞ୍ଜନ ଖାଇବାକୁ ଶିକ୍ଷା ଅଧିକାରୀଙ୍କୁ କୁଣ୍ଠାବୋଧ ଲାଗିଲାନି କେମିତି?
-ଯଦି ବାବୁଙ୍କ ପାଇଁ ଖାସ୍ ଆୟୋଜନ ହୋଇଥିଲା ପିଲାଙ୍କୁ ଏଥିରୁ ବାଦ କାହିଁକି ଦିଆଗଲା?
– ଶିକ୍ଷା ଅଧିକାରୀଙ୍କୁ ଖୁସ୍ କରିବା ପାଇଁ ପିଲାଙ୍କୁ କେମିତି ଭୁଲି ଗଲେ ସ୍କୁଲ କର୍ତ୍ତୃପକ୍ଷ?