ଦେହ ବିଜେପିରେ, ମନ ବିଜେଡିରେ ? ପରିବାରକୁ ଭୁଲି ପାରୁନାହାନ୍ତି କୁସୁମ, ଖୁବଶୀଘ୍ର ନବୀନଙ୍କୁ ଭେଟିବେ…
ବିଜେପି ବ୍ୟାନରରେ ଜିତିଲା ପରେ ବି କୁସୁମ ବିଜେଡିକୁ ଭୁଲିନାହାନ୍ତି, ଭୁଲିନାହାନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ
କନକ ବ୍ୟୁରୋ: ‘ଘର ଛାଡିବା ପରେ ବି ଘର କଥା ଭାରି ମନେ ପଡୁଛି । ଯେତେ ମନ ବୁଝେଇଲେ ବି ମନ ଜମା ବୁଝୁନି । ମନମାଳିନ୍ୟ, ରାଗରୁଷାରେ ଘର ଛାଡି ଚାଲିଗଲା ପରେ କେହି କଣ ନିଜ ଘରକୁ ଭୁଲିଯାଏ ? ନା ନିଜର ଲୋକମାନଙ୍କ ସହ ବିତେଇଥିବା ମୁହୂର୍ତ୍ତମାନଙ୍କୁ ମନରୁ ଲିଭେଇ ହୁଏ ? ଯେଉଁଠି ଥିଲେ ବି ଯେତେ ଦୂରରେ ଥିଲେ ବି ଘର କଥା ମନେପଡେ । ଦେହ ଦୂରରେ ଥିଲେ ବି ମନ ଘରେ ପଡିରହେ…’
Kanak News is now on WhatsApp
Join and get latest news updates delivered to you via WhatsApp
ଏହା କୌଣସି ଗପ କି ଉପନ୍ୟାସର ଗୁରୁତ୍ୱପୂର୍ଣ୍ଣ ଗାରମରା ଧାଡି ନୁହେଁ । ବରଂ ଏହା ରାଜ୍ୟ ରାଜନୀତିର ଜଣ ଚର୍ଚ୍ଚିତ ଚେହେରାଙ୍କ ମନର କଥା, ଭାବନାର କଥା । ବିଜେଡି ଛାଡି ବିଜେପି ଗଲା ପରେ ବି, ବିଜେପିର ବିଧାୟିକା ହୋଇସାରିଲା ପରେ ବି ଘରକୁ ଭୁଲି ପାରୁନାହାନ୍ତି, ବିଜେଡିକୁ ଭୁଲି ପାରୁ ନାହାନ୍ତି ଆଉ ନବୀନଙ୍କୁ ମଧ୍ୟ ଭୁଲିପାରୁନାହାନ୍ତି । ବିଜେପିରେ ଦେହ ଥିଲେ ବି ବିଜେଡିରେ ମନ ଥିଲା ଭଳି କଥା କହୁଛନ୍ତି କୁସୁମ ଟେଟେ ।
ସୁନ୍ଦରଗଡ ବିଜେପି ବିଧାୟିକା କୁସୁମ ଟେଟେ ନବୀନଙ୍କୁ ଭେଟିବା ନେଇ ଆଜି ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି । ବିଧାନସଭାର ପ୍ରଥମ ଅଧିବେଶନରେ ଯୋଗଦେବା ପରେ ଖୁବ ଶୀଘ୍ର ନବୀନଙ୍କୁ ସାକ୍ଷାତ କରିବେ ବୋଲି କୁସୁମ କହିଛନ୍ତି । ତେବେ ବିଜେଡି ସୁପ୍ରିମୋଙ୍କୁ ଭେଟିବା ପାଇଁ କୁସୁମ ଉପଯୁକ୍ତ ସମୟ ଖୋଜୁଛନ୍ତି । ନବୀନଙ୍କୁ ଭେଟି ନିଜର ମନର କଥା କହିବେ ଆଉ ପଚାରିବେ କଣ ପାଇଁ ତାଙ୍କୁ ଟିକେଟ ଦେଇନଥିଲେ । ସେ ସମୟରେ କାହିଁକି ମୋତେ ଚିହ୍ନି ପାରିଲେନି ? ଜଣେ ଭଲ କର୍ମୀଙ୍କୁ କଣ ପାଇଁ ଛାଡିଲେ ବୋଲି ମୁଁ ନବୀନଙ୍କୁ ପଚାରିବି ବୋଲି କୁସୁମ କହିଛନ୍ତି । ନବୀନଙ୍କୁ ଭେଟି ତାଙ୍କ ଆଶିର୍ବାଦ ନେବି ଆଉ ଆଗକୁ ଯିବି…ବୋଲି କହିଲା ପରେ ତାଙ୍କ କେଇପଦ କଥାରୁ ସ୍ପଷ୍ଟ ଜଣାପଡୁଛି କି କୁସୁମ ଏବେବି ବିଜେଡିକୁ ଭୁଲି ପାରିନାହାନ୍ତି । ଯଦିଓ ସାମ୍ବାଦିକଙ୍କ ‘ଦେହ ବିଜେପିରେ, ମନ ବିଜେଡିରେ’ ପ୍ରଶ୍ନର ଉତ୍ତରକୁ ବାଆଁରେଇ ଦେଇଛନ୍ତି କୁସୁମ ତଥାପି ତାଙ୍କ ଅଧାଗିଳା ଉତ୍ତର ବିଜେଡିରେ ମନ ଥିବା କଥାକୁ ଉଖାଡି ଦେଇଛି ।
ତେବେ ଚଳିତ ନିର୍ବାଚନରେ ବିଜେଡିକୁ ମାତ ଦେଇ ସୁନ୍ଦରଗଡର ବିଧାୟିକା ହୋଇଛନ୍ତି କୁସୁମ ଟେଟେ । ବିଜେଡିର ବିଧାୟକ ତଥା କଂଗ୍ରେସରୁ ଆସିଥିବା ଯୋଗେଶ ସିଂହଙ୍କୁ ହରାଇ ବିଜୟୀ ହୋଇଛନ୍ତି କୁସୁମ । ୨୦୧୪ରେ ସୁନ୍ଦରଗଡର ବିଜେଡି ପ୍ରାର୍ଥୀ ହୋଇଥିଲେ କୁସୁମ ଆଉ ସୁନ୍ଦରଗଡ ବିକାଶ ପରିଷଦର ଅଧ୍ୟକ୍ଷ ମଧ୍ୟ ଥିଲେ ।
କଂଗ୍ରେସର ଗଡ ସୁନ୍ଦରଗଡରେ ବିଜେଡିର ସତ୍ତା ନଥିବା ବେଳେ ତୃଣମୂଳ ସ୍ତରରେ ବିଜେଡିକୁ କୁସୁମ ହିଁ ପହଞ୍ଚାଇବାରେ ବଳିଷ୍ଠ ଭୂମିକା ଗ୍ରହଣ କରିଥିଲେ । ଆଉ ଏସବୁ ଦୃଷ୍ଟିରୁ କୁସୁମଙ୍କୁ ଚଳିତ ନିର୍ବାଚନରେ ବିଜେଡି ଟିକଟ ମିଳିବ ବୋଲି ସମସ୍ତେ ଜାଣିଥିଲେ । ହେଲେ କଂଗ୍ରେସ ଛାଡି ବିଜେଡିରେ ମିଶିବା ପରେ ଯୋଗେଶ ସିଂହଙ୍କୁ ଟିକଟ ମିିଳିଥିଲା । ତାପରେ କୁସୁମ ଅଭିମାନ କରି ଦଳ ଛାଡିଲେ, ବିଜେପିରେ ମିଶିଲେ ଆଉ ଶେଷରେ ବିଧାୟିକା ମଧ୍ୟ ହେଲେ ।
ଏପ୍ରିଲ ମାସରେ ଯେତେବେଳେ ବିଜେଡି ଟିକଟ ବାଣ୍ଟୁଥିଲା ସେତେବେଳେ ନବୀନ ନିବାସ ଆସି କାନ୍ଦିଥିଲେ କୁସୁମ । ଦଳରେ ଗୁରୁତ୍ୱ ନଦେବା ଦୁଖରେ କାନ୍ଦିଥିଲେ । ଆଉ ଏବେ ବିଜେପି ବ୍ୟାନରରେ ଜିତିଲା ପରେ ବି କୁସୁମ ବିଜେଡିକୁ ଭୁଲିନାହାନ୍ତି, ଭୁଲିନାହାନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ । ସୁବିଧା ମିଳିଲେ ସେ ନବୀନଙ୍କୁ ଭେଟିବାକୁ ଯିବେ ବୋଲି କହିବା ପରେ ରାଜ୍ୟ ରାଜନୀତିରେ ଚର୍ଚ୍ଚା ଜୋର ଧରିଛି ।