କନକ ବ୍ୟୁରୋ : ସିବିଆଇ ସମନ ଓ ପୋଲିସର ସମନ, ଏହାକୁ ନେଇ ଆରମ୍ଭ ହୋଇଯାଇଛି ବିଜେଡି ଓ ବିଜେପି ମଧ୍ୟରେ ଦୋଷ ଲଦାଲଦି । ବିଜେପି ଅଧ୍ୟକ୍ଷ ଅମିତ ଶାହାଙ୍କ ଓଡ଼ିଶା ଗସ୍ତ ଦିନ ସିବିଆଇ ସମନକୁ ନେଇ ଯେତିକି ସନ୍ଦେହ ଉଠିଛି, ସେତିକି ସନ୍ଦେହ ଉଠିଛି ଅମିତ ଶାହା ଯିବା ପରେ ପରେ ବିଜେପି ନେତାଙ୍କ ନିକଟକୁ ରାଜ୍ୟ ପୋଲିସର ସମନ୍ । ତେବେ ଆହୁରି ବଡ଼ ପ୍ରଶ୍ନ ହେଉଛି ସିବିଆଇ ସମନ ପଠାଇବା ନେଇ ଗଣମାଧ୍ୟମରେ ଖବର ପ୍ରକାଶ ପାଇଛି, ହେଲେ ଦୁଇ ବିଜେଡି ବିଧାୟକଙ୍କ ପାଖରେ ପହଁଚିନାହିଁ । ସେପଟେ ହତ୍ୟା ମାମଲାରେ ବ୍ରହ୍ମପୁର ପୋଲିସ ପଠାଇଥିବା ସମନ୍ ପହଁଚିନଥିବା କହିଛନ୍ତି ବିଜେପି ନେତା । ଫଳରେ ସମନକୁ ନେଇ ସସପେନ୍ସ ବଢିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପି ଅଧ୍ୟକ୍ଷ ଅମିତ ଶାହାଙ୍କ ଓଡ଼ିଶା ଗସ୍ତକୁ ନେଇ ଯେତିକି ଚର୍ଚ୍ଚା ହୋଇଛି, ତା’ଠାରୁ ଢେର ଅଧିକ ଚର୍ଚ୍ଚା ହୋଇଛି ସମନକୁ ନେଇ । ମାସ ମାସର ନିରବତା ପରେ ଚିଟଫଣ୍ଡ ଦୁର୍ନୀତି ତଦନ୍ତ କରୁଥିବା ସିବିଆଇ, ମଙ୍ଗଳବାର ଦିନ ହଠାତ୍ ସକ୍ରିୟ ହୋଇଥିଲା । ବିଜେଡିର ଦୁଇ ବରିଷ୍ଠ ବିଧାୟକ ଅତନୁ ସବ୍ୟସାଚୀ ଓ ଅରୁଣ ସାହୁଙ୍କ ନିକଟକୁ ହାଜିର ହେବାକୁ ସମନ୍ କରାଯାଇଥିବା ଖବର ଗଣମାଧ୍ୟମରେ ପ୍ରକାଶ ପାଇବା ପରେ ରାଜ୍ୟ ରାଜନୀତିରେ ହଲଚଲ ସୃଷ୍ଟି ହୋଇଛି । ତେବେ ସମନକୁ ନେଇ ରାଜନୀତି ଆହୁରି ତୀବ୍ର ହୋଇଛି ଯେତେବେଳେ ଲକ୍ଷ୍ମୀଦତ ପ୍ରଧାନ ହତ୍ୟା ମାମଲାରେ ବିଜେପି ନେତା ଗୋଲକ ମହାପାତ୍ର ଓ ଭୃଗୁ ବକ୍ସିପାତ୍ରଙ୍କୁ ସମନ କରିଥିଲା ବ୍ରହ୍ମପୁର ପୋଲିସ ।
ସବୁଠୁ ରୋଚକ କଥା ହେଉଛି ସମନ ପହଁଚିଥିବା ନେଇ ନା’ ବିଜେଡିର ଦୁଇ ବିଧାୟକ ହଁ ଭରିଛନ୍ତି ଓ ନା’ ଦୁଇ ବିଜେପି ନେତା ସ୍ୱୀକାର କରିଛନ୍ତି । ସିବିଆଇ ସମନ ନେଇ ଉଭୟ ଅତନୁ ଓ ଅରୁଣ କେହି ମୁହଁ ଖୋଲିନାହାନ୍ତି । ସେପଟେ ବ୍ରହ୍ମପୁର ପୋଲିସର ସମନ ପାଇନଥିବା ଟ୍ୱିଟ୍ କରି ଜଣାଇଛନ୍ତି ବିଜେପି ନେତା ଭୃଗୁ ବକ୍ସିପାତ୍ର ଓ ଗୋଲକ ମହାପାତ୍ର ।
ସମନକୁ ନେଇ ମୁହାଁମୁହିଁ ହୋଇଛନ୍ତି ବିଜେପି-ବିଜେଡି । ଅମିତ ଶାହାଙ୍କ ଗସ୍ତ ପୂର୍ବରୁ ସିବିଆଇ ସମନ ଦେବା ନେଇ ରାଜନୀତିର ଗନ୍ଧ ବାରିଛି ବିଜେଡି । ସେପଟେ ରାଜ୍ୟ ସରକାର ପ୍ରତିଶୋଧ ପରାୟଣ ହୋଇ ଲକ୍ଷ୍ମୀଦତ ପ୍ରଧାନ ହତ୍ୟା ମାମଲାରେ ସମନ ଦେଇଥିବା ଅଭିଯୋଗ କରିଛି ବିଜେପି । ସେପଟେ ବିଜେଡ଼ି ଓ ବିଜେପି ମଧ୍ୟରେ ଭିତିରି ସମ୍ପର୍କ ରହିଥିବା ପୁଣି ଦୋହରାଇଛି କଂଗ୍ରେସ । ତେବେ ନିର୍ବାଚନ ପାଖେଇ ଆସୁଥିବା ବେଳେ ସିବିଆଇର ଏହି ନୋଟିସ୍ ସନ୍ଦେହ ସୃଷ୍ଟି କରୁଛି ବୋଲି କହିଛନ୍ତି ପିସିସି ସଭାପତି ନିରଂଜନ ପଟ୍ଟନାୟକ ।
ସିବିଆଇ ସମନ ଓ ପୋଲିସର ସମନକୁ ନେଇ ଦୁଇ ପ୍ରତିଦ୍ୱନ୍ଦୀ ଦଳ ମଧ୍ୟରେ ଛକାପଂଝା ଆରମ୍ଭ ହୋଇଛି । ଗୋଟିଏ ପଟେ ସମନ ମିଳିନଥିବା ନେଇ ନେତାଙ୍କ ବୟାନ ଓ ଅନ୍ୟପଟେ ଦଳ ପକ୍ଷରୁ ତୁତୁ ମେମେ ମଧ୍ୟରେ ରାଜନୀତି ସରଗରମ ହୋଇଛି ।